Amos 7 - Kutsingken Ira Rimam ti Saen Kyag

Ira ti Kitam Risu Icwag

¹ Ayine si ira ti Yaweh Itsekuru tso m. Ame sae wu, awu ku shi imbae icwag ti wu tom sang uwae uten. Iken yine nde kiye ti a bunn mam pu ba wuci ukwe ti tawe ama wuci tijwae ser ku tso.

² Yi uwae iken ti ame sae ne, icwag yi pu wuci ti irim kub tag uwae uten Isirela. Ama ame ri baa, “Itsekuru Yaweh, ame ku jwam fu, yata na ti, bē rishi Yakubu u nde rimang? Aba ko-ba be!”

³ Yaweh fxae iken ti wu myae ti wu nde te ba, ama u ri baa, “Iken yi ti afu sae ne u nde-yi cwucwo be.” Yaweh ti ri.

Ira ti Kitam Risu Urwa

⁴ Ayine si ira ti Yaweh Itsekuru tatso kyi m. Ame sae awu ku sha ti wu pwen ande-wu rikwén, u yaen urwa si ba. Ama urwa wu twen mbub uyinn ti ukaense meme.

⁵ Tiri ame ri baa, “Itsekuru Yaweh, ame ku jwam fu, yata, bē rishi Yakubu u nde rimang? Aba ko-ba be!”

⁶ Yaweh fxae iken ti awu myae tsi ti wu nde te ba, ama u ri baa, “Ayine ama u nde-yi cwucwo be.” Yaweh, Itsekuru, ti ri.

Ira ti Kitam Risu Uji Kumyae

⁷ Awu tso m, ame sae Itsekuru tsi fer kupwe kusog ti a myae wu myae ti iji kumyae kute. Awu ye su iji kumyae kujwo-wu.

⁸ Ama Yaweh rang m baa, “Amos, imi ti afu sae?” Ama ame ri baa, “Iji kumyae!” Tiri Itsekuru ri baa, “Nung, ame u myae ande-m Isirela ti iji kumyae wune. Ame u ya ba ta-m be. Ame u byinn kang ba kimbab.

⁹ Asog apxin abitse-ni, anyisu Ishaku, u mbub si riben, uwog ti sisaen na Isirela u kafe acwupwe, ame u putsa ishikununn Jerobowam te isu rika.”

Amaziya Ri Ira te Amos

¹⁰ Tiri Amaziya, kukwen na Betel, tsa kutsan ka uwog Jerobowam, ukwe Isirela baa, “Amos myae ira titibi risu-fu yi uwae uten ti Isirela ike. Awu ri ira risu-fu ko timambe. Ira-wu ayi ku ndembeb uten.

¹¹ Amos ku ri baa, ‘Jerobowam u cwu uwog rika, ande ti Isirela ama, a u ye ba ru kang upyi yi fengo ti rwen!’ ”

¹² Tiri Amaziya ri te Amos baa, “Afu unde ti ku ya iskin, nwunn ike ti ru uten ti Yawuda ti ka ya iskin yi atang ti a sha na fu wuci.

¹³ Ya-fu iskin yi Betel ike cwucwo be, ikyaen ti, ike si uwog ti sisaen na ukwe, u si uwog ti meme ande ku ba fen Rimam atang.”

¹⁴ Tiri Amos ri te Amaziya baa, “Ame si-m unde ti ku ya iskin ira Rimam be, ko umbae unde ti ku ya iskin ira Rimam be. Ana-m, ame si unde ti ku shi iken u ku kyae fwa ituku sikamo.

¹⁵ Ama Yaweh ye ra m nwunn uwog iken ti shi-m, u ri te-m baa, ‘Ru ka ya iskin ira-m te ande-m, ande ti Isirela!’

¹⁶ Tine, fxen ira Yaweh. ‘Afu ri baa, ame na ya-m iskin titibi risu Isirela be. Ame na ri-m ira ti byag kwan risu ishikununn Ishaku be!’

¹⁷ Ikyaen ayine Yaweh ku ri te fu baa, ‘Uwa-fu u kafe iyaen uwae uten. Anyisu-fu ti arom ti ti anda, a u pyer wen ba te kisum wen. Ande u sa uten-fu kan fa atso. Afu ti risu-fu u cwu uwae uten ande ti apxin, ama a u ye Isirela ru kang upyi yi fengo ti rwen!’ ”