Daniyel 4 - Kutsingken Ira Rimam ti Saen Kyag

Nebukanezar Teb Rinyi Rimam

¹ Ira ti ru uwog ukwe Nebukanezar ba uwog meme ande, ti ambukwen ande, ti unju uten uten ti ta utense ta re. Kujimshwur-ni ā ko ra fufa.

² Ayi nyang uwae-m ti m u ri te ni iken ti ku fur ayib ti Rimam ti skeb ti tag tatso m.

³ Iken ti ku fur ayib ti awu ku tatso m ko timambe. Iken ti ku fur ayib-wu ti awu ku nde kpag timambe. Kujwokwe-wu si kujwokwe ti tsi yiyer. Awu ti ta risu utense ru fife yi uwe.

Kurwa Nebukanezar ti Ifaen

⁴ Ame ukwe Nebukanezar, uwae usom ti som na ukwe-m yi fikyi ukwe, ame site utob ti nae riben u shanum-m iken iki be.

⁵ Amaa, ame ba sunn kurwa iki ti ye m ikyenricwu. Iken ti ame sae uwae kurwa yi nda utob-m nae-wu riben be.

⁶ Ikyaen yine, ame nda unju ti a na kunn funn tag ande ti ben ayib ti ta uwae Babila ti a na ri te m imbyi kurwa yi.

⁷ Ama ande ti ipwen, ti ande ti ben ayib, ti ande ti ku sae ayib, ti ande ti ku ri imbyi kurwa ba ru ba funn, ama ame pwen kurwa yi te ba, amaa, aba ri tu te-ba ame imbyi kurwa yi be.

⁸ Isim-yi, Daniyel, ti ame fwa wu rinyi baa Beteshazar, rinyi apxin-m, awu ti site kusung apxin ti sisaen, sang ba, ama ame tsag kurwa yi te wu.

⁹ Ame ri baa, “Beteshazar, unde ti uwe ande ti ipwen, ame nung afu site kusung apxin ti sisaen ama ira ti kitam iki ta-yi ti kpag skeb fu skeb be. Tsag te m kurwa yi ti ame sunn, ti imbyi-yi ama.

¹⁰ Ame sunn kurwa. Ama uwae kurwa yi ame sae kutuku tiyang iki tsi kutampwa utense.

¹¹ Ama kutuku wu tso u kpag, rikob-wu tso ka tekunn apwa apupwen. Ko aka uwae utense ku sae kutuku wu.

¹² Kutuku wu shab atsing nyang, u waen timambe ti ko aye ci. Ibye kutur ku pu unyang yi uwum kutuku wu, inung ama kyae afug yi ajwo kutuku wu. Meme iken ti site unyang ba ku ci awaen-wu.

¹³ “Ti uwae kurwa wu ame sae atom ti saen kyag si apupwen ba.

¹⁴ “Awu ri tso te afxenjwin tiyang baa, ‘Ni tur kutuku wu si riben ti ni pye tag ajwo-wu, ti ni waen atsing-wu, ti ni pu awaen-wu jwunnshag jwunnshag, ti ibye kutur ti nae imbyi kutuku wu ā ter shag, anung ti nae ajwo-wu ama ā yaenshag.

¹⁵ Amaa, yá ukum imbyi-wu ta ti riben atang ti irum ā shab pakob wu. Fae pakob wu te ikyabser ti bronzi uwae irum atang. “ ‘Imenn ā sur fa wu atang, ti awu ā tsi fa te ibye kutur uwae irum atang.

¹⁶ “ ‘Uwae asang itsongfaen, utob-wu u si-yi ana unde be, a u kafe utob-wu ba utob ibye kutur.

¹⁷ “ ‘Ira yi ti a ri ne ru uwog atom wu ti apupwen ba. Awu atom wu ti saen kyag wu ti ri baa, iken yine u nde ikyaen ti meme ande ā nungye baa, Rimam ti skeb ti tag ti na ta risu meme kujwokwe ti ta utense. Awu u ndeye ti wu fxaembe yi u nda unde ti awu ku sha, unde ti nae risu riben uwog-wu.’

¹⁸ “Beteshazar, ayine si kurwa ti ame ukwe Nebukanezar sunn. Tsag te m imbyi kurwa yi, ikyaen ti, meme ande ti ben ayib ti ta kujwokwe-m ri tu-ba imbyi-yi te m be. Amaa, afu u ri tu ikyaen ti, kusung apxin ti sisaen te fu ta tetso.”

Daniyel Tsag Imbyi Kurwa ti Ifaen te Ukwe

¹⁹ Tiri Daniyel, ti rinyi-wu iki si Beteshazar, kùnn unyang, ama ira ti kab-wu nda wu ikyenricwu. Ama ukwe ri te wu baa, “Beteshazar, kurwa yi ko imbyi-yi ā kùnn-yi afu unyang be.” Amaa, Beteshazar wu cwe baa, “Itsekuru-m, kurwa yi ā tso risu ande ti tsi ukub te fu, imbyi-yi ama ā tso risu ande rika-fu.

²⁰ “Kutuku wu ti afu sae awu ser tso u kpag, ti rikob-wu ka tekunn apwa apupwen, ti meme ande utense sae wu,

²¹ ti atsing-wu shab nyang, ti awu waen timambe, ti ko aye ba ci wu, ibye kutur ku pu unyang imbyi-wu, inung ama kyae afug-yi yi ajwo kutuku wu.

²² Kutuku wu si afu ukwe ti tso u site pu fu rurob, ti iten rurob-fu ayi tso ka sang pu yi ti apwa apupwen, ama kujwokwe-fu shag kyife utense.

²³ “Ama afu ukwe sae atom ti saen kyag si apupwen ba u ri baa, ‘Tur kutuku wu si ti fu twenji wu, amaa, yá ukum imbyi-wu ta ti riben atang, ti irum ā shab pakob wu. Fae pakob wu te ikyabser ti bronzi uwae irum atang. Imenn ā sur fa wu atang, ti awu ā tsi fa ibye kutur, se asang itsongfaen a nyatsa pu yi titawe.’

²⁴ “Ukwe, imbyi kurwa wu ta re. Ira wune ru uwog Rimam ti skeb ti tag ba risu itsekuru-m ukwe

²⁵ baa, a na u rwae fu nwunn kutampwa ande kaa som te ibye uwae kutur. Afu u ka kub irum pangma indag, imenn ama u sur fa fu ka asang itsongfaen, se kiye ti afu a nungye baa, Rimam ti skeb ti tag na site kuko risu kujwokwe ande uwae utense, awu ama na ku sa yi na unde ti awu ku sha.

²⁶ Pangma ti a nda unju ti a na yá ukum imbyi kutuku wu ta te ipab-wu, ayine ku tso baa, kujwokwe-fu, a u sa kafe na fu ti atang kiye ti afu a nungye pu fu baa, Rimam na site kuko risu meme iken titawe.

²⁷ Ikyaen yine ukwe, ame ku jwam fu, paembe kumyae-m ayine, fxae ikentitibi-fu ti ti nde, ti fu nde iken ti pang atang, u sae ande ti afu ku sir ba sir te ayibrisi, ikibe afu u ci ko ka uwe.”

Kurwa Ukwe yi Ba Kumunn

²⁸ Meme iken yine ba nde te ukwe Nebukanezar.

²⁹ Isim ushaen rijwe asu ifaen, ukwe nwunn ku kyang pakob rukub kusog-wu yi Babila,

³⁰ Awu ri te ijwe-wu baa, “Awune si-wu Babila, uten tiyang wu ti ame mbye uwae rurob-m ti wu na si kuru ukwe ti ku tatso riyinn na kujwokwe-m be a.”

³¹ Ti ti awu ta ti uwae ira yi ti ti ri, afxenjwin si apupwen ba baa, “Nung! Ukwe Nebukanezar, ira wune ba uwog-fu baa, a na waen pu ba afu ukwe,

³² ama a u rwae fu nwunn kutampwa ande u kaa som te ibye uwae kutur. Afu u ka kub irum pangma indag ka asang itsongfaen, se kiye ti afu a nungye pu fu baa, Rimam ti skeb ti tag na ta risu kujwokwe ande uwae utense, ama na ku sa yi na unde ti awu ku sha.”

³³ Ti ritsen, ira yine kumunn risu Nebukanezar. A rwae wu nwunn kutampwa ande. Awu ru ka kub irum pangma indag. Rimenn ijwe-wu sib tag te imenn, asing ti ijwe-wu wae pangma asing ikwèn, afob ajwo-wu ti afxen-wu ama wae pangma ana inung.

³⁴ Isim asang itsongfaen yi, ame Nebukanezar pu ayib sae tso apupwen, ama ira ti kab-m kafe ba ti atang. Ame teb Rimam ti skeb ti tag, u teb wu, u nda wu kuko, ikyaen ti, awu ti nae ukwe ru fe yi uwe. Kujwokwe-wu ama tsi yiyer, ru fife yi utso ti ku ba uwe.

³⁵ Meme ande utense si-ba iken iki uwog-wu be. Awu ku nde iken ti awu ku sha kutampwa atom ti apupwen, ti kutampwa ande ti ta uwae utense ike. Unde iki ta-wu ti u tso wu kujwo unju be, ko ti awu u rang wu baa, “Imi ti afu nde ne?”

³⁶ Ti kiye wu, ira ti kab-m kafe ba ti atang, riyinn kujwokwe-m, ti rurob na kujwokwe-m meme kafe ba ti uwog-m. Ande ti ku nda m kumyae, ti afaen-m, sha kyae m u ye m tso ti kutxomkwe-m. Ama ame tu rurob kujwokwe-m skeb ti kucang.

³⁷ Kiye wu, ame Nebukanezar teb rinyi Ukwe ti apupwen. Ame ye tso u nda rinyi-wu kuko ikyaen ti, meme wande-wu si iken ti pang atang, fengo-wu ama si kubenti. Ande ti ku ndub risu, awu ku ye si ba.