Afisa 6 - Kutsingken Ira Rimam ti Saen Kyag

Usom ti Som na Anyisu ti Abitse-ba

¹ Ani anyisu tinying, ni nae risu riben na abitse-ni ti abiya-ni ikyaen Itsekuru-ti. Ayi si iken ti pang atang.

² A bae uwae Kutsingken Rimam baa, “Nda itse-fu ti iya-fu kuko.” Icwe wune si icwe Rimam ti kucang ti site kujwojang fa atang.

³ Kujwojang-wu si ti, “Afu u tu meme iken ti tinyang, ama afu u ci utense ru ka uwe.”

⁴ Ani abitse ama, ni nda-ni anyisu-ni tso rinae be. Ni shi ba uwae ira Rimam, ti ni kwen na ba iken, ti ni fwa ba kusen uwae fengo ti si ana Itsekuru-ti.

Usom ti Som na Apyi ti Itsekuru-ba

⁵ Ani ande ti si apyi, ni nae risu riben na ande ti ta risu-ni utense ike. Ni kyen ba kyen, ti ni fwer ijwe uwe-ba. Ni nde na ba wande ti utob kinjo pangma ti ani u nde yi na Kristi.

⁶ Ni nde-ni wande-ni ikyaen ti aba na nung ni u teb rinyi-ni be, ni nde yi ti utob-ni meme ikyaen ti ani si apyi na Kristi, ti ku nde iken ti ku nyang uwae na Rimam.

⁷ Ni nde wande-ni ti utob ti tsen, ti ni tangsom baa, ani na ku nde yi na Itsekuru-ti ama, si-yi ikyaen unde iki amam be.

⁸ Ani nung pu ni baa, Itsekuru-ti na u ru ba nda unde titini kujwojang wande ti tinyang ti awu nde. Ko awu a si upyi ko awu a si-wu upyi be, i si iken kinjo.

⁹ Ani ande ti site apyi kununn-ni, ni nde tinyang ama uwog apyi-ni. Ni nda-ni aba yer anying utob be. Ni tangsom baa, ani ti apyi-ni meme na site Itsekuru kinjo apupwen ti ku nung ande meme pang atso.

Fengo ti Unde u Ci Rika Risu Shetann

¹⁰ Ira-m ti ricwunnkyi si ti ani na tsi ting ting yi fengo na Itsekuru-ti. Ni tsi ti kpakang ti ku ru uwog-wu ba.

¹¹ Ni pu isu rika ti Rimam nda ni si, ikyaen ti ni ta rika te Shetann ti itsab-wu titibi.

¹² Rika yi ti ati ku ta ne si-yi rika ti ati ku ta te ande ti site rimenn ijwe ti anying be. Ati ku ta rika te abikwe, ti ande ti kpakang, ti kujwokwe kufub, ti akyirten asung titibi ti ta apupwen.

¹³ Ikyaen yine, ni pu isu rika na Rimam si ikyaen ti kiye ti rika a byagkwan, ani u nde tu ti ni tsi ti kpakang-ni. Ama ti rika a mam pu yi, ani u tsi ti atang.

¹⁴ Ikyaen yine, ni tsi ti afxen-ni riben ting ting. Benti-ni ā si ira ti kubenti ti ani ku ri. Kutupwa ti u takyi kikog-ni ā si wande ti kubenti ti ti nde

¹⁵ Apwa afxen-ni si ira tinyang na kujimshwur ti ani kyang ku ri te ande.

¹⁶ Cwucwo, uwae kinjo si kupwa rika-ni ti ani u ye su ko kiye titini. Ti kupwa rika wune, ani u byinn jim ibu ti ku cwe urwa na Shetann ti ku ta ni.

¹⁷ Itinwangru si kubur rika-ni. Ni sa yi bur risu, ti ni sa Kutsingken Rimam fa kujwo. Awu si uti na Kusung Rimam.

¹⁸ Ni jwam Rimam, ama u sha itindeya uwog-wu ko kiye titini pangma ti Kusung-wu ti Saen Kyag tatso ni. Ni tsi ti ujwin ti ni sa utob-ni meme na Rimam ti jwam ikyaen na ande na Yesu Kristi meme.

¹⁹ Ni jwam Rimam ama risu-m, ikyaen ti ko kiye titini ti ame a tu riyae ti ame na ri ira, Rimam u nda m ira ti ri u nda m kpakang utob ikyaen ti m sa ira ti ana-wu, ayi ira ti kitam ti tinyang, u sa tsag te ande paenine.

²⁰ I si ikyaen ira Rimam yine nee awu tsab m baa, ame na ru ka ri ira yi te ande kutunn unju-wu, ko ti ame ta uwae pursuna ne. Ikyaen yine, ni jwam Rimam ikyaen ti m na ri ira ti ribom pangma ti awu ku sha.

Ira ti Kunnji

²¹ Ani u sha kang ti ni na u nung baa, ame na som rimang bara, wande-m ama na ku kyang rimang bara. Tikikus u ri tag ira yi meme te ni. Awu si inja-ti ti utob uwae-ti, u ku ndeya ti te utob kinjo uwae wande na Itsekuru-ti Yesu.

²² Ayine si iken ti nde nee ame tom wu ru ku ba uwog-ni ikyaen ti wu na ri te ni ira usom ti som-ti u ri bom ni utob.

²³ Itse-ti Rimam ti Itsekuru-ti Yesu Kristi ā nda meme-ni kujimshwur ti ure ti uwae kinjo, ameinja.

²⁴ Ayibrisi na Rimam ā te ni som tetso, ani ande ti ye ure te Itsekuru-ti Yesu Kristi ti ure ti ku jim-wu jim be.