Amos 2 - Kutsingken Ira Rimam ti Saen Kyag

Ande ti Mowab

¹ Ayine si ira ti Yaweh ri: “Ikyaen ikentitibi Mowab ti skeb risu, ame u byinn kang ba kimbab. Aba sae ru iticwu ukwe ti Edom, u twen mbub akub-wu kafe itong.

² Ikyaen ayine, ame u yaen urwa si ande ti Mowab, ama u twen mbub tag uwog ti tam ande ti Keriyoti. Ande ti Mowab u cwu uwog rika, kiye ti ande ti rika-ba u tso ukunn rika u ku kunn kutumu rika.

³ Ame u wen ukwe-ba ti afaen-wu meme.” Awu Yaweh ti ri.

Rikwén Risu Ande ti Yawuda

⁴ Ayine si ira ti Yaweh ri: “Ikyaen ikentitibi Yawuda ti skeb risu, ame u byinn kang ba kimbab. Aba pyir icwe na Yaweh u ye su-ba iken ti kwen-wu be. Apxin-ba ti tikong shir ba sang uwae kutur pangma ti ayi shir abitse-ba sang kute.

⁵ Ikyaen yine, ame u yaen urwa si ande ti Yawuda u twen mbub uwog ti tam-ba uwae Urushelima.”

Rikwén Risu Ande ti Isirela

⁶ Ayine si ira ti Yaweh ri: “Ikyaen ikentitibi Isirela ti skeb risu, ame u byinn kang ba kimbab. Aba pu ande ti raen-ba ira be jabci u pu ande ti rikaen jab mbe apwafxen atang.

⁷ A ceb pu ande ti rikaen fa afxen, u pyir ti a u nde itinyang na ande ti shanum te iken. Umbae tí itse-wu ku nae te mbawandab kinjo ama ku nde mbeb rinyi-m ti saen kyag.

⁸ Aba ku pu atupwa ti a fxaembe ajwo awakaen u pu ta riben uwog ti a ku fen Rimam atang. Yi kusog Rimam-ba, aba pu aser upae ti kufúm ti a yer na ande u ku jab iken ti ngwa atang.

⁹ A ku nde ayine ko ti ame wen tag ande ti Amor ti ayib-ba, aba ti kob pangma kufxang u bom pangma kukaen. Ame u twenji ba patag pangma ti a twenji kutuku ti ipab-wu.

¹⁰ Cwucwo, ame pu ru ye ni uwae uten Ejib, u tae ni kyang asang mae ifaen uwae kutur, ti ni na ka ci mbe ra uten Amor.

¹¹ Ame tsab ariki uwae anyisu-ni ti arom ti a na si ande ti ku ya iskin. Ariki uwae-ba ama, ame yerkob ba ti a na ngwa-ba iken ti nununn be, a na pwén-ba risu be. Ko ame nde-m ahan be a, ande ti Isirela?” Awu Yaweh ti ri.

¹² Amaa, ani nda ande bane ti ame yer kukob ngwa iken ti nunn ngag. Ani ama ri te ande-m ti ku ya iskin baa, a na ya-ba iskin be.

¹³ “Nung, ame u sir ni bae fa ti riben pangma ti akaen awum ku sir kuskus ka yiyiyaen ti riben.

¹⁴ Ande ti bir inyae ti ter uwae-ni u ter nwang-ba be. Aba ti bom siskeb uwae-ni u nam ndembeb. Ko akyirten ti ribom ma u nwangru tu-ba risu-ba be.

¹⁵ Aba ti ye su kokutá u tsi tu-ba be. Ande ti ku ter inyae siskeb uwae-ni, aba u ter ter ter, u ter num. Ko aba ti ku tso kakum ma, a u nwangru tu-ba risu-ba be.

¹⁶ Usir wu, ko ande ti bom utob timambe uwae akyirten-ni, a u ter ya isu rika-ba ta, u ter nyáng risu-ba amam.” Awu Yaweh ti ri.