Daniyel 12 - Kutsingken Ira Rimam ti Saen Kyag

Kiye ti Ricwunnkyi

¹ “Kiye wu Mikayel, unde ti uwe atom ti apupwen ti ku nungkyi ande-fu, u nwunn. Ayi u si kiye rikaen tí ngwa, itso rikaen ti tu ji-yi ande ti ti uten wu bag be. Amaa, kiye wu, ande-fu u tu itinwangru, ko aye ti rinyi-wu baesi uwae kutsingken.

² Ama ande yang-ba akwen ti cwu pu ba u nwunn uwae kuskab, ariki u tu unyang ti tsi kukunn, ariki ama u tu rikwae ti wae ti tsi kukunn.

³ Ande ti ben ayib u jae pangma apwa apupwen. Ande ti pu ande yang-ba ru ba fengo ti kubenti ama u jae pangma aswer ru fife yi uwe.

⁴ Amaa, afu Daniyel, ye su ira yine cwucwe uwae utob-fu, ti fu burkyi kutsingken wu se kiye ti ricwunnkyi a ba pu wu. Kiye wu, ande yang-ba akwen u ter tsutso ter sisi, ku sha ti itinungye-ba a ko fufa.”

⁵ Tiri ame Daniyel sae u nung ande ifaen iki tsi. Kinjo tsi unju uyinn iyen ike, ti ifaen ama tsi unju uyinn iyen akwen.

⁶ Kinjo uwae-ba rang unde ti sī kutupwa ti tsen ti tsi risu ambyi baa, “Iken ti ku fur ayib yine u ba kumunn isinn?”

⁷ Ama ame fxen unde ti sī kutupwa ti tsen wu pu meme ajwo-wu tso apupwen u ben Rimam ti tsi kukunn baa, ayi na u nde ka asang ita ti ripye. Iken yi u kumunn kiye ti rikaen ti a ku nde ande ti sisaen a ta-yi cwucwo be.

⁸ Ame fxen ira yine ama nungye-m imbyi-yi be. Tiri ame rang baa, “Itsekuru-m, ricwunnkyi iken yine u ba si rimang?”

⁹ Awu ri baa, “Ru-fu iken-fu Daniyel, ikyaen ti, ira yine tam-yi tam se usir ti ricwunnkyi.

¹⁰ Ande yang-ba u som sisaen u site-ba ajib iki be, u kyaenyang ijwe-ba nyinyang. Amaa ande titibi u tsi kukunn te itibi ti ti nde. Ko unde iki uwae-ba u si-wu te itinungye be, amaa, ande ti ben ayib u site itinungye.

¹¹ “Ayi u ka usir kumbub kinjo ti ukob ifaen ti mae inje mbe rijwe (1,290) isim-yi ti a byangkyi pu ba iken ti twen yi kusog Rimam, ama pu iken ti ku txiyib sang ba tsi pu ba.

¹² Itinyang si ana unde ti ye utob ba sang ricwunnkyi usir kumbub kinjo ti ukob ita mbe rijweta asu itsong (1,335).

¹³ “Amaa, ana-fu Daniyel, ru-fu iken-fu se usir ti ricwunnkyi. Afu u cwu, a u kunn nwunn fu u nda fu kujwojang.”