Esita 1 - Kutsingken Ira Rimam ti Saen Kyag

Ukwab Ukwe

¹ Iken ti nde kiye ti Ahasuweru nae ukwe ta re. Ahasuweru wu ti si ukwe na uten uten ukob kinjo ti rikom asu itsongfaen (127), nwunn ti Indiya ka sang Etiyopiya.

² Kiye wu ukwe Ahasuweru somtsa kutxomkwe-wu uwae Susa uten tiyang na kujwokwe-wu.

³ Uwae kusang ti ita ti awu nae ukwe, awu nde ukwab na ande-wu. Awu yae ande ti uwe akyirten na Pasiya ti Madai ti ande ti rurob, ti aba Gomna-Gomna na uten uten.

⁴ Awu nde ukwab ti ka usir ukob kinjo ti mae inje (180), u ku tatso rifunn-wu, ti kuko-wu, ti rurob-wu, ti riyinn na kujwokwe-wu.

⁵ Kiye ti usir ukwab yi mamtag pu yi, ukwe nde kyi ukwab ikyaen ande meme, ande ti rurob ti ande ti rob-ba rob be, ti ta uwae uten Susa. Ukwab yi nde ka usir itsongfaen yi fenkyi ukwe.

⁶ A pu atupwa titsen ti tinyang ti atupwa ti rikaen-yi ru irum titisub, kyensi iji ti tsen ti ti ru tibyaen ti kyaefa ikum azurfa ti ta risu afwá ti sim fenkyi Ukwe atang. Ama a pu atugbug na azurfa ti zinariya tā riben atang. Riben wu ama, a kyae wu te atxom ti tsen, ti afxaetxir, ti atxom ti jae wur wur, ti atxom ti tinyang ti tsotso.

⁷ A nyae ambyi anam si ba uwae atu zinariya ti tsotso ti tsotso. Ukwe nda ambyi anam shag, rukwer te rifunn-wu ti awu site.

⁸ Ukwe nda unju na apyi-wu ti a na sha na ko aye ko aye itso iken ti awu ku sha ti wu ngwa, a na byangkyi-ba unde iki be.

⁹ Vashiti, Uwa Ukwe, nde ukwab na anda yi fenkyi ukwe atang ama.

A Tē Vashiti Uwa Ukwe

¹⁰ Usir ti itsongfaen na ukwab ukwe yi, awu ngwa kyaen ambyi anam, uwae-wu nyang. Awu ri te apyi-wu itsongfaen ti si Mehuman ti Bizita ti Habona ti Bigita ti Abagita ti Zetar ti Karkasi, apyi ti ku nde na wu wande

¹¹ ti a na pu uwa-wu Vashiti na ba na wu. Awu na kyae ijwe-wu te atupwa ti kubur uwa ukwe, ikyaen ti awu Ukwe na u pu wu tatso ande ti uwe ti ande ti tsitsi ti a na sae rinyang-wu, ikyaen ti Vashiti waen unda timambe.

¹² Amaa, Vashiti, uwa ukwe, pyi kutsa ukwe yi ti apyi ba ba tsa na wu. Ikyaen yine, Ukwe tso rinae, utob-wu ndembeb si-yi ti ti ri be.

¹³ Tiri ukwe sha kumyae uwog ande ti ben ayib ti nung iken ti ku nde, pangma ti awu ku nde kob.

¹⁴ Ande ti ta fifer te awu Ukwe si Karshena, ti Shetar, ti Adamata, ti Tarshish, ti Meresi, ti Marsena, ti Memukan. Aba ti si ande itsongfaen ti rob siskeb uwae uten ti Pasiya ti Madai, ti ku ti ukwe som tetso ko kiye titini.

¹⁵ Ukwe rang baa, “A bae imi uwae icwe-ti risu itso ira yine? Imi ti a u nde te Vashiti, uwa ukwe ikyaen ti awu bom risu te ukwe, u fxen-wu kutsa ti ukwe tsa apyi-wu ba uwog-wu be?”

¹⁶ Tiri Memukan ri te ukwe ti ande ti uwe ti funn atang baa, “Vashiti uwa ukwe raen-wu nyáng ukwe ira amam be, amaa kwer ti meme ande ti uwe ti ande ti tsitsi ti ta uten uten ukwe.

¹⁷ Ikyaen yine, anda ti uten ike u fxen iken ti uwa ukwe nde te ubaen-wu, ama aba u saeru abaen-ba u ri baa, Ukwe Ahasuweru tsa kutsa ti a na pu Vashiti uwa-wu na ba na wu, Vashiti pyi u ba-wu be.

¹⁸ Tine, anda ti utin ti ta Pasiya ti Madai ti fxen iken ti uwa ukwe nde te ubaen-wu, a u sa yi ka ri te abaen-ba, ayi u shir ba itisaeru ti rinae tititso si-yi ti ti ri be.

¹⁹ “Asiti ukwe a cwe, awu ā sa ru ye icwe ti a bae yi sang fa uwae icwe na ande ti Pasiya ti Madai ti a u fi-ba yi be, baa, Vashiti na ba-wu uwe ukwe Ahasuweru cwucwo be. Ukwe ama ā sa rurob Vashiti wu na unda tishe ti nyangskeb Vashiti, ti awu ā fikyi wu.

²⁰ Kiye ti a ku ya iskin icwe ti Ukwe sa ru ye ne ko aka uwae uten uten ti awu nae ukwe risu-yi, anda meme u nae risu riben na abaen-ba, kwer ande ti si ande ti uwe, ti ande ti si-ba ande ti uwe be.”

²¹ Kumyae Memukan nyang uwae ukwe ti ande ti uwe. Ukwe nde wande te kumyae-wu ayi.

²² Awu nda ba, a ka kutsingken icwe wune ko aka uwae uten uten ti awu nae ukwe risu-yi ti unju uten unde titini ti ta uwae uten atang baa, urom ti na ta risu kununn-wu. Awu ti site rurob uwae kununn atang.