2 Korinti 9 - Kutsingken Ira Rimam ti Saen Kyag

Itindeya ti a ku Tom Ru ka Na Ande ti ta Yawudiya

¹ Ayi si-yi kheng ti ame na bae yi bae na ni titawe ni na ndeya ande Rimam be.

² Ame nung pu m baa, ani na sa utob tsi pu ni risu ira yine ti kucang. Ame sa ira-ni pam te ande ti Makedoniya, baa, “Ameinja-ti ti ta Akaya byir tag pu ba ana-ba ti kusang ti wur ru ti a na u ndeya ande Rimam.” Ijwe ti mae-ni nda pu yi ariki yang akwen uwae-ba nwunn ritsen.

³ Ama tine ame tom ameinja-ti bane ku ba ti a na ndeya ni, ikyaen ti ira ti ati ku ri risu-ni na si-yi ukaen amen be, amaa, pangma ti ame ri, ani mae pu ni ijwe ti ni pu rinyangwae-ni na ba kujwo.

⁴ Ayi a si-yi ahan be, asiti ande ti Makedoniya iki a putsa m ba uwog-ni u ba nung baa, ani na kyae-ni ijwe ikyaen wande yine be, ati u wae rukwae timambe ikyaen ijwe ti ati ndub risu-ni. I si-yi ati amam ti u wae rukwae be, ani ama u wae rukwae.

⁵ Ikyaen yine, ame kab baa, ayi na u nyang skeb ti ame na u tom ameinja-ti bane na ru ba uwe-m ti a na kyae byir rinyangwae-ni ti ani ri baa, ani na u nde. Kiye ti ame á ba, a nde mam pu ba iken meme, ayine u tso baa, ani na pu iken yi na ba ti utob kinjo, si-yi ti unde iki tur ni tur be.

Rinyangwae ti ti Nda

⁶ Ni tangsom baa, unde ti a tom iken pang, awu u bunn pang ama. Unde ti a tom yi kuko, awu u bunn kuko ama.

⁷ Unde titini uwae-ni ā sa rinyangwae-wu ru ba pang ti iken ti utob-wu tatso wu. Ayi ā si-yi te uwae ti kab be, ayi ā si-yi pangma a na ku tur ni tur be ama. Ikyaen ti, Rimam ku tsen utob te ande ti ku nda wu rinyangwae ti utob ti tsen.

⁸ Rimam site kuko ti wu sha na ni iken ti tinyang yang-yi akwen ti ititsikunn-yi ta-yi be. Ikyaen ti ko kiye titini ani u shanum-ni te iken iki be, ama ani u site iken ti ani u nde wande ti tinyang ti tsotso atang.

⁹ Pangma ti a bae uwae Kutsingken Rimam baa, “Awu ku ndab ta kujwo-wu na ande ti rikaen ti utob-wu kinjo. Wande-wu ti tinyang, tsi kukunn ru fife yi uwe.”

¹⁰ Rimam ku sha na unde ti ritom itso iken ti awu u ta uwae risaen-wu, u ku sha na wu wuci uwae risaen atang. Ani ama, awu u nde wande te iken ti ta kujwo-ni u nda yi ko fufa. Awu u nda ni bunn iken ti tinyang yang-yi akwen ikyaen wande ti tinyang-ni.

¹¹ Awu u nda ni rifunn ti kuko ikyaen ti ni na site iken ti ani u nyang uwae na ande iki atang ko kiye titini. Yi kujwo wande-ti, rinyangwae-ni yine u nda ande nde fxaefa na Rimam.

¹² Wande yi ti ani ku nde ne si-yi nyang ti ande na Rimam u tu iken ti aba shanum be, itinyang-yi skeb ahan. Ayi si ti ande yang-yi akwen u tatso fxaefa-ba ba uwog Rimam ama.

¹³ Yi uwae wande ti tinyang ti ani ku nde ne, ani ku tso baa, ani na tsi ting ting uwae ira tinyang na Kristi. Ande ba ti u tu rinyangwae-ni wune, u sa kuko na Rimam ikyaen uwae ti tsi-ni ayine, ti utob ti nae riben-ni. Aba u nde fxaefa na Rimam ama, ikyaen itinyang ti kuko-ni ru ba uwog-ba, ti uwog ande Rimam ti tsitsi.

¹⁴ Ama aba u jwam Rimam risu-ni ti utob-ba meme u tso ure-ba ba uwog-ni ikyaen ti, aba u nung baa, Rimam na nda ni ayibrisi-wu ko timambe.

¹⁵ Ati ku nde na Rimam fxaefa ikyaen rinyangwae ti awu nda ti, ti unju-ti ko-yi ti ti u nde na wu fxaefa risu-yi be.