Daniyel 5 - Kutsingken Ira Rimam ti Saen Kyag

Iken ti A Bae Ru Kupwe

¹ Usir iki ukwe Belishazar nde ukwab tiyang ama yae ande-wu ti rurob kumbub kinjo, ama te ba ngwa ambyi anam tetso.

² Kiye ti Belishazar ngwa kyaen ambyi anam-wu, awu nda unju ti a na ka pu ruye isu zinariya ti azurfa ti itse-wu Nebukanezar pu kusog Rimam tiyang yi Urushelima ba, ti awu ukwe na ti ande-wu ti rurob, ti awa-wu ti kununn, ti isā-wu na u ngwa ambyi atang.

³ Tiri a ka pu isu zinariya yi ba, ama ukwe, ti ande-wu ti rurob aba, ti awa-wu ti kununn, ti isā-wu ngwa ambyi anam atang.

⁴ Aba ngwa ambyi anam yi ama teb rinyi apxin yi ti a kwén yi te zinariya, ti azurfa, ti bronzi, ti ikyabser, ti ayi ti a pab yi te kutuku ti kutxom.

⁵ Ti a u nunung, kukyikyin kujwo unde tsoye ku bae iken ru kupwe yi fikyi ukwe atang ru kwer uwog ti fitila tsi atang. Ama ukwe sae kujwo wu kiye ti kujwo wu ku bae iken yi.

⁶ Tiri kutxuwe ukwe kafe utso iki txi, ikyenricwu ye wu, afxen-wu ku se ise ku gigigag, tijing-wu nam mbeb.

⁷ Ukwe nda unju ti kpakang ti a na kunn funn tag ande ti ipwen, ti ande ti ku ri imbyi ira, ti ande ti ku sae ayib. Ukwe ri te ande ti ben ayib ba ti ta uwae Babila baa, “Unde ti a nung putswa tu iken ti bae yine u ri tu imbyi-yi te m, a u pu kutupwa ti ru itibyaen si wu, u tā wu asuwa zinariya ukwae, ama u nda wu kafe unde ti kotub ukwe ti ita uwae kujwokwe wune.”

⁸ Kiye ti ande ti ben ayib ba sang ba fe, aba nung putsa tu-ba iken ti bae yi be, ama nda tu-ba imbyi ira yi be.

⁹ Tiri ikyenricwu ye ukwe Belishazar, kutxuwe-wu kafe itso iki txi cwucwo ti nda ande-wu ti rurob uwog ukwab atang kyirunn.

¹⁰ Ti iya ukwe fxen ufxenjwin ukwe ti ande-wu ti rurob ba, awu sang ba uwog ukwab atang u ri baa, “Ukwe, unyang-fu ā ko ra ru yi uwe! Ndembeb-fu utob be. Yirkyi-fu kutxuwe-fu kyi be.

¹¹ Unde iki ta atang yi kujwokwe-fu ti site kusung apxin ti sisaen kiye ti itse-fu si ukwe. Unde wu site itinungye ti itsab pangma ayi na ru uwog Rimam ba. Ama itse-fu ukwe Nebukanezar nda wu ta risu meme ande ti ipwen, ti ande ti ben ayib.

¹² Awu site kusung iki ti nyang timambe, ti itinungye, ti itsab ti ku ri tu imbyi kurwa, ti ira ti rang ti rimang meme. Ande ku tu imbyi ira-ba uwog Daniyel wune ti ukwe fwa wu rinyi baa, Beteshazar. Kunn wu ba, awu u ri te fu imbyi ira yi.”

¹³ Ama a ka pu Daniyel ba uwe ukwe, ama ukwe rang Daniyel baa, “Afu ti si Daniyel kinjo uwae Mbayawuda ti itse-m ukwe ye ba apyi ru Yawuda ba a.

¹⁴ Ame fxen iten ira-fu baa, afu na site kusung Rimam, ti itinungye, ti itsab, ama u ben ayib timambe.

¹⁵ A pu ande ti ben ayib ti ande ti ipwen ba uwe-m ti a na nung putsa ira yi ti a bae ne, ti a na ri te m imbyi-yi, amaa, aba ri tu-ba imbyi-yi be.

¹⁶ Amaa, ame fxen ti afu na ku ri tu imbyi ira, ama ande na ku tu imbyi ira uwog-fu. Nung! Afu a nung putsa ira yine u ri tu imbyi-yi na m, a u sī na fu kutupwa ti ru itibyaen, u pu asuwa zinariya tā fu ukwae, ama u sa fu kafe kotub ukwe ti ita uwae kujwokwe wune.”

¹⁷ Daniyel ri te ukwe baa, “Ame ku sha-m rinyangwae-fu be. Pu yi na-fu unde iki. Amaa, ame u nung putsa ira yi ti a bae ne na fu ukwe, u ri te fu imbyi-yi.

¹⁸ “Fxen, ukwe, Rimam ti Skeb ti tag nda itse-fu Nebukanezar nae ukwe u site kpakang, ti rurob, ti riyinn.

¹⁹ Ikyaen rurob ti Rimam nda wu, meme ande, ti ambukwen ande, ti unju uten uten ku kyen ikyenricwu-wu. Awu ku wen unde ti awu ku sha, ku ya unde ti awu ku sha ti wu na tsi user ta ti unyang. Awu ku ye tso unde ti awu ku sha, u ku ko si unde ti awu ku sha ama.

²⁰ Amaa, kiye ti ijwe ti ndub sang ba yirkyi utob-wu, a waen wu ukwe, awu si-wu te riyinn cwucwo be.

²¹ A rwae wu ruye kutampwa ande ama nda ira ti kab-wu kafe ana ibye. Awu ka som te ikyinnsu ti kutur, ku kub irum pangma indag. Ijwe-wu sib tag te imenn ti ku sur, se kiye ti awu nungye baa, Rimam ti Skeb ti tag ti na nae ukwe risu meme kujwokwe ti ta uwae utense, ama na ku sa yi na unde ti awu ku sha.

²² “Afu umbae-wu Belishazar ama nung tag ira yine u sa risu-fu si-fu riben be,

²³ ama ku myae risu-fu te Rimam ti ta apupwen, u ka pu isu ti si ana kusog Rimam ba ngwa ambyi anam atang, afu, ti afaen-fu, ti awa-fu ti kununn ti ti isā-fu meme. Afu teb apxin ti a kwén yi te zinariya, ti azurfa, ti bronzi, ti ikyabser, ti apxin ti a pab yi te kutuku fa ti kutxom ti ku sae-yi uwog be, ku fxen-yi ira be, ku nung-yi ira iki be. Amaa, awu Rimam ti unyang-fu ti wande-fu meme ta kujwo-wu, afu nda-fu awu rurob be.

²⁴ Ikyaen yine, Rimam nda kujwo ru ba bae iken yine.

²⁵ “Iken yi ti a bae si ta re: MENE, MENE, TEKEL, PARSIN

²⁶ Imbyi ira yine ta re: MENE ku tso baa, Rimam na pwen tag pu wu usir kujwokwe-fu ama sa wu ba pu wu ricwunnkyi.

²⁷ TEKEL ku tso baa, a na myae pu ba afu yi kitu kumyae, ama afu munn-fu be.

²⁸ PERES ku tso baa, kujwokwe-fu na kata pu wu ifaen, kujwokyab kinjo a nda Mede, kujwokyab ti ifaen ama si ana Pasiya.”

²⁹ Ama Belishazar nda unju, a pu kutupwa ti ru itibyaen ba si Daniyel, u tā wu asuwa ana zinariya ukwae, ama ya iskin baa, Daniyel na kafe pu wu kotub ukwe ti ita uwae kujwokwe wune.

³⁰ Ti utitang usir wu, a yerwen Belishazar ukwe ande ti Babila.

³¹ Ama Dariyusi unde ti Mede tsokyi ukwe kiye ti awu site asang mae ita mbe ifaen.