Daniyel 9 - Kutsingken Ira Rimam ti Saen Kyag

Daniyel Jwam Rimam Risu Ande-wu

¹ Uwae kusang ti tawe ti Dariyusi umbae Ahasuweru, unde ti Mede, nae ukwe risu ande ti Babila,

² uwae kusang ti tawe wu ti awu nae ukwe, ame Daniyel nungye uwae kutsingken Rimam, ira ti Yaweh ri unju Irimiya upyi-wu risu ujwunn asang ti u ba nde titawe Urushelima u mbub si riben. Ayi u ka asang mae ita mbe rijwe.

³ Tiri ame kafe uwe tu Itsekuru-m Rimam, ama sha ayibrisi uwae itijwam, ti unju ti cwe. Ame sī ibae, ama mbub itóng risu-m.

⁴ Ame jwam itijwam uwog Yaweh Rimam-m, u fxir tso ikentitibi-m baa, “Aya Itsekuru Rimam ti site kuko, ti ku nde iken ti ku fur ayib. Afu si Rimam ti ku ye su unju ti yer-fu, u site ure ti tsi kukunn te ande ti site ure te fu ku ye su icwe-fu.

⁵ Ati nde pu ti ikentitibi u raen ira u kpag risu, ama nde iken ti beb timambe. Ati ya icwe-fu ti kusen ti fa-fu ta pu ti.

⁶ Apyi-fu ya iskin ira-fu, u ri ira yi rinyi-fu te abikwe-ti, ti ande ti uwe-ti, ti abitse-ti, ti meme ande ti ta uten-ti, amaa, ati fxen ti aba be.

⁷ “Rimam, afu si Rimam ti kubenti, amaa, yi uwog ti ana-ti tine, ati ande Yawuda, ti Urushelima, ti meme ande Isirela, tu rikwae ti wae. Meme-ti aba ti ta fifer, ti aba ti ta rurwen, yi uwog ti afu rwae shag ba ka som atang, ati uwae rikwae ikyaen ira titibi ti ati nde uwe-fu.

⁸ Ati ti abikwe-ti, ti ande ti uwe-ti, ti abitse-ti, tu rukwae ikyaen ti, ati nde ikentitibi uwe-fu.

⁹ Itsekuru-ti Rimam, afu si Rimam na ayibrisi, ti ku yata na ande ikentitibi, ko ti ati kpag risu te fu.

¹⁰ Ati nae-ti risu riben te icwe-fu ti apyi-fu ande ti ku ya iskin ira-fu ri te ti be.

¹¹ Meme-ti Isirela nyatsa pu ti icwe-fu, u kafe isim ta pu ti afu, u shaen ti ti u nae risu riben te ira-fu. “Ikyaen yine, kufwag ti afu ta, ti uben ti ben ti upyi-fu Musa bae uwae kutsingken icwe ta risu-ti ikyaen ikentitibi ti ati nde uwe-fu.

¹² Afu kumunn pu fu ira-fu ti afu ri risu-ti ti abikwe-ti ti ku tae ti, yi fengo ti afu nda ira titibi si ba risu-ti. Ti ti afu mam apupwen ti riben, itso ira yi ti tu Urushelima ne tu ji-yi uten iki khika be.

¹³ Pangma ti a bae uwae icwe Musa, meme ira titibi ti a bae uwae icwe Musa risu-ti kumunn pu yi. Amaa, ati sha-ti ayibrisi uwog-fu Yaweh Rimam-ti be, ati ama kafe isim ta-ti ikentitibi-ti be, u sa utob na ati ira fu ti kubenti be.

¹⁴ Ikyaen yine, afu Yaweh sa ira titibi tsi pu fu, ama u yaen yi si ba pu fu risu-ti, ikyaen ti, afu Yaweh Rimam-ti ku nde meme iken-fu yi fengo ti pang atang, amaa, ati nae-ti risu riben na fu be.

¹⁵ “Ama Itsekuru-ti Rimam, afu ti pu ande-fu ruye uwae uten Ejib yi kuko-fu ama nde rinyi. Tine, ati nde pu ti ikentitibi u nde pu ti ira ti beb timambe.

¹⁶ Aya Itsekuru, ikyaen meme wande-fu ti pang atang, sa ru rinae-fu risu uten-fu Urushelima, rikwen-fu ti saen kyag. Ikyaen ti, ikentitibi-ti ti riraen na abitse-ti nda Urushelima ti ande-fu kafe pu ba iken ti ande ku tsag ira risu-ba ku kyang.

¹⁷ “Aya Rimam-ti, fxen itijwam upyi-fu ti awu ku jwam ku sha ayibrisi. Ikyaen rinyi-fu, Itsekuru, kafe kutxuwe-fu ti saen kyag tag Ukag ti sisaen-fu ti mbub si riben.

¹⁸ Rimam-m, kyae atong ti fxen m. Sae ayib-fu si ba risu uten-ti ti ku ukaen, uten wu ti a kunn wu ti rinyi-fu. Ikyaen ti, itijwam-ti uwe-fu si-yi ikyaen itinyang-ti be, amaa, ikyaen ayibrisi-fu ti ko timambe.

¹⁹ Itsekuru, fxen! Yata na ti! Rimam-m, naa atong ti fu nde iken iki ti ritsen ikyaen rinyi-fu, ikyaen ti, uten-fu ti ande-fu ku kunn tso rinyi-fu.”

Kutsab Mae Ita mbe rijwe

²⁰ Kiye ti ame ta uwae Rimam ti jwam ku fxir tso ikentitibi-m ti ana ande-m Isirela, ku pu itijwam-m ba uwe Yaweh Rimam-m ikyaen rikwen ti saen kyag na Rimam-m,

²¹ Jibirilu, unde ti ame sae pu m awu pu pu uwae kurwa kucang, pinn ba tu m kiye iken ti twen ti ureb.

²² Awu ri te m baa, “Daniyel, ame si ba ti m nda fu itinungye ana Ira ti kitam.

²³ Ti kiye ti afu bag itijwam-fu ikyaen ayibrisi, Rimam fxen itijwam-fu ayi, ama u tom m ba uwog-fu ikyaen ti, awu site ure te fu timambe. Ikyaen yine, naa atong nyinyang ti fu nungye ititatso ayi.

²⁴ “A pu kutsab mae ita mbe rijwe tsi pu ba ikyaen ande-fu, ti uten-fu ti sisaen: ikyaen ti a na fxae bom risu-ba u ya ikentitibi-ba na ta. Aba ā twen iken titwen ikyaen itiyata ikentitibi, u som usom ti kubenti ru fife yi uwe. Ayine u kumunn iratitatso ande ti ku ya iskin ira Rimam, ti kutsa-ba, ti itiyerkob uwog ti saen siskeb.

²⁵ “Ame ku sha ti fu na nungye baa, ti kiye ti a nda unju risu itimbye nyang Urushelima kaa sang kiye itiba ukwe iki, unde ti a tsitsab, ayi u ka kutsab itsongfaen. Tiri a u mbye nyang uten wu uwae kutsab mae ita mbe ifaen, u kyaenyang rishin-ba uwae uten wu, ama u mum kukwae tiyang sangkob uten wu, amaa, a u nde yi uwae rikaen.

²⁶ Isim asang mae ita mbe ifaen yi, a u wen ra ukwe ti a Tsitsab wu, awu u si-wu te iken iki be. Ama ande ti umbyi ukwe wu ti ku ba, u ba twenji uten wu ti Ukag ti sisaen wu. Ricwunnkyi-yi u pangma ambyi ti mbub shag. Rika u tā kaa sang ti kiye ti ricwunnkyi, ama uten wu u kuu ukaen pangma ti a sa tsi.

²⁷ Awu u yer unju ti kpakang te ande yang-ba uwae kutsáb kinjo, ama uwae kapam kutsáb wu, awu u byangkyi iken ti a ku yerwen na Rimam, ti rinyangwae ti a ku pu ba na Rimam. Awu u sa iken ti ku txiyib tsi uwae Ukag ti sisaen, ama u nda Ukag ti sisaen wu kú ukaen, se ti ricwunnkyi ti a sa tsi, a ba kumunn pu yi risu unde wune ti ku nda uten kú ukaen.”