Amos 4 - Kutsingken Ira Rimam ti Saen Kyag

Ande Isirela Ye Su-ba Iken ti Kwen Rimam Be

¹ Ni fxen ira yine, ani anda ti som Samariya ti kem pangma indag ti Bashan. Ani ti ku sir awakaen sir, ti ku sher myae ande ti shanunum, ku ri kob te abaen-ni baa, “Ni sha na ti iken ti ngwa!”

² Yaweh Itsekuru ben uben yi itisaenkyag-wu baa, “Usir ku ba ti a u shir ni ru ye uten-ni, pangma iwag ti a ku shir tso uwae ambyi ti kurgiya. Ko unde ti tine uwae-ni, a u shir ra wu ru ye uwae uten-ni.

³ A u shir ni ndáe ndáe ndáe putsa aye ukoh ti mbumbub ru ye, u pu ni yen kaa jwunn si kanjag Hamon.” Yaweh ti ri.

⁴ “Ni ru Betel ti ni ka nde-ni ikentitibi-ni ayi! Ni ru Gilgal ti ni ka nde-ni ikentitibi-ni yae ijwe! Ni twen-ni iken ti twen-ni ayi kiskinn kiskinn, pangma ti ani ku twen kob. Ni sa ru kinjo uwae iken rijwe-ni pangma ti ani ku nde kob né.

⁵ Ni ru yi uwe pu buredi ru ba nda Rimam rinyangwae kufxaefa. Ni ru yi uwe ti rinyangwae ijwe ti ndub-ni ayi! Ikyaen ti, ayine si iken ti Isirela ku sha!” Itsekuru Yaweh, ti ri.

⁶ “Ame sa rimenn sang kyife uten-ni meme, u nda ni shanum ti wuci, yi meme uwog ti som-ni. Kweme ayine, ani kafe ba-ni uwog-m be.” Yaweh ti ri.

⁷ “Cwucwo, ame byang ni upwen kiye ti ayi tsitsi ishaen ita ti wuci u ben. Ame sa upwen tsa uten iki u ya uten iki ta. Uwae risaen ufang iki upwen tsa atang, uwae risaen ufang iki ama wom tag karang.

⁸ Ande ku yág ha ha ha, nwunn uten ne ka sang uten ne, ku sha ambyi, ama a tu ben-ba ayi be. Kweme ayine, ani kafe ba-ni uwog-m be.” Yaweh ti ri.

⁹ “Ame nda uwae rukong-ni jang mbeb, u tom akurùg ti anyìnyīnn sang kub ndembeb wuci-ni. Atsing utong-ni wom cwu tag uwae risaen ufang, ituku anam ama wom cwu tag uwae rukong. Ituku kututong ti ituku olifi-ni, icwag pu kub tag. Kweme ayine, ani kafe ba-ni uwog-m be.” Yaweh ti ri.

¹⁰ “Ame tom kicaeb ti ujwunn sang kutampwa-ni pangma ti ame tom sang Ejib. Ame pye wen anyisu itaen-ni te kisum wen, u ye pu kakum-ni ru. Ame nda kufug rika-ni ku nung akong ruwen-ni. Kweme ayine, ani kafe ba-ni uwog-m be.” Yaweh ti ri.

¹¹ “Ame twenji ariki uwae-ni ma ti ame twenji Sodom ti Gomora. Ani si pangma kutuku ti a jwae ru ye uwae urwa. Kweme ayine, ani kafe ba-ni uwog-m be.” Yaweh ti ri.

¹² “Ikyaen ayine, ame u fxer tsi ni, ande Isirela! Ikyaen ti, ame u nde kang-m iken yine te ni, ni fab benti-ni nyinyang ti ni somji Rimam-ni!”

¹³ Nung baa, awu ti mam rikwen ti ufunn, u sa ira ti kab-wu tatso ande. Awu ku sa kiskinn kafe kufub. Awu ti ku kyang asu rikwen ti ta utense meme. Rinyi-wu si Yaweh, Rimam ti si Ukwe Rika.