Afisa 2 - Kutsingken Ira Rimam ti Saen Kyag

Rimam ku Nda Ande Unyang Tishe

¹ Kute ayi pangma ani na cwucwu, ikyaen ti ani nyatsa icwe na Rimam u nde ikentitibi.

² Kiye wu, ani ku kyang ikyin uwae fengo titibi na utense ike. Ani ku nae risu riben na awu unde ti uwe asung titibi, awu ti ku nde wande uwae utob na ande ti kpag risu te Rimam ba kwar ti yaka ne.

³ Kubenti, ti kucang ati te ba pang atso. Ati ama sa uwae tsi risu iken meme ti ijwe-ti utob-ti ku sha. Ikyaen usom ti som-ti ayine, rinae Rimam ta kang risu-ti, pangma ti ayi ta risu ande ti tsitsi.

⁴ Amaa ayibrisi na Rimam ko timambe. Ure-wu uwog-ti si-yi ti ti ri be.

⁵ Ikyaen ti, ko ti ikentitibi-ti nda ti kafe ande ti cwucwu, awu nda ti unyang tishe pangma ti awu nda Yesu Kristi. I si ikyaen rinyangwae na Rimam ne ani nwangru.

⁶ Ama Rimam kunn nwunn ti te Kristi te atso u nda ti uwae kuru-wu ti apupwen akwen.

⁷ Awu nde iken yine ikyaen ti wu na tatso ande meme uwae kiye ti ku ba uwe baa, rinyangwae-wu ti awu nda ti uwae wande na Yesu Kristi na si rifunn ti itikunntsi-yi ta-yi be.

⁸ I si ikyaen rinyangwae na Rimam ti ani nwangru kiye ti ani ru uwae kinjo uwog na Yesu Kristi. I si-yi ikyaen itikwab-ni ti ani nde be, ayi si iken ti Rimam nde na ni ti rinyangwae.

⁹ Ayi si-yi wande ti tinyang iki ti ati nde itawe Rimam nwangru ti be, be ande u ndub ijwe atang.

¹⁰ Ati ti risu-ti si kujwowande Rimam. Awu mam ti yi fengo na Yesu Kristi ti ti na sa ijwe-ti na iken ti tinyang ti ti nde, pangma ti awu myae mam tsi ti kute baa, ati na u nde yi.

Ande ti Ren te Kristi Si Kinjo

¹¹ Ani ande ti a mbae-ba ani uwae rishi na Mbayawuda be, ni tangsom ti usom ti som-ni ti kute. Ati Mbayawuda ku ri baa, ani na si ande ti ajib ikyaen ti, ani tsen-ni kutxin be. Ati na si ande ti Rimam ikyaen ti, ati na ku tsen kutxin, ko ti kutxin ti tsen si nyang iken ti ande ku nde rimenn ijwe-ba amam, si-yi iken na utob be.

¹² Ti kute ani te Kristi ta-ni te atso be. Ani si arum uwog ande ti Isirela u fa-ni uwae ande ti Rimam yer unju te ba be. Uwae usom ti som-ni uwae utense wune, ani site-ni ti iken iki ti ani u sa uwae tsi atang be. Ko Rimam, ani nung-ni awu be.

¹³ Amaa tine, ti ani te Yesu Kristi ren te atso, ani ande ti kucang ani ta fengo ti rwen te Rimam, a pu ni ru ba fifer te wu ikyaen na anying na Yesu Kristi ti yaen mbub ikyaen-ni.

¹⁴ Ikyaen ti, awu Kristi sa kujimshwur sang ba pu wu kutampwa-ti, ati Mbayawuda ti ani ande ti si-ni Mbayawuda be. Awu kyae nyang ti ikyaen ti, ati te ni na si iken kinjo. Iticwu-wu risu kutuku ti cice si iken ti byinn mbub kupwe ti kata ni te ti, awu kupwe ti nda ti ku ta rika te atso kute.

¹⁵ Awu twenji icwe na Mbayawuda ti ira meme ti a bae risu fengo ti a ku putsa yi, u sa kumbub rishi ande ifaen bane u mam utso ande kinjo ti tishe ruye atang yi fengo na usom ti aba ku som te wu. Ti fengo wune ama awu shir kujimshwur ru ba kutampwa-ba.

¹⁶ Yi fengo na iticwu-wu risu kutuku ti ta cice awu pu meme-ba kafe ru ba uwog Rimam u sa utso ande ifaen kafe kinjo u twenji pu wu rika ti ta kutampwa-ba.

¹⁷ Ayine ti si fengo ti awu nde ne awu ru ba ya iskin ira na kujimshwur te ande meme, ani ande ti ta rurwen te Rimam kute, fa ti ati Mbayawuda ti ta fer te wu.

¹⁸ I si ikyaen Kristi titawe ati ande ti tsi txi txi tu fengo kinjo ti ati u ru ba tsi uwe Itse-ti Rimam. Fengo kinjo wune si Kusung Rimam.

¹⁹ Ikyaen na yine, ani ande ti si-ni Mbayawuda be, ani si-ni ande ti ise ko arum cwucwo be. Ani kafe pu ni ande ti uten. Ani fa uwae ande ti ta ushi kununn Rimam.

²⁰ Cwucwo ani, fa te Mbayawuda si pu ni kusog ti a mbye som tsa risu umbyi kusog ti a ta tsi kute. Umbyi kusog wu si ande ti atom ti ande ti ku ya iskin ira Rimam. Kusog wune, kutxom ti ku nda wu kpakang si Yesu Kristi.

²¹ Awu ti ku nda ati ande na Rimam tu itiren-ti tetso. I si awu Itsekuru-ti ama ti ku nda ti meme-ti ser riser uwae Ira Rimam, pangma kusog ti a ku mbye wu ku ru ru yi uwe uwe, ka sang kiye ti ati kafe pu ti kusog tiyang ti a sa wu tsi ti ande na fen Itsekuru-ti Rimam atang.

²² Uwae risu ti ren te Kristi, ani ama si pangma biriki ti a pu yi mbye fa atang. Ama kiye ti a mbye mam wu, Rimam ti risu-wu u som atang yi fengo na Kusung-wu.