Amos 8 - Kutsingken Ira Rimam ti Saen Kyag

Ira ti Kitam Risu Awaen ituku

¹ Ayine si ira ti Yaweh Itsekuru tso m. Ame sae kutyika ti munn te awaen ituku ti ben.

² Ama awu rang baa, “Amos, imi ti afu sae?” Ame ri te wu baa, “Kutyika ti munn ti awaen ituku ti ben.” Tiri Yaweh ri te m baa, “Ikentitibi ande-m Isirela munn pu-yi kutyika. Ame u ya ba ta-m be. Ricwunnkyi Isirela ba pu-yi.

³ Akyáng kusog Rimam usir wu u kafe ira ti jwub ti utob tibeb.” Yaweh Itsekuru ti ri. “Akom ande u shag kyife uwog meme. Aba u ye akom yi ru ye ko aka ti unju utsu.”

⁴ Ni fxen, ani ande ti ku ceb pu ande ti shanunum fa afxen, ani ande ti ku twenji awakaen ti ta uwae uten.

⁵ Ani ku ri baa, “Isinn ti ukwab ishaen tishe u mam, ti ati u jabci ayaen wuci-ti? Isinn ti usir ikyinn u yafe ti ti u jabci awum-ti te kitu kumyae tikiyib, ama u ko aser-yi tsutso, ama u byinn imbyi tasa kumyae-ti tsutso, ikyaen ti ti u ci ande,

⁶ ti ati ama u pu azurfa jab ande ti shanunum, ande ti jab tu-ba apwafxen be, ti aba u ba kafe apyi-ti, ti ati u pu ifwen wuci kyikab fa ti ayaen-yi, u ye jabci?”

⁷ Yaweh, ti ande ti Isirela ku ndub ijwe yi rinyi-wu, ben uben baa, “Kubenti ame u tangsom ti meme ikentitibi ti aba nde.

⁸ “Ikyaen ayine, riben u kyi ijwe tititang, ande meme ti nae atang ama u jwub ira. Riben u ndub tso pangma uyinn ti Nel, yi Ejib, ti ku munn tso u ba yaen ru.

⁹ “Itsekuru Yaweh, ri baa, Usir wu, ame u nda uwog byikyi pyipyib kiye ti usir ta utaen pampam, ama u nda utense byi tititang yi usir utaen.

¹⁰ Ame u nda usir ukwab-ni kafe usir utob ti beb, meme akyang ti yang-ni u kafe ukunn ricwu. Ame u nda ni ani u pu arae atupwa sī, u pwén risu-ni pwen ti u ta tso utob ti beb-ni. Ame u nda ni jwub ira pangma ande ti ku jwub ricwu risu umbae ti urom-ba kinjo amam ti cwu, ricwunnkyi-yi u nunn ngag.

¹¹ “Itsekuru Yaweh ri baa, Nung, usir ku ba ti ame u nda rimenn u pu uten, si-yi rimenn wuci ko ambyi be, amaa, rimenn ira Yaweh ti fxen.

¹² Aba u ter nwunn uyinn ike u ka sang uyinn akwen, u ter nwunn kujwo rici ru yi kujwo ife ku mbyir ye mbyir ye, ku sha ti a fxen ira Yaweh, amaa, aba u tu-ba ira yi be.

¹³ Usir wu anyisu wandab ti waen timambe ti anyisu itaen ti tsi ti ribom-ba, u pu cwu ikyaen unwáen.

¹⁴ Ande iki ku ben uben yi rinyi apxin Samariya, u ku ri baa, ‘Ati ku ben apxin Dan.’ Ariki ku ben apxin Beyersheba. Aba u jwunnsi u sunwunn-ba cwucwo be.”