2 Korinti 8 - Kutsingken Ira Rimam ti Saen Kyag

Bulus ku Teb Ande ti Makedoniya

¹ Ameinja, ati ku sha ti ni na nung fengo ti ande na Yesu ti ta Makedoniya tu itinyang na Rimam.

² Aba ngwa rikaen ko timambe, amaa, utob ti tsen-ba ko shishag, ikyaen yine aba pu rinyangwae-ba ba ikyaen itindeya na ande iki, ko ti aba ti risu-ba si ande ti rikaen.

³ Ame ku ri te ni kubenti, ande ti Makedoniya pu iken ba uwog Rimam ti utob-ba kinjo, unde iki jwam-wu aba jwam be. Aba kwab u nde iken ti aba nde tu, u ba nde kyi iken ti skeb kyi cwucwo!

⁴ Aba jwam ti, ti a na u tu riyae ti a na u ndeya ande Rimam ti ku ngwa rikaen.

⁵ Aba kwab skeb pu ba iken ti ati sa uwae tsi baa, aba na u nde yi. Ti kucang aba sa ijwe-ba meme na Itsekuru-ti; ti fa kyi, aba sa utob bur fa ti uwae ure, pangma ti Rimam ku sha.

⁶ Ikyaen yine ati jwam Titus ti wu na ba uwog-ni, ama ti awu na ndeya ni ti ni nde tag kujwo wande ti tinyang ti ani ku nde ne, nee awu bag yi uwog-ni ti kucang.

⁷ Ani ande ti Korinti ta uwe uwae iken ti ani ku nde meme. Ko ayi a si uwae kinjo ti ani ku ru, ko ayi a si ira Rimam ti ani ku ri te ande, ko itinung na ira ti kubenti, ko ayi a si itikwab-ni fengo Rimam, ko ayi a si ure ti ati ye nwunn uwae-ni, ani ti skeb tag.

⁸ Ayi si-yi icwe ti ame nda ni be, ame ku tso ni itso itikwab ti ariki ku kwab ti ira rinyangwae yine ikyaen ti ame na nung ko ure-ni si kubenti pangma ana-ba.

⁹ Ani nung pu ni rinyangwae na Itsekuru-ti Yesu Kristi. Ko ti awu site rifunn, awu sa ijwe-wu kafe unde ti rikaen ikyaen-ni, ikyaen ti awu u sa ni kafe ande ti rifunn uwae rikaen ti awu ngwa.

¹⁰ Ame u ri te ni ira ti ame ku kab risu ira yine. Kuyakwen, ani ti si ande ti tawe sa utob na wande na itindeya yine. Ani ti si ande ti kucang ti ye kujwo atang.

¹¹ Ikyaen yine ame ku jwam baa, pangma ti ani ye kujwo atang ti ribom-ni meme ti kucang, ni nde yaen yi tine ti ribom-ni meme ama. Ni kwab pang ti iken ti ta ajwo-ni.

¹² Asiti unde a cwe ti awu u ndabta kujwo-wu na Rimam, Rimam u paembe iken ti awu site. Awu ku sha-wu ti unde na nde iken ti skeb kpakang-wu be.

¹³ Uwae iken ti ame ku jwam ne, ame ku sha-m ti m na u ye si ariki isu ama u ye ana-ni ko fufa be.

¹⁴ Ani site iken kujwo tine. Kiye ru ku ba ti ariki u ba site rifunn skeb ni skeb. Kiye wu, aba ti u pu isu-ba ba ndeya ni ama, ikyaen ti ayi ā pang atso uwog-ni te ba meme.

¹⁵ A bae baa, “Unde ti byir iken yang-yi site-wu iken ti ko skeb wu skeb be. Unde ti byir iken pang ama shanum-wu num be.”

Bulus Tom Titus Ru Korinti

¹⁶ Ati fxaefa ti Rimam ti nda Titus utob ti awu na u ndeya ni pangma ti ati ku sha ti ti u ndeya ni ama.

¹⁷ Kiye ti ati jwam wu baa, awu na ru ba ndeya ni, awu cwe ti inyae. Kubenti, ti ti ati jwam-ti awu khika be, awu myae mam pu wu ti wu na u ru yi uwog-ni.

¹⁸ Ati tom inja-ti iki putsa Titus ku ba. Awu si unde ti ande ti putsa Yesu ko aka patag ku teb rinyi-wu ikyaen ira ti tinyang ti awu ku ri.

¹⁹ Cwucwo, andufu ande na Rimam tsab sa pu ba wu baa, awu na u putsa ti ru yi Urushelima ikyaen ti awu u ndeya ti kiye ti ati u pu rinyangwae yine na ba. Yi uwae wande yine ati ku tso kuko na Rimam. Cwucwo ati ku tso baa, ati na site utob ti ati u ndeya ande.

²⁰ Ati ku sha ti ati u nung afxen-ti riben nyanyang, ikyaen ti unde iki ā nung-wu ati te riraen risu fengo ti ati ku nde te rinyangwae ti ko pu yi ne be.

²¹ Ati ku sha ti ati u nde wande ti kubenti uwe Itsekuru-ti ti uwe ande meme.

²² Ati ku tom inja-ti iki ti fa ti ita putsa ba ama. Awu si unde ti ku kwab uwae fengo Rimam ti utob-wu meme, pangma ti ati nung ti ayib atsepu yang-yi akwen. Tine ti awu nung baa, ani ama ku kwab ahan, ijwe-wu mae ti awu u ba ndeya ni.

²³ Ayi a si ira risu Titus, awu si urwan wande-m ti te m ku nde wande tetso uwog-ni. Ameinja-ti ti tsitsi ama si ande ti atom na ambug ande na Rimam. Yi uwae wande ti aba ku nde ne, aba ku sa rurob na Kristi.

²⁴ Ikyaen na yine, ame jwam ni baa, ni ye ure te ande bane, ikyaen ti ande na Yesu ti ta ko aka ā nung ama baa, ati na ku pam-ti ipam risu-ni ti ukaen amen be.