Afisa 5 - Kutsingken Ira Rimam ti Saen Kyag

Usom ti Som ti tinyang na Ande Yesu

¹ Ti ani si pu ni anyisu na Rimam ti utob-wu, ni kwab ti ni som pangma awu Itse-ni.

² Ni nde iken-ni meme te ure, pangma ti Kristi ye ure te ti, u cwu ricwu ikyaen na ti. Awu sa unyang-wu na Rimam pangma iken ti a ye yerwen ti ku nung kuyang uwog Rimam.

³ Ni fxae ira iyag ti nae ti amae ti nae ti ayib ti ti sae. Ko ira ti ri risu itso iken yine pang-yi atang uwog ande na Rimam be.

⁴ Ni ri-ni ira ti si ira ti ku wae rukwae be, ko ira ti kuskwab, ko ira ti ku nda ande kab ira risu ikentitibi. Iken ti nyang skeb si ti ni nde fxaefa na Rimam.

⁵ Ame ku ri te ni kubenti, unde ti ku nae amae, ko unde ti ku nae kujwo ajib u tu-wu kutunn uwae Kujwokwe Kristi ti ana Rimam be. Ayi si ahan ama ti unde ti ku taen ayib risu iken ande, ikyaen ti, iken ti awu ku nde ne pangma apxin ti fen.

⁶ Ni cwe-ni ti unde iki ā kyaefa ni ti ira ti ukaen risu iken yine be. I si ikyaen itso iken yine nee rinae na Rimam ku ru ba risu ande ti ku fxen-ba wu be.

⁷ Ikyaen yine, ni ren-ni risu te utso ande bane be.

⁸ Kute, ani si ande ti kufub, tine, ani kafe pu ni uwog ti saen uwae usom ti som-ni te Itsekuru-ti Yesu Kristi. Ikyaen yine, ni kyang ikyin-ni pangma ande ti ta uwog ti saen kyag.

⁹ Ikyaen ti, i si uwog ti saen kyag ti ku nda ande nde iken ti tinyang ti iken ti pang atang uwe Rimam, ti iken ti kubenti.

¹⁰ Ni kwab ti ni nungye iken ti Rimam ku tsen utob te yi.

¹¹ Ni ren-ni risu te ande ti ku nde iken na kufub be. Itso iken yine u ru-yi risu be. Ni ri yae iken yine yae uwe ande.

¹² Iken ti aba ku nde yi uwae kitam, si iken ti ku wae rukwae ti a u ri ira risu-yi.

¹³ Ama asiti a pu meme iken ba uwog ti sisaen, a u sae yi paenine.

¹⁴ Ayi si ikyaen uwog ti sisaen nee ande ku nung iken yi paenine ahan. Né iken ti nde a ku ri baa, “Shwushwu, afu unde ti ku cwag kicwag! Afu rukom, nwunn ritsen, ti Kristi ā nda ni itijaen-wu.”

¹⁵ Ikyaen yine ni nung nyinyang uwae usom ti som-ni. Ni som-ni pangma ande ti kuskwab be, ni som pangma ande ti ben ayib.

¹⁶ Ko kiye titini ti ani a tu riyae, ni nde iken ti tinyang ikyaen ti, kiye ti ati ta uwae-yi tine nyang-yi be.

¹⁷ Ikyaen yine ni si-ni ande ti kuskwab be. Ni kwab ti ni nung iken ti Itsekuru-ti Rimam ku sha ti ni na nde.

¹⁸ Ani ande ti ku ngwa iken ku shishaen, ni fxae yi. Ayi u shir ni si yi uwae usom ti som ti ukaen amen. Iken ti nyang skeb si ti, ni cwe ti Kusung Rimam ā munn riyaen utob-ni.

¹⁹ Ti ani ku ri ira tetso, ni tangsom te ira ti ta uwae akyang na Rimam, ti akyang ti a ku teb Itsekuru-ti atang, ti akyang ti Kusung Rimam a ku nda ni meme. Ni yang akyang yine tetso, ti ni teb Itsekuru atang ti utob-ni kinjo.

²⁰ Ko kiye titini ni nde fxaefa na Itse-ti Rimam ikyaen iken meme, yi rinyi na Itsekuru-ti Yesu Kristi.

Usom ti Som na Ribaen

²¹ Ame ku jwam ni, ni nae risu riben na atso ikyaen ti ni sa rurob na Kristi.

²² Ani anda ti baen ande, ni fxen ira abaen-ni pangma ti ani ku fxen ira Itsekuru-ti.

²³ Ikyaen ti, urom ta risu uwa-wu pangma ti Kristi ama ta risu kumbub ande na Rimam. Aba si rimenn ijwe-wu. Awu si risu u si unde ti nwangru ba ama.

²⁴ Ikyaen yine, anda ti baen ande ā nae risu riben na abaen-ba uwae usom ti som-ba patag, pangma ti ati ande Kristi ku nae risu riben na wu.

²⁵ Ani arom ama, ni ye ure te awa-ni pangma ti Kristi ye ure te kumbub ande na Rimam u cwu ricwu ikyaen-ba.

²⁶ Awu nde ahan ikyaen ti wu na kyae nyang ba uwe Rimam yi fengo na ira-wu. Ti uwe-yi awu jwo saen ba yi fengo na batisma u sa ba tsi iyen ikyaeb

²⁷ ikyaen ti wu na pu ba ru ba yi uwog-wu pangma unda ishe ti tinyang ti ajib ko riraen iki ta-yi ijwe-wu be.

²⁸ Ani arom, ni ye ure te uwa-ni pangma ti ani ku ye ure te risu-ni. Asiti unde a site ure te uwa-wu awu site ure te risu-wu.

²⁹ Unde ku pyir-wu ijwe-wu be. Awu ku sha na ijwe-wu wuci u ku nungkyi ijwe-wu nyinyang pangma ti Kristi ku nde te kumbub ande ti putsa wu,

³⁰ ikyaen ti, ati si akyab ijwe na-wu.

³¹ A bae uwae Kutsingken Rimam baa, “Unde ku ya itse-wu ti iya-wu ta u ku ru ba ren te uwa-wu, ama meme ifaen-ba kafe iken kinjo.”

³² Iken ti kwen ti jijang ta uwae ira yine. Ame tang baa, ira yine ta risu Kristi ti ande ti putsa ira-wu. Aba ti si uwa-wu.

³³ Ama ira yine ta risu-ni arom ti awa-ni ama. Urom titini ā ye ure te uwa-wu pangma ti awu ku ye ure te risu-wu. Unda titini ā sa kuko na ubaen-wu ama.