Amos 9 - Kutsingken Ira Rimam ti Saen Kyag

Rikwén Yaweh Risu Isirela

¹ Ame sae, Yaweh tsi fer kuta-wu yi kusog Rimam tiyang, u ri baa, “Kwer mbub asu kufwá kusog Rimam tiyang, ti imbyi-wu ā kyi ijwe. Byinn mbub wu si ande ti ta uwae kusog wu risu, unde ti a cwu-wu be, ame u wen wu ti kisum wen. Unde iki ta-wu ti u ter ru ye uwae kusog wu be, unde iki ta-wu ti u ter nwang be ama.

² Ko a mum sife yi kinjag, ame kaa shir ba tso yiye. Ko aba a tso fife yi apupwen, ame kaa shir ba si ba ti riben.

³ Ko a ka tam risu rikwen Karmel, ame kaa sha kyae ba atang. Ko a ka tam rita uyinn, ame u nda ikentibi u pye ba atang.

⁴ Ko ti a ter ru usom upyi uwog ande rika-ba, ame u nda kisum wen pye wen ba atang. Ame u sae ba ayib titibi, si-yi ti tinyang be.”

⁵ Itsekuru Yaweh, Ukwe rika, ti a sa kujwo tekunn riben, riben ku yiyag, ama meme ande ti nae atang u jwub ricwu. Riben wu meme u ndub tso pangma uyinn ti Nel, u munn, u yaen ru.

⁶ Awu Yaweh ti mbye kusog-wu apupwen, u ta imbyi wu tsitsa utense. Awu ti ku kunn ambyi tso uwae uyinn, u sa tsa si utense. Rinyi-wu si Yaweh.

⁷ “Ani ande ti Isirela ti ande ti Etiyopiya pang-ni atso uwe-m be a.” Yaweh ti rang ira yine. “Ame ti pu ru ye ande Isirela uten ti Ejib, u pu ande ti Filisti ruye Kafitor, ama ande ti Siriya ru ye Kir. Ame nde-m ahan be a,” Yaweh ti rang.

⁸ “Nung! Ayib Itsekuru Yaweh, cwutsa kujwokwe ande ti Isirela, aba ande ti ku nde ikentitibi ne. Ame u twenji ba uwae utense, amaa, ame u twenji tag-m ishikununn Yakubu be.” Yaweh ti ri.

⁹ Ikyaen yine, ame u nda unju, ama a u kyi ishikununn Isirela kutampwa ande meme pangma unda ti ku skae awum yi kutukwab. Ko riyaen kinjo u ta si-wu riben be.

¹⁰ Meme ande-m ti ku nde ikentitibi, a u pye wen ba ti kisum wen uwog rika. Aba ti ku ri baa, “Ira titibi u tu-yi ati be.”

Rimam Yer Unju te Ande-wu

¹¹ “Usir wu, ame u ye nwunn kusog Dawuda ti mbub sisi ama u fxebkyi aye ti mbag yi ukoh-wu. Ame u mbye nyang uwog ti kyaensisi ti awu ā tsi pangma ti kucang.

¹² Ama aba u sa iyen ikyab Edom kafe ana-ba, ti uten uten ti tsitsi ti ame ku kunn ba ti rinyi-m.” Yaweh, ti u nde iken yine, ti ri.

¹³ “Nung, usir ku ba.” Yaweh ti ri. Kiye-wu, wuci tishe u ben tu itikyi ti atang. Awaen ituku tijwae u ben tu itikwen ti atang. Risaen ti ta risu rikwen u munnkyi te awaen ituku ti tinyang. Ambyi-yi u munn kyi rikwen, u pang furr u ba mbub shag ibab rikwen.

¹⁴ Ame u sa kutxuwe ti tinyang tsó ande-m Isirela ti atang. Aba u mbye shem uten-ba ti mbub sisi ama u som atang. Aba u yen ituku anam, ama u ngwa ambyi-yi u tom risaen utong, ama u ci yi.

¹⁵ Ame u pu ba som ti riben-ba, ti nee ame ti nda ba, ama unde iki u rwae ba nwunn tu-wu riben atang be. Yaweh Rimam-ni ti ri.