Amos 6 - Kutsingken Ira Rimam ti Saen Kyag

Yaweh u Twenji Ande Isirela

¹ “Ayae-ni ande ti som yagkaa yi Siyon, ti ani ti ku kab baa, ira iki na u tu-yi ani yi rikwen ti Samariya be. Ani ande tiyang tiyang uwae uten tiyang wune, ti ande ku ba sha itindeya uwog-ni.

² Ni ru Kalne ti ni ka sae iken ti nde atang, ni ru yi Hamati uten tiyang, ti ni ka si yi Gati ti ta uten Filisti. Ajwo ukwe-ni nyang skeb ana-ba a. Uten-ba yaen skeb ana-ni a.

³ Ani ku sha-ni usir rikwén be, amaa, kujwo wande-ni ku shir usir titibi wu ba fifer te ni.

⁴ “Ayae-ni ande ti nae tsa iwaen ti tinyang, ku ndab ijwe-ni atang. Ani ku som tsa iken ti som ti ti tinyang u ku pu unyang-ni atang ku ye iwentam ti imbae indag uwae asinn-ni u wen ku kub.

⁵ Ani ti ku yang akyang ti ukaen ti kufwa-ni, u sa ijwe-ni tsi pangma ani na ku mam tu akyang pangma Dawuda yi kufwa-ni.

⁶ Ani ti ku ngwa ambyi anam uwae atu tiyaen u ku shin kindob ti ku nung kuyang ti tinyang ama ku beb-ni utob risu ititwenji na Isirela be!

⁷ Ikyaen ayine, ani ti u si ande ti tawe ti a ye ru usom upyi. Ushwu ti shwu-ni u ta-yi cwucwo be.”

⁸ Itsekuru Yaweh ben uben yi rinyi-wu, awu Itsekuru Yaweh, Rimam ti si Ukwe rika, ri baa, “Ame pyir pu m ijwe ti ndub na Yakubu, u cwe-m ira ukoh-wu ti kpakang be, ama ame u sa uten-wu ti ande ti ta uwae atang meme na ande rika-wu.”

⁹ Asiti ande rijwe a tsitsi ishi kununn iki, aba u cwu.

¹⁰ Ama kiye ti rishi-ba a sang ba ti a u ba ye akom ru, kinjo u kunn itifaen wu ti ta uwae uwae kusog wu u rang wu baa, “Rikom iki ta ti uwae atang ne a.” Unde wu u cwe baa, “Iyee.” Ama awu ti rang ira u ri baa, “Bwetag! Ti kunn-ti rinyi Yaweh be.”

¹¹ Kiye ti Yaweh a ri ira, asog tiyang u kyaensi u mbubta mbubta, itikiyib ama u skiyer skiyer.

¹² Kakum ku ter nyae risu kutxu a. Unde u pu indag kaa tom ritom uwae uyinn a. Amaa, ani sa ira ti kubenti kafe rikàen ti nunn ma arisab, u sa wande ti tinyang kafe iken ti nunn ngag.

¹³ Ani ku pam ipam ikyaen ti ani ci pu ni Lodebar rika, u ku ndub ijwe baa, “Ati ci ande ti Kanayim ti ribom-ti re.”

¹⁴ Yaweh, Rimam ti si Ukwe rika, awu ri baa, “Nung! Ame u tom uten iki ba ta ni rika, ani ande Isirela. Aba u sir ni sir sa ti ice Hamati ba sang ti ukab na Araba.”