Amos 1 - Kutsingken Ira Rimam ti Saen Kyag

¹ Ayine si ira na Amos, ti si kinjo uwae ande ti ku shi iken yi uten ti Tekowa. Awu sae iken yine kiye ti Uziya si ukwe Yawuda, ti kiye ti Jerobowam umbae Jowash si ukwe Isirela. Awu sae iken yine asang ifaen titawe riben kyi ijwe.

² Amos ri baa, “Yaweh tum ripaen pangma itumu yi Siyon, ama taen ira pangma imam yi Urushelima. Irum ti asinn u kub wom cwu. Ko ayi ti ta risu rikwen Karmel u wom cwu tag.”

Rikwén Rimam Risu Ande ti Damasiku

³ Ayine si ira ti Yaweh ri: “Ikyaen ikentitibi Damasiku ti skeb risu, ame u byinn kang ba kimbab. Aba byinn ande ti Gileyadi ti ipug aser, pangma wuci ti a ku rug itae.

⁴ Ama ame u tom urwa si kununn ukwe Hazayel, u twen mbub kupwe ti kpakang na ukwe Ben-Hadad.

⁵ Ame u byinn mbub ufu uten Damasiku, ama u wen tag ande ti ta kubxab Aven. Ame u twenji ukwe ti Bet-Eden, ama ande ti Aram. A u ye ba ru upyi uten Kir.” Awu Yaweh ti ri.

Rikwén Rimam Risu Ande ti Gaza

⁶ Ayine si ira ti Yaweh ri: “Ikyaen ikentitibi Gaza ti skeb risu, ame u byinn kang ba kimbab. Aba ye pu kumbukwen ande ru yi uten ti si-yi ana-ba be ka pu ba jabci na ande ti Edom.

⁷ Ikyaen yine, ame u tom urwa si uten Gaza, u twen mbub tag ukoh-ba ti uwog ti tam-ba meme.

⁸ Ame u wen tag ande ti Ashidod u twenji ukwe na Ashikelon. Ame u kafe uwe tag Ekron, ama ande ti Filisti ti tsitsi, a u wen ba.” Awu Yaweh, Itsekuru ti ri.

Rikwén Rimam Risu Ande ti Tiire

⁹ Ayine si ira ti Yaweh ri: “Ikyaen ikentitibi Tiire ti skeb risu, ame u byinn kang ba kimbab. Aba ye pu ande uten atang meme jabci na Edom, u tangsom-ba ti unju ti yer ameinja atso be.

¹⁰ Ikyaen yine, ame u tom urwa si uten Tiire, u twen mbub tag ukoh-ba ti uwog ti tam-ba meme.”

Rikwén Rimam Risu Ande ti Edom

¹¹ Ayine si ira ti Yaweh ri: “Ikyaen ikentitibi Edom ti skeb risu, ame u byinn kang ba kimbab. Aba rwae putsa inja-ba Isirela ti kisim-wen, u tatso-ba aba ayibrisi iki be. Aba tsikunn rinae tetso, u cwe-ba ti a ya ta na ameinja-ba be.

¹² Ikyaen ayine, ame u tom urwa si uten Teman, u twen mbub tag uwog ti tam ande ti Bozira meme.”

Rikwén Rimam Risu Ande ti Amon

¹³ Ayine si ira ti Yaweh ri: “Ikyaen ikentitibi Amon ti skeb risu, ame u byinn kang ba kimbab. Aba fxaenta rishwu anda ti kyaen rishwu yi Gileyadi, ikyaen ti, a na u fxae mbe riben-ba fa ana-ba.

¹⁴ Ame u tom urwa si uten Raba, ama u twen mbub tag ukoh-ba ti uwog ti tam-ba meme. Rika u kunn ba ti ukunn ti tso, pangma ufunn ti ribom.

¹⁵ Ukwe-ba ti anyisu-wu meme, a u pu ba ru uten ti si-yi ana-ba be.” Awu Yaweh ti ri.