Afisa 4 - Kutsingken Ira Rimam ti Saen Kyag

Ande ti ku Putsa Yesu Si Iken Kinjo

¹ Ikyaen yine, ame Bulus ti nae pursuna ikyaen Itsekuru-ti, ame ku jwam ni baa, pangma ti Rimam kunn ni ti ni na som usom ti kubenti, ni som usom pangma ti awu ku sha.

² Ni nae risu riben te atso, ti ni nde iken-ni meme sku sku. Ni kaen kutxom sur utob, ti ni ye utob tetso uwae ure.

³ Ni kwab ti ni tsikunn uwae risu ti ren ti ru uwog Kusung Rimam ba, yi fengo na kujimshwur ti ye su ni uwog kinjo.

⁴ Ati ande na Yesu si kumbub kinjo. Kusung Rimam si kusung kinjo amam ama. Kiye ti Rimam kunn ni, i si iken kinjo ti ani sa uwae tsi atang.

⁵ Itsekuru-ti si kinjo. Ira Rimam ti ati ru kubenti atang si kinjo. A nde na meme-ti batisma kinjo.

⁶ Rimam si kinjo. Awu ti si Itse-ti meme, u ta risu iken meme, u ku nde wande te iken meme, u ta uwae iken meme.

⁷ Ko ti ayi si ahan, a nda unde titini uwae-ti rinyangwae txi txi. Rinyangwae ti unde titini tu, ku tatso itso itinyang ti Kristi site yi.

⁸ Nee iken ti nde a bae uwae Kutsingken Rimam baa, “Kiye ti awu kafe tso yi apupwen akwen, awu pu ande yang akwen tso tetso. Aba si ande ti awu ye ba ye uwae rika. Awu nda ande rinyangwae.”

⁹ A bae baa, “Awu kafe tso yi apupwen akwen.” Ayine tatso baa, ti uwe-yi awu na si ba si fife yi riben utense.

¹⁰ Awu unde wu ti si ba utense, si sí awu cwucwo ti tso fife yi apupwen uwog ti awu skeb tag iken meme, ikyaen ti wu takyi tag utense meme.

¹¹ Rinyangwae yi ti a ri ira risu-yi ama, awu nda ariki si ande ti atom, ariki ama si ande ti ku ya iskin ira Rimam. Ariki ama ku sa ira-wu tsag te ande. Awu tsab ariki ti a na shi ande na Rimam, ariki ama ikyaen ti a na si ande ti ku kwen iken.

¹² Awu nde iken yine ikyaen ti wu na kyae ande na Rimam tsi, ikyaen ti a na ndeya atso yi wande Rimam, ti a na mbye kumbub ande Rimam ti si ijwe rimenn Kristi,

¹³ se ti meme-ti a ren tag tetso uwae fengo Rimam, u nung Yesu Umbae Rimam uwae riyaen utob-ti. Ati u ser ben uwae ira Rimam, u bom ribom ru kaa sang ricwunnkyi ti Kristi ti risu-wu ka fob atang.

¹⁴ Tiri ati u si-ti pangma anyisu tinying cwucwo be. Aba ande ti kyang ku kyaefa ande ti iken ti kwen-ba, pangma ufunn ti ribom ti ku kae kuyae kafe kafe uwae uyinn, itsab-ba ayi u nde fob-yi iken iki uwog-ti cwucwo be.

¹⁵ Ana-ti, ati u ri kubenti uwae ure. Yi fengo yine, ati u ser riser u kafe pangma Yesu Kristi. Awu ti si risu ande na Rimam. Aba si akyab na rimenn ijwe-wu.

¹⁶ Awu ti nda meme akyab rimenn-wu ayi txi txi ren tetso yi fengo na indub ti ko ikyaeb titini site yi. Kiye ti ko ikyaeb titini ku nde wande-wu yi fengo ti pang atang, rimenn ijwe meme ku ser riser u ku bom ribom uwae ure.

Unyang Tishe ti Kristi ku Nda Ande

¹⁷ Ikyaen yine, ame ku ri te ni u ku fwa ni kusen uwae rinyi Itsekuru-ti baa, ni som-ni usom pangma ana ande ti kufub cwucwo be. Ira ti kab-ba si ti ukaen amam.

¹⁸ Kufub sikyi ba ayib. Aba tsi rurwen te unyang ti Rimam ku nda, ikyaen ti, aba si ande ti nung-ba ira be, u kwen risu timambe.

¹⁹ Aba site-ba te rukwae risu ikentitibi-ba cwucwo be. Aba sa ijwe-ba na ikentitibi ti ti nde ti tsotso, u ku nde iken ti pang-yi atang be ti unghae, u ku ye-ba ijwe-ba be ko tikiyib.

²⁰ Amaa ana-ni, iken ti ani kwen uwog Kristi si-yi ahan be.

²¹ Ame tang baa, ani fxen mam pu ni ira risu-wu ara kuben. Ame tang ama baa, ani ande ti si ande ti putsa wu kwen pu ni ira ti kubenti ti awu tatso ti.

²² Ikyaen yine, ni fxae ira ti kab yi ti nda ni som usom na ikentitibi kute. Usom ti som-ni ti kucang kafe titibi ikyaen iken na ijwe ti kyaefa ni, ani sa uwae tsi atang.

²³ Ni ya ta ti Rimam na kyae nyang utob-ni tishe.

²⁴ Utob-ni ā munn te ira ti kab tishe, ayi ira ti kab ti Rimam kyae ru ana-wu. Ayi ā nda ni som usom ti sisaen u nde iken ti tinyang uwe Rimam, ti ati nung baa, ayi si fengo ti kubenti.

²⁵ Ikyaen yine, ni wer-ni rifen cwucwo be. Unde titini ā ri ira ti kubenti te inja-wu, ikyaen ti, meme-ti si iken kinjo uwae itiren-ti ti Kristi, pangma akyab na rimenn kinjo.

²⁶ Asiti rinae a ye fu, cwe na-fu ayi ti yi nda fu nde ikentitibi be. Tso-fu rinae pu usir te be.

²⁷ Nda-fu Shetann riyae ti wu kyaefa fu be ko tikiyib.

²⁸ Unde ti ku yib iken ā fxae yi u nde wande ti ajwo-wu ikyaen ti awu ā tu itici ti itingwa-wu fengo ti si kubenti, ikyaen ti awu ā ndeya ande ti rikaen.

²⁹ Ni ri-ni ira titibi tetso be. Ni ri itso ira ti u ndeya ande. Ni ri ira ti pang atang, ikyaen ti, meme ira ti ani ku ri ā si ira ti u kyae nyang ande ti ku fxen yi.

³⁰ Ni ndembeb-ni Kusung Rimam utob be, ikyaen ti, Kusung si awaen ti a yer riyaen utob-ni ti tatso baa, ani na si ande Rimam ti wu ba saen-ni ta uwae usir itinwangru.

³¹ Ande ti ku fab uwae, u ku tso rinae, u ku fwan kibyag tetso ā fxae yi! Ni byag-ni kibyag te atso cwucwo be, ti ni txun-ni atso asu cwucwo be! Ni sa-ni atso kuka cwucwo be!

³² Iken ti nyang si ti ni na nde iken ti tinyang te atso u ku nung risi atso. Ni yata na atso riraen-ni pangma ti Rimam yata na pu wu ani uwae wande na Kristi.