Esita 2 - Kutsingken Ira Rimam ti Saen Kyag

Esita Kafe Uwa Ukwe

¹ Isim iken yine, kiye ti rinae ukwe Ahasuweru jim pu yi, awu kab ira risu iken ti Vashiti nde, ti risu icwe ti a bae ikyaen-wu.

² Tiri upyi ukwe ti ku myae na wu kumyae ri baa, “Ā sha anyisu wandab ti waen anda timambe, u nung-ba urom khika be ba na ukwe.

³ Isim ayine, ukwe ā tsab unde ti uwe ti uwe ruye uwae uten uten ti awu nae ukwe risu-yi, ti a kunn anyisu wandab ti waen anda timambe, u nung-ba urom khika be, ba byir kusog ti anda ku som atang ti ta fenkyi ukwe yi uten Susa, ikyaen ti Hegai, unde ti ku nungkyi anda ā nungkyi ba, u sha na ba iken kindab.

⁴ Wandab ti a sī pu wu ukwe uwae, awu ā fikyi Vashiti.” Ira yine nyang uwae ukwe, ama awu cwe u nde ti mbwe-yi.

⁵ Kiye wu, umbae Yawuda iki ta fenkyi ukwe yi Susa atang ti rinyi-wu si Mordekai, umbae Jayir ti si umbae Shimeyi, ti si umbae Kishi, ti si urae Benjamin.

⁶ Ti kucang-yi, Nebukanezar, ukwe ti Babila, ye wu upyi ru ye uwae Urushelima fa ti Jekoniya, ukwe Yawuda, ti ande iki.

⁷ Mordekai fa atang ama, awu pu Hadasa, umbae iye-wu ti a ku kunn wu baa, Esita ba shi ser ikyaen ti itse-wu ti iya-wu cwu pu ba. Esita waen unda timambe. Mordekai sa wu pangma umbae umbyi-wu.

⁸ Pangma ti ukwe nda unju, Esita fa uwae anyisu wandab yang-ba ti a pu ba ba fenkyi ukwe yi Susa, uten tiyang na uten wu. A pu anyisu wandab ba ba faesi Hegai unde ti ku nungkyi anda, ti wu na nungkyi ba.

⁹ Esita sī Hegai uwae timambe. Awu tu kutxuwe ti tinyang uwe Hegai. Ama ti ritsen, awu sha na wu iken kindab ti wuci ti tinyang, ama tsab anyisu wandab itsongfaen ti ku nde wande fenkyi ukwe atang ti a na ndeya wu. A pu wu ti anyisu wandab ba sang fife uwae kusog ti nyang siskeb uwae asog anda atang.

¹⁰ Esita tatso-wu unde iki ande-wu, ko uwog ti awu ru atang ba be, ikyaen ti, Mordekai fwa wu kusen baa, awu na ri te-wu unde iki be.

¹¹ Ti usir usir, Mordekai ku jaem pakob jaem pakob asog anda ba ti wu nung baa, Esita na som rimang, ama a ku nde wu rimang na.

¹² Kiye ti a sa tsi ti anyisu wandab ba na pwen atso sang yi uwe ukwe Ahasuweru si kusang kinjo. A sa ishaen itsongnjo u shi ba kindob murr, ama ishaen itsongnjo ti tsitsi, a sa shi ba iken kindab ti ku nung kuyang ti tsitsi.

¹³ Kiye ti wandab wu a nwunn kusog anda ku ru yi uwog ukwe, awu u mbe iken ti nyang uwae-wu, u kyae ijwe-wu te yi.

¹⁴ Ureb awu u sang yi uwog ukwe, kiskinn awu ama u ruye, a u pu wu sang yi kusog tishe, uwog ti awa ukwe ti tsitsi ku som atang ti Shashigazi ta risu-yi. Awu u sang ka-wu uwog ukwe cwucwo be. Asiti awu a nde iken sī ukwe uwae, a u kunn wu ti rinyi sang ba kyi uwog ukwe.

¹⁵ Ti kupwen itisang uwog ukwe ba pu yi risu Esita umbae Abihayil iye Mordekai ti Mordekai pu ba som te ijwe-wu pangma umbae umbyi-wu, Esita mbe-wu iken kindab iki be. Awu putswa nyang kumyae Hegai, unde ti ku nungkyi ba amam. Uwae kiye wune, Esita ku tu kutxuwe ti tinyang uwog ande ti sae wu meme.

¹⁶ Ama a pu Esita ka na ukwe Ahasuweru uwae kusog-wu uwae ushaen ti rijwe ti si ushaen Tebeti, yi kusang ti itsongfaen na ukwe ti nae-wu.

¹⁷ Ukwe site ure te Esita skeb tag pu wu awa-wu ti tsitsi. Ikyaen yine, awu tu kutxuwe ti tinyang skeb tag anyisu wandab ba meme. Ama ukwe sa kubur uwa ukwe bur wu ti awu ā fikyi Vashiti.

¹⁸ Tiri ukwe nde ukwab tiyang na ande ti uwe ti uwe ti apyi-wu ikyaen Esita ti awu mbe. Awu nda ande-wu unyang ti pu uwae wande-ba, u nda ba rinyangwae meme pang ti rifunn-wu ana ukwe.

Mordekai Nwangru Unyang Ukwe

¹⁹ Kiye ti anyisu wandab ba byir atso ti apu-ifaen, Mordekai som fenkyi ukwe u si kinjo uwae ande ti ku nde wande fenkyi ukwe.

²⁰ Kiye wu, Esita tatso-wu unde iki ande-wu ko uwog ti awu ru tang ba be pangma ti Mordekai fa wu kusen. Awu nae risu riben na Mordekai pangma kiye ti awu te wu ta tetso.

²¹ Kiye iki ti Mordekai som ufu ti ku sang fenkyi ukwe, Bigtan ti Tereshi, ande ti ku nde wande fenkyi ukwe, ku nungkyi uwog ti ku sang fenkyi ukwe, tso rinae ama ku sha ti a u wen ukwe Ahasuweru.

²² Mordekai nungye ira yi, ama ka ri te Esita uwa ukwe. Esita ama nwunn ka ri te ukwe ira yi ti Mordekai tom wu ti awu na ka ri.

²³ Kiye ti a txong putswa ira yi u nungye baa, ira yi na si kubenti, a pu ande ba kyensi kutuku, ama ande ba cwu. Ukwe nda unju, a bae iken yi ti nde ne si uwae kutsingken kuci na uten wu.