Afisa 1 - Kutsingken Ira Rimam ti Saen Kyag

Ira ti Kunnji

¹ Ame Bulus, ti Rimam tsab tsi ti m na si unde ti atom na Yesu Kristi, ame bae ku na ni ande na Yesu ti ta uten ti Afisa, ani ande ti ku putsa Yesu Kristi ti utob kinjo.

² Itse-ti Rimam, ti Itsekuru-ti Yesu Kristi ā nda ni itinyang ti kujimshwur.

Itinyang ti Rimam ku Nda Ande ti Ren Ure te Kristi

³ Ati ku teb rinyi na Rimam ti si Itse na Itsekuru-ti Yesu Kristi ikyaen ti, uwae usom ti som-ti te Kristi, awu sa iken ti tinyang ti tsotso ti si ana kuru-wu ti apupwen na ti.

⁴ Ti ti a kyae-ba utense khika be, awu tsab ra mam-wu ati mam baa, ikyaen Yesu Kristi, ati na si ande ti ana-wu, ikyaen ti ti na som usom ti sisaen u nde-ti iken iki ti si titibi uwe-wu be.

⁵ Awu ye ure te ti ti kucang akwen u myae mam-wu mam baa, awu na u sa ti kafe anyisu-wu ikyaen kujwo wande na Yesu Kristi. Ayi nyang uwae-wu ti wu na u nde iken yine.

⁶ Awu nde yine ikyaen ti a na teb rinyangwae-wu ti site kuko nee awu nda ti uwae Umbae ti utob-wu, Yesu Kristi.

⁷ I si ikyaen anying Yesu Kristi né a saen ti ta uwae apyi u yata na ti ikentitibi-ti. Kubenti, rinyangwae na Rimam si rifunn ti ko timambe.

⁸ Ama rinyangwae wune, awu sa yaen si ba risu-ti ruye uwae rifunn-wu ti apupwen. Uwae ben-ayib ti ira ti nung-wu Rimam,

⁹ awu nde iken ti awu myae tsi ti kucang u tatso ti ira ti kitam-wu pangma ti awu myae mam wu mam baa, awu na u ru ba nde yi ti kujwo wande na Yesu Kristi.

¹⁰ Ira ti awu myae tsi si ti, asiti kiye ti awu sa tsi a nde pu wu, awu u kyae nyang meme iken ti awu mam, iken ti ta apupwen fa ti ayi ti ta riben ike u sa yi kyang ikyin te atso ikyaen wande na Yesu Kristi, awu ti ta risu-yi meme.

¹¹ I si ikyaen na Kristi ti Rimam tsab ti tsi ti ti na ci rifunn-wu. Ayine si kumyae na Rimam, awu ti ku nda iken meme kyang ikyin pangma ira ti awu myae tsi.

¹² Awu nde iken yine ikyaen ti ati Mbayawuda, ti si ande titawe sa uwae tsi uwog na Kristi, na u sa kuko na rinyi-wu.

¹³ Ama ani ti si-ni Mbayawuda be fxen pu ni ira ti tinyang risu itinwangru-ni ama. Ti ani fxen ira ti kubenti yine, ani ru uwae kinjo uwae-yi. Rimam taen ni awaen uwe yi fengo na Kusung ti Saen kyag ti awu sa sang utob-ni, nee awu yer unju risu-wu ti kucang.

¹⁴ Awu Kusung ti Saen Kyag wune, Rimam sa wu sang utob-ti ikyaen ti ti na nungye baa, rifunn ti awu sa tsika ikyaen-ti na ku ba isim, ati na u tu kang kutunn-ti isim kiye ti Rimam a nwangru tag ande ti si ana-wu, u teb rinyi-wu ikyaen kuko-wu.

Itijwam Bulus Ikyaen na Ande ti Afisa

¹⁵ Ikyaen yine, ti kucang akwen ti ame fxen baa, ani na ku ru kubenti uwog Itsekuru-ti Yesu, ama ani na ku ye ure te meme ande na Rimam,

¹⁶ ame tsikunn ti ku nde fxaefa na Rimam ikyaen-ni ko kiye titini. Ame ku tangsom te ni ko kiye titini ti ame ku jwam Rimam

¹⁷ u tsikunn ti ku jwam Rimam, awu ti site kuko ti skeb tag u si Rimam na Itsekuru-ti Yesu Kristi. Ame ku jwam wu ti wu na nda ni Kusung-wu ti Sisaen, u nda ni ben ayib u tatso ni Rimam, ikyaen ti ni na nung nyang wu.

¹⁸ Ame ku jwam wu ama baa, ayib-ni a mbubta, ikyaen ti ani na nungye imbyi iken yi ti ani sa uwae tsi atang, ne awu kunn ni ru ba ikyaen-yi. Ame ku jwam ama baa, ani na u nungye itso rifunn ti kuko ti tsiji ni uwe, ani fa ti ande-wu ti tsitsi.

¹⁹ Ame ku jwam cwucwo ti ni na nungye itso wande ti skeb titag ti Rimam ku nde uwae utob ande ti ku ru kubenti uwog-wu. Wande ti kuko ne si si ayi ti awu nde

²⁰ kiye ti awu kunn nwunn Kristi uwae iticwu u sa wu som kujwo rici-wu uwae kuru-wu apupwen akwen.

²¹ Tine Kristi ta risu meme akwe ti ande ti kuko, ti meme iken ti site rurob uwae utense ike. Meme ande ti site ande umbyi-ba patag, awu nae ukwe risu-ba. Awu ta uwe meme iken ti ande ku fwa yi rinyi baa, iken ti kuko uwae utense tine, ti uwae kiye ti ru ku ba.

²² Rimam nda wu nae ukwe risu iken meme u sa wu na kumbub ande ti ana-wu baa, awu na ta risu iken meme.

²³ Aba si pangma rimenn ijwe-wu. Awu si risu. Yi uwog-ba, awu kumumunn, ko ti awu ti risu-wu si unde ti ku kumunn iken meme ti ta apupwen ti riben.