Daniyel 11 - Kutsingken Ira Rimam ti Saen Kyag

¹ Uwae kusang ti tawe ana Dariyusi urae Mede, ame nwunn ti m ri kpag wu utob, ama u tsi ya wu.

Abikwe ti Isku ti Abikwe ti Isi

² “Tine ame u ri te fu kubenti. Nung! Abikwe ita u nwunn uwae Pasiya ama ukwe ti inje u ba nwunn u site rifunn skeb tag abikwe bane meme. Ama kiye ti awu a kafe pu wu ukwe ti kpag timambe ikyaen rifunn-wu yine, awu u nda ande meme tā rika te kujwokwe ana Grisi.

³ Tiri ukwe iki ti kpag timambe u nwunn ama kujwokwe wu u ko timambe. Awu u nde iken ti nyang uwae-wu.

⁴ Kiye ti awu a nwunn pu wu, kujwokwe-wu u kata ka aru inje, amaa, ayi u si-yi rishi-wu ti u ta risu-yi be. Ayi ama u si-yi pangma kiye ti awu ta risu-yi be, ikyaen ti, a u waen ra kujwokwe-wu u nda ariki.

⁵ “Tiri ukwe ti kujwo isi u ba kpag, amaa kinjo uwae ukwe rika-wu u ba kpag skeb wu, u ta risu-ba.

⁶ Isim asang iki, ukwe ti kujwo isi ti ukwe ti kujwo isku u si unju tetso. Awu ukwe ti kujwo isi wu u pu umbae-wu ti unda baen ukwe ti kujwo isku ikyaen ti unju-ba na ru uwog kinjo. Amaa, unda wu ti itse-wu meme u si-ba te kpakang uwe ukwe ti isku be, amaa, a u wen wu, ti anyisu ti som te wu, ti umbae-wu, ti ubaen-wu uwae kiye wu.

⁷ “Isim-yi, rishi unda wu iki u tsokyi kutxomkwe ti kujwo isi. Awu u pu akyirten ba byinn mbub kupwe uten ukwe ti isku, ama u sang kaa ci ra wu.

⁸ Awu u ye pu apxin-ba ti a kwen yi te ikyabser, u tsab isu ti tinyang ti a kwen yi te azurfa ti zinariya, u pu yi ru yi uten Ejib. Isim yine, awu u ya ukwe ti kujwo isku ta, u kúnn-wu awu ti rika be, ka asang iki.

⁹ Isim yine, ukwe ti kujwo isku u pu rika ka kúnn ukwe ti kujwo isi, ama ukwe ti kujwo isku u kafe ru ti uten-wu.

¹⁰ Anyisu-wu u nwunn u kunn byir akyirten yang-yi akwen ti u ba yaen shag, u tā rika kaa sang ti kupwe uten unde rika-wu.

¹¹ “Ama ukwe ti kujwo isi u nwunn uwae rinae, u pu rika kaa kúnn ukwe ti kujwo isku, ama ukwe ti kujwo isku u kunnbyir akyirten-wu yang-ba ti a u tā rika te ukwe ti kujwo isi, amaa, ukwe ti kujwo isi u ci wu rika.

¹² Kiye ti ukwe ti kujwo isi a ci pu wu rika risu ujwunn akyirten ba, awu u ndub ijwe ikyaen ti awu wen pu wu ande kumbub rijwe. Amaa, awu u ci rika yi ka-wu uwe be,

¹³ ikyaen imi, ukwe ti kujwo isku u kunnbyir kyi akyirten yang-yi akwen skeb tikucang. Isim asang iki, awu u ba kyi te ujwunn akyirten, ti isu rika yang-yi.

¹⁴ “Uwae kiye wu, ande yang-ba akwen u nwunn u kafe isim ta ukwe ti kujwo isi. Uwae ande ti uten-fu ama, arom arom u nwunn putsa ba ikyaen ti ayi ā kumunn ira ti kitam ti a sae, amaa, a u ci-ba rika be.

¹⁵ Tiri ukwe ti kujwo isku u pu akyirten ba kwae isa byir ti yi ndeya ba ti a u tso ukoh ukwe ti kujwo isi, ti a u tā rika, ama u ci mbe ra uten wu. Uwae kiye wu akyirten ukwe ti kujwo isi wu u tsi tu-ba be, ko itaen ti awu tsitsab, ikyaen ti, a u site-ba ribom ti a u tsi tu be.

¹⁶ Amaa, ukwe ti kujwo isku u nde iken ti nyang uwae-wu, unde iki ta-wu ti u nde tu te wu be. Awu u tsi uwae uten wu ti site riyinn, ama u site kpakang ti wu u twenji uten wu.

¹⁷ Awu u nde fengo ti wu u ba ti ribom ana meme kujwokwe-wu u ba si unju te ukwe ti kujwo isi, u pu umbae-wu baen ukwe wu, ikyaen ti wu u fxaembe kujwokwe-wu. Amaa, awu u nde num.

¹⁸ Isim yine, awu u kafe uwe tag ande ti nae fer unju uyinn u ci mbe ra uten yang-yi akwen atang, amaa ukwe rika iki u ba ci wu rika. Ayine u si ricwunnkyi na risu ti kpag-wu ayi. Kubenti, risu ti kpag-wu ayi u kafe tso ti risu-wu.

¹⁹ Tiri awu u ter ba sha ititam uwae uten-wu, amaa, awu u kyi kufxen u jwunnsi, ama a u nung-ba wu cwucwo be.

²⁰ “Tiri ukwe iki u fikyi wu u tom unde ti ku mbe aser ukwe ru ye ikyaen riyinn na kujwokwe-wu. Amaa, isim kiye pang awu u cwu, ayi u si-yi uwae rinae ko rika be.

²¹ Ukwe ti u fikyi wu u si unde titibi iki ti ruye-wu ishikununn ukwe be. Awu u ba ndub nwunn u kyaefa ande ti ira ti rag unju, ama u nae ukwe kiye ti unde iki kab-wu ira risu-wu be.

²² A u wen tag akyirten ti tsi ukub te wu, kwer ti unde ti uwe ti ye su unju ti yer Rimam.

²³ Ama awu u kyaefa uten ba iki u nda ba a u yer unju te wu. Awu u kpag fufa ko ti awu u site nyang ande pang amam.

²⁴ Awu u ri-wu ri be u pu rika ba sang uwae uten ti site rifunn siskeb, ama u nde iken ti abitse-wu ti abitse na abitse-wu, nde ji-ba be. Awu u pu isu ti awu kwae pu uwog rika, ti isu ti awu fxaembe uwog ande ka u ka na ande ti putsa wu. Awu u myae ira titibi risu uten ti a mbye pakob wu te kupwe ti ribom, amaa, ira-wu ayi u ko ka-yi uwe be.

²⁵ “Awu u sa ijwe-wu tsi u tu ribom utob u kunnbyir akyirten yang-ba, ama a u tsi ikub te ukwe ti kujwo isi. Ama ukwe ti kujwo isi wu u nwunn ti akyirten yang-ba, ama aba u tsi tu-ba be, ikyaen ti ande u myae kumyae titibi risu-wu.

²⁶ Ande ti te wu ku ci wuci ti tinyang tetso ti u si fengo itijwunnsi-wu. A u wen tag akyirten-wu, ama u yerwen ande yang-ba akwen.

²⁷ Ama ana abikwe ifaen bane, utob-ba u munn te ira ti kab titibi. Aba u yer rifen tetso, amaa, ayi u nde-yi be, ikyaen ti, kiye ti a sa tsi ikyaen itiricwunnkyi-ba ba-yi khika be.

²⁸ Ukwe ti isku u kafe ru ti uten-wu te rifunn yang-yi akwen, amaa, utob-wu u tsi ti wu tsi ikub te ande ti sisaen. Awu u nde iken ti nyang uwae-wu ama u kafe ru ti uten-wu.

²⁹ “Kiye u ba ti awu u kafe ru yi kujwo isi, amaa, uwae kiye wu, ayi u si-yi pangma ti kucang uwog-wu be.

³⁰ Ande ti Kitim u ba uwae ayae-ba u kúnn wu rika, ama ikyenricwu u ye wu. Awu u ter kafe ti isim ka pu rinae-wu tso fa ande ti unju ti yer ti sisaen. Awu u kafe ba ren risu te ande ti tsi ikub te unju ti yer ti sisaen.

³¹ “Awu u tom akyirten ba sang kusog Rimam tiyang, u byangkyi iken ti twen na usir usir. Aba u pu iken ti ku txiyib ti ku sor ndembeb uwog sang kusog Rimam tiyang wu u ye yi tsi atang.

³² Ti ira unju ti rag-wu, awu u kyaefa ande ti pyir ira unju ti yer, amaa, ande ti nung Rimam-ba u tsi ting ting fengo Rimam-ba u pyir ira-wu ayi.

³³ “Ama ande ti ben ayib uwae-ba u mbubta na ande yang-ba ayib. Amaa, uwae kiye pang, a u yerwen ariki uwae-ba, u twen mbub ariki, u ye ariki ru apyi, u kwae pu rifunn-ba ru.

³⁴ Kiye ti aba a jwunnsi, a u tu itindeya pang, ama ande yang-ba u sang fa te ba uwae unju ti rag-ba yi.

³⁵ Ama ariki uwae ande ti ben ayib ba u jwunnsi, ikyaen ti aba u sisaen u shanum ti riraen ka sang ti usir ti ricwunnkyi, ikyaen ti, ayi si-yi kiye ti a sa tsi khika be.

Ukwe Ti Ku Tso Risu

³⁶ “Ukwe wu u nde iken ti nyang uwae-wu. Awu u yetso risu-wu u sae ijwe-wu pangma awu na skeb patag apxin, u rimbeb rinyi Rimam ti skeb titag. Awu u tu itiru yi uwe yi meme iken ti awu u nde se kiye ti rinae Rimam a si ba pu yi risu-wu pangma ti a ri tsi.

³⁷ Awu u saeru imbacwu apxin abitse-wu, kwer ti ayi ti anda ku fen meme. Awu u sa uwae tsi-wu risu-yi be, ikyaen ti, awu u sae ijwe-wu pangma awu na skeb tag pu wu ayi.

³⁸ Amaa, awu u ka fen apxin ti ku kyir uten, apxin ti abitse-wu nung-ba ira iki risu-wu be. Awu u pu zinariya ti azurfa ti atxom ti tinyang fa ti rinyangwae ti itsotso ti site aser timambe fen apxin wu.

³⁹ Awu u tā rika te uten uten ti kpag timambe u ci ba rika te itindeya apxin ti abitse-wu nung-ba be. Itaen ti nung wu te rurob, awu u nda ba rurob. Awu u nae ba ukwe risu ande yang-ba akwen, ama u ka uten-wu fa ba ajwo ti si kujwofwa-ba.

⁴⁰ “Ricwunnkyi-yi ukwe ti kujwo isi u ba kúnn wu te rika. Amaa, ukwe ti isku u tsotsa wu ti ribom pangma kutikyib, te kuskus ti kya fa kakum, ti ande ti ku tso kakum, ti ayae ti uwae ambyi, awu u ba sang uten uten u ci ba rika ama yafe ru.

⁴¹ Awu u sang uten unju ti yer wu, u ka wen ande kumbub rijwe, amaa, ande ti Edom, ti ande ti Mowab, ti ariki uwae ande ti Amon u ter nwang kujwo-wu.

⁴² Awu u ci rika risu uten yang-yi, kwer ti Ejib meme.

⁴³ Awu u ta risu zinariya ti azurfa ti meme rifunn ande ti Ejib, ama ande ti Libya ti ande ti Kushi u ta imbyi-wu.

⁴⁴ Amaa, awu u tu kutsa ti ru usir ti kiskinn, ti kujwo isku ba ti u nda wu ikyenricwu, ama awu u nwunn ti uwae rinae ti byagkwan kaa wen ande yang-yi akwen.

⁴⁵ Ama awu u sim afug rika-wu kutampwa uyinn ti rikwen ti sisaen. Amaa, awu u cwuji, unde iki u ta-wu ti u ndeya wu be.