2 Timoti 3 - Kutsingken Ira Rimam ti Saen Kyag

Usir ti Ricwunnkyi

¹ Nung nyinyang baa, usir ti ricwunnkyi, rikaen ti tsotso u munnae.

² Ikyaen ti, ande u site ure te risu-ba amam, u ku sa aser tsi uwe, u ku ndub ijwe ku saeru ande meme. Aba u txun ande asu, u fxen-ba ira abitse-ba ti abiya-ba be. Ande u nung-ba itinyang ande ti ku ndeya ba be, u ku kyen-ba Rimam be.

³ Aba u site-ba ure te unde iki be, u nung-ba risi ande be. Ama aba u si ande ti ku ri ira titibi risu ande ku kyang, u ye su tu-ba ijwe-ba be. Aba u si ande ti rinae ti ku sha-ba iken ti tinyang be.

⁴ Ande u kafe isim ta arwan-ba, u nde iken ko ufunn ufunn. Aba u ndub risu, u site-ba ure te Rimam be, amaa, utob-ba u tsi risu utug utense.

⁵ Aba u ku kunn rinyi Rimam ti unju ti unju ukaen amen, u pyir-ba kuko na ira Rimam. Ka ijwe te utso ande bane.

⁶ Ariki uwae-ba ku tam sang anunn ande, ku kyaefa anda ti kútútug ti ikentitibi ci ra pu yi utob-ba, u ku shir pu ba sang ijaen ikentitibi ti tso tso.

⁷ Ko ti aba ku kwab ti a u nung iken, a nde tu-ba ti a u nung ira ti kubenti be.

⁸ Pangma ti Yanes ti Yambires tsi ikub te ira Musa ti kute, ti mbwe-yi ama, abane ku shaen ira ti kubenti. Utob-ba ku tang nyang ira titibi amam. Uwae kinjo-ba si rifen.

⁹ Amaa, aba u ko ka-ba uwe be, ikyaen ti, unde titini u nungye iken ti askwab-ba yi, pangma ti ana Yanes ti Yambires.

¹⁰ Amaa, afu Timoti, afu putsa pu fu iken ti kwen-m, ti usom ti som-m, ti iken ti ame sa uwae tsi risu-yi. Afu nung uwae kinjo ti ame site, ti utob ti ye-m, ti ure ti ame site, ti fa ti itsi ti tsi ti kpakang ti ana-m.

¹¹ Afu nung rikaen ti tu m yi uten Antiyok ti Ikoniyum ti Lisitira nee ame tsi ti ribom uwae-yi meme. Amaa, Itsekuru-ti nwangru me uwae-yi meme.

¹² Ande meme ti ku sha ti a u putsa Rimam u ru uwae kinjo uwog Yesu, a u nde kang ba rikaen.

¹³ Amaa ande titibi ti ande ti ku ndub ijwe ku kyaefa ande, ikentitibi-ba u ko ku fufa ru fife yi uwe. Aba u kyaefa ande. Ande u ku kyaefa ba ama.

¹⁴ Amaa, ana-fu Timoti, ru yi uwe uwae ira ti kubenti ti a kwen na fu ti afu ru uwae kinjo risu-yi. Afu nung pu fu ande ti kwen na fu iken yi,

¹⁵ u nung pu fu ira ti a bae uwae Kutsingken Rimam ti ti afu si umbae tinying ba ku sang tine. Afu nung pu fu baa, ayi u nde tu ti yi kwen tso fu fengo na itinwangru ikyaen uwae kinjo ti afu ru uwog Yesu Kristi.

¹⁶ Meme ira ti a bae uwae Kutsingken Rimam si ira ti Rimam jwu uwae kusung sang unde. Ayi si iken ti pang atang ti a u kwen na ande iken uwae-yi, u ku fwan ande kubyag atang, u ku kyaenyang ande, u ku tatso ande itso usom ti som ti pang atang uwe Rimam,

¹⁷ ti unde na Rimam ā nde wande ti tinyang te meme isu ti ta kujwo-wu.