2 Timoti 4 - Kutsingken Ira Rimam ti Saen Kyag

¹ Ame ku ri te fu uwe Rimam ti uwe Yesu Kristi, awu ti u pwen ande meme rikwen, ande ti tsi ser ti ande ti cwucwu, awu ti u kafe ba uwae kujwokwe-wu,

² nya iski ira Rimam te ande. Num-fu num te Ira Rimam ti ti ri be, ko afu a tu riyae ko afu a tu-fu riyae be. Tatso ande fengo ti kubenti ti fwan ba kibyag risu ikentitibi. Ri bom ba utob uwae iken ti kwen ti afu ku kwen na ba ti utob ti ye.

³ Ikyaen ti, kiye ru ku ba ti ande u naa-ba atong te iken ti kwen ti kubenti be, ama aba u putsa iken ti nyang uwae-ba u kunn byir ande ti ku kwen na ba iken ti aba ku sha ti a fxen.

⁴ Aba u kafe isim ta ira ti kubenti ti aba ku fxen u sa utob-ba tsi risu ira ti ukaen ti ande mam ku ri.

⁵ Amaa, afu Timoti, iken ti afu ku nde meme, kab ira risu-yi titawe. Ngwa rikaen-fu ti utob ti ye, wande-fu ā si wande na unde ti ku sa Ira Tinyang ri te ande. Nde tag iken meme ti ta uwae wande na upyi Rimam.

⁶ Ayi a si ti ana-m, kiye fer mam pu yi ti a u sa unyang-m ru ye pangma iken ti a ku nda Rimam. Usir ru ku ba ti ame u ya utense wune ta.

⁷ Ame kwab pu m ti kpakang-m meme uwae utense wune. Ame ter inyae ka furu pu m. Ame ye su pu m uwae kinjo ti ira Rimam.

⁸ Tine, kujwojang tsi ku ji m, ayi si kubur ukwe ti Itsekuru-ti Kristi, ufwa rikwen ti kubenti u sa bur m usir ti ricwunnkyi. Si-yi nyang ame amam be, amaa, kwer ti meme ande ti tsi utob risu itiba-wu.

⁹ Kwab ti ru ba uwog-m ti ritsen.

¹⁰ Ikyaen ti, Demas ter ya me ta pu wu; iken na utense wune taen wu ayib. Awu nwunn ru pu wu yi Tesalonika. Kiresen nwunn ana-wu ru pu wu yi Galatiya. Titus ama ru pu wu yi Dalamatiya.

¹¹ Si nyáng Luka amam ti ta te m ike. Pu Markus kyang su ba. Awu site itindeya timambe uwog-m ikyaen wande.

¹² Ame tom Tikikus ru pu m yi Afisa.

¹³ Kiye ti afu a ru ku ba, ye pu kutupwa rijwen-m ti ame teya ta kujwo Karpus uwae uten Turowas, ti pu atsingken-m, ti apwa ti a bae iken atang, ba na m.

¹⁴ Alezanda ti ku kwen kufang nde me ikentitibi. Rimam u nda wu kujwojang iken yi ti awu nde ne.

¹⁵ Som ti ujwin ti nung wu nyinyang, ikyaen ti, awu ku tsi ikub te ira ti ati ku ri te ande.

¹⁶ Unde iki tsi te-wu ame kiye ti a kunn me rikwen ti kucang be. Meme-ba ter shag u ya m ta kinjo-m. Rimam ā yata na ba.

¹⁷ Amaa, Itsekuru te m ta tetso u nda m ribom utob ti m na tsag Ira Tinyang-wu te ande ti si-ba Mbayawuda be, ti meme-ba ā fxen. Rimam nwangru m unju itumu.

¹⁸ Itsekuru u nwangru m uwae ira titibi meme u pu me ru ka sang kuru-wu ti apupwen nyinyang. Kuko ā si ana-wu tsi kunn ike ru fe yi uwe. Ayi ā si ahan.

¹⁹ Kunnji Birskila ti Akila ira, ti ande ti kununn Onesiforu meme.

²⁰ Erasitu som ti Korinti. Ame ya Turofimu ta ti Miletus ikyaen ti awu nae kicaeb.

²¹ Kwab ti ru ba titawe ti ufam a fe. Yubulus ti Pudens ti Linus ti Kalodiya ku kunnji ni ira. Ameinja ti tsitsi ku kunnji ni ama.

²² Itsekuru ā te fu som tetso. Itinyang-wu ā te ni som te atso.