Esita 3 - Kutsingken Ira Rimam ti Saen Kyag

Haman Myae ti Wu Twenji Mbayawuda

¹ Isim ayine, ukwe Ahasuweru nda urae Agagi iki ti rinyi-wu si Haman, umbae Hamedata rurob, u sa wu somtsa kutugbug rurob-wu ti skeb tag ana ande ti tsitsi.

² Meme apyi ukwe ti ku nde wande yi ufu ti ku sang yi fikyi ukwe ku ku riben na Haman ti ayi u tatso risu ti nae riben-ba na wu, ikyaen imi ukwe ti nda ba unju ti a naa ku kú riben na fen wu. Amaa, Mordekai ku nde-wu ama be.

³ Ama ande ti tsitsi ti ku nde wande yi ufu ti ku sang yi fenkyi ukwe atang rang Mordekai baa, “Imi ti nde afu ku nyatsa icwe ukwe?”

⁴ Ti aba tsikunn ku ri ira te Mordekai ti usir usir, awu naa atong u fxen-wu aba be. Aba sa kag kag ka ri te Haman ti a na nung ko Mordekai u nde kunn ira yine na, ikyaen ti awu ri te ba baa, awu na si Mbayawuda.

⁵ Haman tso rinae timambe kiye ti awu nungye baa, Mordekai na pyir ti wu ku riben na-wu u nda-wu rurob.

⁶ Ama ti awu fxen baa, Mordekai na si umbae Yawuda, awu kab ti awu a wen nyang Mordekai amam, ayi u ndeya-yi awu be. Ikyaen yine, awu sha fengo ti awu u twenji kwer ti ande Mordekai, Mbayawuda ti ta uten uten ti Ahasuweru nae ukwe risu-yi.

⁷ Uwae ushaen ti tawe, ti si ushaen Nisan, Ahasuweru nde pu wu asang rijwe asu ifaen uwae ukwe-wu. Aba caen Pur uwe Haman yaka ti ucwe, ushaen ti ushaen ba sang ushaen ti rijwe asu ifaen, ti si ushaen Adar.

⁸ Tiri Haman ri te ukwe Ahasuweru baa, “Utso ande ba iki shag kyife uwae uten uten yi ti afu nae ukwe risu-yi ne, aba kag ra ijwe-ba tsi txi. Icwe-ba txi ra te icwe ande ti tsitsi ti ta uwae uten-fu ike. Aba ku ye su-ba icwe ti ukwe nda be. Aba fa-ba kwab ti ukwe u ya ba ta ti a som uwae uten-wu be.

⁹ Asiti ukwe a cwe ira, awu ā bae icwe ru ye ti a wen tag ande ba, ame ama u pae azurfa kumbub rijwe na ande ti ku nde wande ukwe, ti a pu si fa aser ukwe.”

¹⁰ Ama ukwe nwaen ra kunyang wu ti a ku kyag rinyi ukwe ru atang, u nda Haman urae Agagi, unde ti Hamedata, ti si unde ti rika Mbayawuda.

¹¹ Ama ukwe ri te Haman baa, “Aser yi, fa ti ande ba meme, ta kujwo-fu. Nde iken ti afu ku sha.”

¹² Tiri a kunn byir ande ti ku bae iken ukwe uwae usir ti rijwe asu ita na ushaen titawe, ama a bae icwe ru ye na ande ti uwe, ti gomna gomna, ti ande ti ta risu uten uten, ti ande ti ta risu unju uten unju uten pangma ti Haman nda unju. A bae atsingken yine yi unju uten unde titini u ka yi na ko uten uten titini. A bae atsingken yine yi rinyi ukwe Ahasuweru, ama sa kunyang ti a kyag rinyi ukwe ru atang kwa atsingken yi.

¹³ A pu atsingken yine na ande ti bir afxen, ti a na ka yi na meme uten ti ukwe nae ukwe risu-yi, ti a na yerwen, u wenji, ama na twenji tag meme Mbayawuda, nwunn anyisu taen ka sang ande ndufu, fa ti anda ti anyisu, uwae usir kinjo ti si usir ti rijwe asu ita na ushaen ti rijwe asu ifaen ti si ushaen na Adar, ti a na pu tag rifunn-ba.

¹⁴ Atsingken yi ti a bae ne ā si icwe ko aka uwae uten uten, ama ti a ya iski na ande ti a som ti ujwin usir wu.

¹⁵ Ande ti bir afxen ba nwunn ti kufe u nde pangma ti ukwe ri. A sa iski yi ya yi Susa, uten tiyang ama. Tiri, ukwe ti Haman som ku ngwa iken ti ngwa, amaa, uwae uten Susa kyirunn.