Daniyel 3 - Kutsingken Ira Rimam ti Saen Kyag

Iken ti Nebukanezar Kwén Tsi

¹ Ukwe Nebukanezar kwén iken iki te zinariya ti rikob-wu ti tso ritsen si kutun kujwo mae ita, riyaen-wu ama si afxen itsongnje. Awu kyae wu tsi yi itab iki ti ta uten Dura yi Babila.

² Ama ukwe Nebukanezar wu kunn funn tag ande ti rurob, ti afaen, ti gomna gomna, ti ande ti ku nda ukwe kumyae, ti ande ti ku ye su aser, ti ande ti ku pwen rikwen, ti ande ti ku nde wande yi kusog rikwén, ti meme ande ti uwe ti uwe yi uten uten-wu ti a na ba yerkob iken wu ti Nebukanezar kwén tsi.

³ Ama meme ande ba ba funn uwe iken wu ti Nebukanezar kwén tsi ikyaen ti a u yerkob wu.

⁴ Unde ti ku ya iskin ukwe ri ira te ufxenjwin ti kpakang baa, “A nda ni unju, ani ande ti mbukwen mbukwen, ti unju uten uten baa,

⁵ kiye ti ani a fxen a kunn kutumu, ti rijwaen, ti ripwaa, u byinn jita, ti wayae, ti guge, ti isu ti tso tso, ni si kú riben ti ni fen iken wu ti ukwe Nebukanezar kwén tsi.

⁶ Unde ti a fen-wu iken wu be, a u ye wu jwunn sang uwae uvum urwa.”

⁷ Ikyaen yine, kiye ti aba fxen ti a kunn kutumu, ti rijwaen, ti ripwaa, u byinn jita, ti wayae, ti guge, ti isu ti tso tso, ande ti mbukwen mbukwen meme, ti unju uten uten meme, ku riben u fen iken wu ti ukwe Nebukanezar kwén tsi.

⁸ Kiye wu ariki uwae ande ti Babila ru ba ri ndembeb rinyi Mbayawuda.

⁹ Aba ri te ukwe Nebukanezar baa, “Ukwe, unyang-fu ā ko ra ru yi uwe!

¹⁰ Afu ukwe nda unju baa, unde ti na a fxen kutumu, ti rijwaen, ti ripwaa ti a kunn, ama fxen jita, ti wayae, ti guge, ti isu ti tso tso ti a byinn, a na ku riben u fen kang iken wu ti afu kwén te zinariya tsi.

¹¹ Ama unde ti a ku-wu riben u fen iken wu be, a u ye wu jwunn sang uwae uvum urwa.

¹² Mbayawuda ba ti afu pu ta risu wande yi uten Babila, aba Shadirag, ti Meshag, ti Abenego naa atong fxen-ba afu be. Aba fen-ba apxin-fu be, u ku riben na-ba iken wu ti afu kwén tsi be.”

¹³ Tiri, uwae rinae, Nebukanezar nda unju ti a na pu Shadirag ti Meshag ti Abenego na ba. Ama a pu ba ba uwe ukwe.

¹⁴ Nebukanezar rang ba baa, “Ayi si kubenti ti ani Shadirag ti Meshag ti Abenego ku-ni riben u fen apxin-m ti apxin zinariya ti m mbye tsi be ané?

¹⁵ To, kiye ti ani a fxen, a kunn kutumu, ti rijwaen, ti ripwaa, ti kiye ti a byinn jita, ti wayae, ti guge ti isu ti tso tso, ni ku riben ti ni fen iken wu. Amaa, asiti ani a shaen-ni, a u ye ni jwunn sang uwae uvum urwa, ti ame u nung baa, apxin titini ti u nwangruye ni kujwo-m.”

¹⁶ Ama Shadirag, ti Meshag ti Abenego cwe wu unju baa, “Ukwe Nebukanezar, ati site-ti ira iki ti ati u ri te fu risu ira yine be.

¹⁷ Asiti a pu ti jwunn sang uwae urwa, Rimam ti ati ku fen u nwangruye tu ti uwae urwa atang, ti uwae kujwo-fu.

¹⁸ Amaa, asiti awu a u nwangruye-wu ati be, ukwe ā nung baa, ati na u ku riben fen-ti iken ti afu ukwe kwen te zinariya tsi be.”

¹⁹ Nebukanezar ndembeb utob u ye uwe shirkyi shirkyi te Shadirag, ti Meshag, ti Abenego. Awu nda unju ti a na kyae urwa wu byag skeb ti kucang atsepu itsongfaen.

²⁰ Ama awu nda ariki ti kpag siskeb uwae akyirten-wu ti a na cwang Shadirag, ti Meshag ti Abenego, ti a na ye ba jwunn sang uwae urwa wu atang.

²¹ A cwang ba renfa te arun ti a sī, ti atupwa ti a tso imbyi-ba, ti kubur risu-ba, ti atupwa-ba ti tsitsi ijwe-ba, ama ye ba jwunn sang uwae urwa wu.

²² Ikyaen rinae ti ukwe tso u nda a kyae urwa wu byag timambe, iyam urwa wu twen wen akyirten ti ye Shadirag, ti Meshag, ti Abenego jwunn sang uwae urwa wu.

²³ A cwang Shadirag, ti Meshag ti Abenego jwunn sang uwae uvum urwa atang.

²⁴ Tiri ayib fur ukwe Nebukanezar, awu nwunn ti ritsen u rang ande ti ku nda wu kumyae baa, “Aba si-ba ande ita ti ati cwang ba jwunn sang uwae uvum urwa wu be a.” Aba cwe u ri te ukwe baa, “Een, ukwe.”

²⁵ Ukwe ri baa, “Nung! Ame sae ande inje ti ku kyang uwae urwa atang, iken iki nde-yi aba be. Unde ti inje-ba pangma umbae apxin.”

²⁶ Nebukanezar ko ba fer ufu kusog urwa wu u kunn ira baa, “Shadirag, ti Meshag, ti Abenego, ani apyi Rimam ti skeb ti tag, ni ruye ti ni ba ike.” Ama aba ruye uwae urwa atang.

²⁷ Ama ande ti rurob, ti afaen, ti gomna gomna, ti ande ti ku nda ukwe kumyae ba byir u sae ande ita ba, urwa fum-yi apwa ijwe-ba be, ikyinn risu-ba fum-yi fum be, atupwa-ba twen-yi twen be, ijwe-ba ama nung-yi ishing be.

²⁸ Nebukanezar ri baa, “Ititeb ā si ana Rimam Shadirag, ti Meshag, ti Abenego ti tom atom-wu ti apupwen ba nwangruye apyi-wu ti ru kubenti uwog-wu. Aba nyatsa icwe ukwe, u cwe iticwu u ku riben fen-ba iken iki fa Rimam-ba be, nyáng Rimam amam.

²⁹ Ikyaen yine, tine, ame sa icwe tsi baa, unde iki, ko uten iki, ko unju uten iki ti a ri mbeb Rimam Shadirag, ti Meshag ti Abenego, a u kum ajwo-wu ti afxen-wu, u mbub kusog-wu si riben, ikyaen ti, apxin iki ta-wu ti u nwangru unde yi fengo yine be.”

³⁰ Tiri ukwe ko rurob Shadirag, ti Meshag ti Abenego tso uwae uten ti Babila.