Daniyel 6 - Kutsingken Ira Rimam ti Saen Kyag

A Ye Daniyel Jwunn Sang Rukug Itumu

¹ Ayi nyang uwae Dariyusi ti wu tsab ande ukob kinjo mbe rikom ti a na ta risu uten uten ti ta yi kujwokwe-wu.

² Awu tsab ande ita ti u ta risu-ba. Daniyel si kinjo uwae ande ita bane. Ande ba ti ta risu uten uten yine u ba ri te ba iken ti ku kyang ikyin ajwokwe-ba, ti ayi ā shir itijwunnsi na-yi ukwe be.

³ Ama kujwo wande Daniyel tsi txi ra te wande ande ba ti tsitsi, ikyaen ti, awu site kusung iki ti nyang timambe. Ama ukwe kab ti wu na u sa Daniyel ta risu meme kujwokwe wu.

⁴ Ikyaen yine, ande ti uwe aba sha fengo ti a u tu Daniyel te riraen yi uwog wande-wu ti a u ri ira titibi risu-wu, amaa, aba tu-ba ira iki ti a u sa kujwo kutsa atang u rimbeb wu be, ikyaen ti, awu si unde ti ku nde wande-wu uwae kubenti ama ande tu-ba awu te riraen iki be.

⁵ Tiri, ande ba ri tetso baa, “Fengo iki ta-wu ti ati u sa kujwo kutsa atang u rimbeb Daniyel be, se iken ti a ren te icwe Rimam ti awu ku fen.”

⁶ Tiri ande ti uwe ba yer unju tetso u ba uwog ukwe ama ri baa, “Ukwe Dariyusi, unyang-fu ā ko ra ru yi uwe!

⁷ Meme ande ti uwe ti uwe ti ku nde wande yi kujwokwe-fu, ti akwe rika, ti ande ti uwe na uten, ti ande ti ku myae ira, ti gomna gomna meme cwe pu ba ti ukwe na sa icwe ruye baa, asiti unde a jwam itijwam uwog apxin iki, ko unde iki ti si-yi afu be uwae usir rijweta ti ku ba, a na ye wu jwunn sang rukug itumu.

⁸ Tine ukwe, bae icwe ruye ti fu kwa kujwo atang ti a u fi-ba yi fi be, putswa icwe Mede ti Pasiya.”

⁹ Ikyaen yine, ukwe Dariyusi bae kutsingken icwe wu ruye u kwa kujwo atang.

¹⁰ Kiye ti Daniyel nungye baa, a na bae icwe na u kwa pu ba kujwo atang, awu ru kununn-wu u ka sang kusog-wu iki ti kiye kusog wu mbubta rukwer uwe ti Urushelima. Awu ka ku riben u jwam Rimam, ama tso fxaefa na Rimam atsepu ita uwae usir pangma ti awu ku nde kob.

¹¹ Tiri ande ba ti yer unju ti a kaa yer afxen Daniyel ne ba tu wu, awu ta uwae Rimam ti ti jwam ku sha itindeya uwog Rimam.

¹² Ama aba ka tu ukwe u rang wu ira risu icwe yi ti awu bae baa, “Ukwe, afu kwa-fu kujwo u sa icwe ruye baa, uwae usir rijweta ti ku ba, unde iki na ku-wu riben na apxin ko unde iki fa fu ukwe be, be a na u ye wu jwunn sang rukug itumu be a.” Ukwe cwe ba unju baa, “Een icwe yi tsi ti atang, putswa icwe na Medesi ti Pasiya ti ku kafe-yi fe be.”

¹³ Ama aba ri te ukwe baa, “Daniyel, kinjo uwae Mbayawuda, ti a ye ba apyi ru ba ike, nae-wu risu riben te fu ukwe be, u ku putswa-wu icwe-fu be. Awu ku jwam bwe itijwam atsepu ita uwae usir.”

¹⁴ Ama kiye ti ukwe fxen ira yine, utob-wu nae-wu riben be. Awu kwab fengo ti wu nwangruye Daniyel. Awu kwab itikwab yi ti kiskinn ti kiskinn pu usir sunn.

¹⁵ Tiri ande ba pu atso ba tu ukwe baa, “Afu nung ti icwe Medesi ti Pasiya ri baa, icwe ti ukwe a bae u kwa pu wu kujwo atang, a ku fi-ba yi fi be.”

¹⁶ Ama ukwe nda unju, a ka ye Daniyel ba jwunn sang rukug itumu. Ukwe ri te Daniyel baa, “Rimam ti afu ku fen ā nwangruye fu.”

¹⁷ Ama a kaen kutxom ba cwunn unju rukug itumu wu. Ama ukwe ti afaen-wu kwa kujwo ikyaen ti unde iki na nwangruye-wu Daniyel be.

Itumu Tekunn-yi Daniyel Be

¹⁸ Tiri ukwe kafe ru yi fenkyi-wu. Awu ci-wu be u ngwa-wu be. Utob-wu ndembeb, kicwag ama pyir-wu ayib.

¹⁹ Ti ucwe fam ku si, ukwe nwunn u ru ti ritsen yi uwog itumu atang.

²⁰ Kiye ti awu ba fer rukug itumu ti Daniyel ta atang, awu kunn ira ti ribom baa, “Daniyel, afu ti ku fen Rimam ti site unyang, Rimam-fu ti afu ku fen kob né sa ruye pu wu afu unju itumu a.”

²¹ Ama Daniyel cwe baa, “Ukwe, unyang-fu ā ko ra ru yi uwe!

²² Rimam-m tom atom-wu ti apupwen si ba kwerkyi unju itumu yi ama ayi kub-yi ame be. Ikyaen ti, yi uwe Rimam, ame raen-m awu ira iki be, u nde-m afu ukwe ira titibi iki be ama.”

²³ Ama utob ukwe tsen timambe. Awu nda unju ti a na pu Daniyel ruye rukug itumu atang. Ama a pu Daniyel ruye. Ribang iki mbog-yi awu ijwe be, ikyaen ti, awu ru kubenti uwog Rimam.

²⁴ Ama ukwe nda unju, a pu ande ba ti yer unju u ri ira titibi risu Daniyel, aba ti anyisu-ba ti awa-ba, jwunn sang rukug itumu. Itumu yi ye ba shiryae ti apupwen, ti ti afxen-ba ka-yi riben be, ama kub mbub tag akub-ba jwog jwog jwog.

²⁵ Ama ukwe Dariyusi bae atsingken shag kyife ambukwen ande ti unju uten uten ti ta utense baa, “Kujimshwur ā si ana-ni.

²⁶ “Ame sa icwe tsi pu m uwae kujwokwe-m ti ko aye ā kyen ikyenricwu Rimam Daniyel, u fen wu. “Ikyaen ti, awu si Rimam na unyang, u tsi kukunn ru fife yi uwe. Kujwokwe-wu u twenji-wu ji ama be, Kuko-wu ama u tsi kukunn ru fife yi uwe.

²⁷ Awu ku nwangru, ku sa ruye unde. Awu ku nde iken ti ku fur ayib yi apupwen ti utense ike, awu ti nwangruye Daniyel yi unju itumu.”

²⁸ Ama Daniyel tu risu ti tinyang uwe ukwe Dariyusi ba sang ti kiye ukwe Saerus na Pasiya.