Daniyel 7 - Kutsingken Ira Rimam ti Saen Kyag

Kurwa Daniyel Risu Ibye Anyi Inje

¹ Yi kusang ti tawe na Belishazar ukwe Babila, Daniyel sunn kurwa kiye ti awu nae kicwag, ama bae meme kurwa yi bae.

² Daniyel tsag baa, “Ame sunn kurwa utitang ti ufunn ru ukub inje utense ba ku kae ambyi yaenshag uwae uyinn tiyang.

³ Ama ibye anyi inje ti txi txi tsoye uwae uyinn atang ba.

⁴ “Ibye ti tawe ru itumu u site asae pangma ikwèn. Ti ame u nunung a kum pu asae-wu ayi ama ye wu nwunn tsi ritsen pangma unde, u sa ira ti kab unde sang na wu.

⁵ “Ama ti ame u nunung, ibye iki ti ifaen tsoye ti ru mbuku. Awu kú per iyenkyab kinjo u site akub ishi ibye ita ti fa sang anyi-wu. Ame fxen a ri te wu baa, ‘Nwunn ti fu kub ibye yang-yi.’

⁶ “Isim ayine, ame sae kyi ibye iki tsoye ti ru icwu u site asae inje isim-wu pangma asae kunung, ama si te risu inje. Ama a nda wu kuko risu iken meme.

⁷ “Isim ayine ame sae kyi uwae kurwa, ibye anyi ti inje ti ku ye ikyenricwu timambe. Awu kpag timambe u site anyi ikyabser ti ku kub mbub akub ibye jwog jwog, ama ku ceb pu ayi ti tsitsi fa afxen. Awu txi ra te itso ibye yi ti tsoye tawe-wu, ama site ishin rijwe.

⁸ “Ti ame ku kab ira risu ishin yi, ti m nunung ishin tikiyib iki mbug tsoye kutampwa-yi. Isim-yi, a sub ishin ita uwae-yi tsoye ti ipab-yi. Ishin tikiyib wune site ayib pangma ayib unde, ti unju ti ku ri ira uwae ijwe ti ndub.

Rikwén ti Pwen

⁹ “Ti ame sae, A pu atxom ukwe tā. Awu ti ta atang ti Kute, ba somtsa atang. Kutupwa-wu tsen porr pangma akóng, ikyinn ti risu-wu foong pangma itub ti tsen. Urwa ku cwe sangkob kutxomkwe-wu

¹⁰ Ajaen urwa ku ru ye uwog-wu pangma ambyi. Ande kumbub kumbub fen wu. Kumbub rijwe ka kumbub rijwe tsi uwe-wu. Ande ti ku pwen rikwen som ku ji ti a u yer rikwen. A mbubta atsingken uwe-ba.

¹¹ “Ama ame tsi ku sae ayib ikyaen ti, ishin wu ku ri ira ti ijwe ti ndub ti ribom. Ti ame u nunung, a wen ra ibye anyi wu u skiyer ibye rimenn-wu, ama pu yi ti a kaa twen mbub yi te urwa.

¹² Ibye ti tsitsi ama, a shir pu ajwokwe-ba ru, amaa, a ya ba ta som ti unyang ti a na ci ka uwe pang.

¹³ “Uwae ira ti kitam yi ti ame sae utitang wu, ame sae iken iki ti ru unde pìpìb sī uwae kubyi apupwen ku ba. Awu ru ba uwog Awu ti ta atang ti Kute

¹⁴ Ama a nda wu kuko, ti riyinn, ti kpakang ititae, ikyaen ti meme ande, ti mbukwen ande, ti unju uten unju uten, na kú riben na wu. Kuko-wu u tsi kukunn ru fife yi uwe u yafe-wu fe ama be. Kujwokwe-wu ama u twenji-yi ji be.

A Fxir Imbyi Kurwa Daniyel

¹⁵ “Kurwa ti ame Daniyel sunn ye m ikyenricwu u nda utob-m nae-wu riben be.

¹⁶ Ame ka tu kinjo uwae ande ba ti tsi atang, u rang wu ti awu na ri te m imbyi kurwa yine. Ama awu ri te m imbyi kurwa yi baa,

¹⁷ ‘Ibye anyi inje yine ku tso abikwe inje ti u nwunn uwae utense.

¹⁸ Amaa, ande ti saen kyag na Rimam ti skeb ti tag u tsokyi kujwokwe yine, ama u nae ukwe risu-yi ru fife yi uwe.’

¹⁹ “Tiri ame sha ti m na u nung kubenti ira risu ibye anyi ti inje wune ti txi ra te ayi ti tsitsi, ti ku ye ikyenricwu timambe, ti site anyi ikyabser ti akyikyin afxen bronzi, ti ku shiryae u ceb pu ibye ti tsitsi fa afxen-wu. Ti ame ku kab ira risu ishin yi, ti m nunung ishin tikiyib iki mbug tsoye kutampwa-yi. Isim-yi, a sub ishin ita uwae-yi tsoye ti ipab-yi. Ishin tikiyib wune site ayib pangma ayib unde, ti unju ti ku ri ira uwae ijwe ti ndub.

²⁰ Ame sha ti m nung kwer ti ira risu ishin rijwe yi ti ta risu-wu, fa ti awu ti mbug tsoye ti tishe titawe ita yine mbug ru, ishin wu ti site ayib ti unju ti ku ri ira te ijwe ti ndub, ama ti ame nung wu awu skeb tag ishin yine ti tsitsi.

²¹ Ti ame sae, ishin wune tā rika te ande ti saen kyag na Rimam u ci ba rika,

²² se kiye ti Awu ti ta atang ti Kute ka ba pwen rikwen ikyaen ande ti saen kyag ti si ana Rimam ti skeb ti tag, ama kiye wu ande ti saen kyag tsokyi kujwokwe wu.

²³ “Ira ti awu ri ta re. Ibye anyi ti inje wu ku tso baa, kujwokwe ti inje u ba tsoye uwae utense ti u txi ra te meme ajwokwe ti tsitsi. Kujwokwe wu u twenji meme utense, u ceb pu ba fa afxen.

²⁴ Ishin rijwe yine ku tso abikwe rijwe ti u ba tsoye uwae kujwokwe wune, ama ukwe iki u ba nwunn isim, ti u txirira te ayi ti ba kucang. Awu u waen abikwe ita uwae abikwe rijwe bane.

²⁵ Awu u rimbeb Rimam ti skeb ti tag, u nde ande-wu ti saen kyag rikaen, ama u kab ti wu kafe kiye ukwab-ba ti icwe-ba. Aba u ta kujwo-wu ka asang ita ti ripye.

²⁶ “Amaa, ande ti ku pwen rikwen u pwen wu rikwen, ama mbe ra kuko-wu kaa twenji.

²⁷ Ama a u sa kujwokwe, ti kuko, ti rurob ajwokwe ti ta utense meme na ande ti saen kyag na Rimam ti skeb ti tag. Kujwokwe-ba u si kujwokwe ti tsi kukunn ru fife yi uwe. Ama meme ande ti uwe u ba ku riben u fen ba.

²⁸ “Nee uwog ti kurwa-m ayi tsikunn atang. Yi uwog ti ana-m Daniyel, ira ti kab-m nda m ikyenricwu timambe, kutxuwe-m yirkyi, amaa, ame sa ira yi tsi ti utob-m.”