Amos 5 - Kutsingken Ira Rimam ti Saen Kyag

Akyang Ricwu ti Ten Risu Isirela

¹ Ni fxen ira yine, ani ande ti Isirela, akyang ricwu ti ame ku yang risu-ni ne.

² “Isirela, Mbawandab wu, jwunnsi pu wu. Awu u nwunn-wu cwucwo be. Awu nae riben atang kum awu, unde ta-wu ti nde ya wu be.”

³ Né iken ti nde Yaweh Itsekuru ri baa, “Uten ti akyirten kumbub kinjo a ru ye uwae-wu, ukob kinjo amam ti u tsitsi uwae-ba. Uten ti akyirten ukob kinjo a ru ye uwae-wu, rijwe amam ti u tsitsi yi Isirela.”

Ira ti Kunn na Itiyata Ikentitibi

⁴ Ayine si ira ti Yaweh ri te Isirela, “Ni sha kyae m ti ni som ti user.

⁵ Ni ka sha-ni ame yi Betel be, ko Gilgal, ko yi Beyersheba be. Ikyaen ti, a u ye pu ande ti Gilgal ru usom upyi, ama Betel u ba ku ukaen.”

⁶ Ni kafe ba uwog Yaweh, ti ni som ti user bē awu u pugtso pangma urwa yi ishikununn Isirela u twen ra wu. Urwa wu u twen mbub Betel ti unde iki u byinn jim tu-wu awu be.

⁷ Ayae ni, ani ande ti sa kubenti kafe iken ti nunn ngag pangma arisab, ama u ku fxaembe iken awakaen, u ku fungkyi kubenti.

⁸ Rimam wu ti mam aswer, Pleyade ti Oriyon. Awu ti ku sa ucwefam si, u ku sa uwog byikyi. Awu ti ku kunn ambyi tsoye uwae uyinn u sa tsa si riben. Rinyi-wu si Yaweh.

⁹ Awu ti ku twenji ande ti ribom fa ti ukoh uten-ba.

¹⁰ Ani cwe-ni ira ande ti ku pwen rikwén ti kubenti be, u ku sae ru ande ti ku ri ira ti kubenti.

¹¹ Ani ku cebtsa ande ti rikaen, ku fxaembe wuci-ba ti ribom. Ikyaen yine, ko ti ani ku mbye asog ti tinyang te atxom ti a kwen yi kwen, ani u nae-ni uwae atang be. Ko ti ani yen anam uwae risaen-ni, ani u ngwa-ni ambyi-yi be.

¹² Ame nung pu m ribeb riraen-ni, ti ikentitibi-ni ti ko timambe. Ani ti ku nde ande ti kubenti ira, ani ti a ku pu aser cwunn ni unju, ani ku pwen rikwén tikong risu awakaen.

¹³ Ikyaen ayine, itso kiye wune, ande ti ben ayib u bwetag skirr, ikyaen ti, kiye wune si kiye titibi.

¹⁴ Ni sa utob-ni tsi risu kubenti ti nde, ti ni pyir ira titibi pyir, ti unyang-ni ā ko ra ru yi uwe. Ama Yaweh, Rimam ti si Ukwe Rika, u te ni ta tetso pangma ti ani ku ri.

¹⁵ Ni pyir ikentitibi ti ni ye ure te iken ti tinyang. Ni pwen rikwén ti kubenti uwae kusog rikwen-ni. Iki be Yaweh, Rimam ti si Ukwe rika u sae ni anyisu Yusufu ti tsitsi te ayibrisi.

¹⁶ Ayine si ira Yaweh, Rimam ti si Ukwe Rika, “A u jwub ira yi meme rishen. Yi meme ukur fengo, a u jwub ira baa ‘Ii! Ii.’ A u kunn ande ti ritom ru ba jwub ricwu. Ande ti wande-ba si ira ti jwub, a u yae ba ba jwub ira ti utob ti byir.

¹⁷ Yi risaen ituku anam meme, ande u jwub ira ti utob ti byir, ikyaen ti, ame u sang tsa kutampwa-ni, u nde ni ira.” Yaweh ti ri.

Usir Rikwén Yaweh

¹⁸ Ayi u beb tsi uwog-ni, ani ande ti ku sha itiba usir rikwén Yaweh. Imi ti nde ani ku sha ti usir wu na ba? Usir wune u si kufub, usir u tsi-wu be!

¹⁹ Usir wu u si pangma ti unde ku ter icwu, u ka purug itumu. Ko pangma ti awu ku sang yi uwae kusog u ka sa kujwo ta kupwe, ama ikentibi pyer wu ti kujwo.

²⁰ Ikyaen yine, usir Yaweh u si kufub, usir u tsi-wu be, uwog u byi tang tang.

²¹ Yaweh ri baa, “Ame pyir pu m meme ukwab ti ani ku nde na m, itifunn ti ani ku nde ikyaen-m ku txi m iyib!

²² Ko ti ani a pu rinyangwae iken ti ti twen-ni ti rinyangwae ayaen wuci ba ku na m, ame u mbe-m ayi be. Ame u sae-m ayib yi iwen ti rikem ti ani ye ba ku twen na m be ibye ti ani ku sa ba ikyaen usom kujimshwur.

²³ Ni pu akyang ti ani ku nghaen ne ru ru uwe-m ike! Ame u naa atong fxen-m kufwa ti ani ku byinn ku teb m be.

²⁴ Ni nda kubenti pupang kutampwa-ni pangma ambyi unyim ti ku pang. Usom ti som ti kpang atang-ni ā si pangma unyim ti ku wom-wu wom be.

²⁵ Ti ani ta uwae kutur kuka asang mae ifaen né, ani ku twen ikentitwen u ku pu rinyangwae iki na me a, Isirela.

²⁶ Iyee! Ani ku ye apxin-ni Sakut tsa ukwae ku kyang, awu ukwe apxin-ni, ti Kaiwan ti si pangma aswer ti ani kyae tsi ku fen.

²⁷ Ikyaen ayine, ame u pu ni yafe Damasiku kaa som uten ti ani kaa kafe upyi atang.” Yaweh ti rinyi-wu si Rimam, Ukwe Rika ti ri.