2 Korinti 7 - Kutsingken Ira Rimam ti Saen Kyag

¹ Ande-m ti ayib ricwu-m ti Rimam yer unju yine meme te ti, ame ku jwam baa, ti na jwo saen ijwe-ti. Iken meme ti ku nda ijwe-ti ko utob-ti kafe iken ti ku txi iyib uwe Rimam, ti yi ta. Ti kwab ti ti si ande ti sisaen uwe Rimam ti ti som usom-ti uwae ikyenricwu-wu.

Bulus ku Tsen Utob

² Ame ku jwam ni ande-m, ni kyangte ti uwae riyaen utob-ni. Ati raen-ti unde iki uwae-ni ira be, ati ndembeb-ti usom ti som unde iki be, ati ci-ti iken unde iki ti kufum be.

³ Ame ku ri-m ira yine ti ame u tu ni ti riraen be, ikyaen ti, pangma ti ame ri te ni kucang, ani si ande ti ayib ricwu-ti. Ko ayi a si iticwu, ko itiser, ati te ni ta te atso.

⁴ Ame ru kubenti uwog-ni ko timambe. Ame ku pam ipam risu-ni. Ko ti ati ta uwae rikaen, utob-m nae riben kushwur. Utob-m tsen porr.

⁵ Isim ti ati ru ka sang Makedoniya, ati pu ti unyang be, ko tikiyib. Rikaen ti tsotso ru ba tu ti. Ande ku fwan kibyag te ti yaka ti ucwe. Uwae utob-ti ama, se ikyenricwu.

⁶ Amaa Rimam ku ri jim utob ande ti uwae-ba ndembembeb. Awu ri jim ti utob ama yi fengo na itiba na Titus.

⁷ Ayi si-yi nyáng uwe Titus amam ti nda ti utob ti tsen be, ira ti awu ba ri te ti risu-ni tsen-ti utob ama. Awu ri tag te ti ira risu itso utob ti jim ti awu ti risu-wu tu uwog-ni. Awu ri te ti ira ure-ni ti jang ken tag risu-m. Awu ri te ti ira na uwae-ni ti ndembeb ikyaen usom ti som-ni te m. Awu ri te ti itso utob ure ti ani sa tsi risu-m u ku sae m te ayibrisi ikyaen iken ti ku tu m. Ayine nda m ame tsen utob skeb ti kucang.

⁸ Ko ti ame ndembeb ni utob uwae kutsingken ti ame bae ru ka ni kucang, ayi caeb-yi ame uwae ti ame bae yi be. Kubenti, isim ti ani tu yi, ayi caeb m uwae ikyaen ti ame nung baa, ayi ndembeb ni utob uwae kiye pang.

⁹ Amaa, tine ame ku tsen utob. I si-yi ikyaen ti ame na ndembeb ni utob be, amaa, ikyaen ti utob ti ti ndembeb-ni nda ni kafe isim ta ikentitibi-ni. Utob ti ndembeb yine ru uwog Rimam ba, ikyaen yine, iken ti ati nde ne nde caeb-yi ani be.

¹⁰ Itso utob ti ndembeb ti ru uwog Rimam ba ku nda unde kafe isim ta ikentitibi-wu u kafe ba uwog Rimam ti Rimam na nwangru wu. Unde u kab-wu uwae risu ayine be, amaa itso utob ti ndembeb ti ande ti nung-ba Yesu be ku nde, ayi ku shir iticwu ru ba risu-ba.

¹¹ Ande-m! Nung itso itinyang ti ru ba tu ni ikyaen utob ti ndembeb yine. Ayi nda ni ani sa utob-ni na iken na Rimam si-yi ti ti ri be. Ayi nda ni ani byir utob risu iken ti ani nde u ku kwab ti ni tso ande baa, ani na si ande ti kubenti. Ayi nda ni ikyenricwu. Ayi nda ni ani ku sae ayib itiba-m ti utob-ni meme. Ayi nda ni kwab timambe fengo Rimam. Ayi nda ni ani ku kwab ti ni kyae nyang riraen ti ariki nde. Uwae ira yine meme, ani tso baa, ani na nde-ni ikentitibi be.

¹² Ikyaen na yine, ame ku kab baa, ko ti ame bae na ni kutsingken wune, ame bae-m awu ikyaen unde wu ti raen ira yi amam be. Ayi si-yi ikyaen unde wu ti a raen wu ira be ama. Ame bae wu ti ame u tatso ni paenine uwe Rimam itso ure ti ani site ikyaen-ti.

¹³ Ayine si iken ti nda ti ribom utob. Si-yi ribom utob amam ti ati tu be. Ati tsen utob ikyaen utob ti tsen ti Titus tu uwae itindeya ti ani ndeya wu. Kubenti, ani sa utob-wu nae riben kushwur.

¹⁴ Ti kucang-yi ame pam ipam te wu risu-ni, ama ani nda-ni ame rikwae ti wae be. Ame ba nung tine baa, ijwe ti ati ndub uwe Titus risu ni, kumunn pu yi kubenti-yi, pangma ti ira meme ti ati ri te ni si pu yi kubenti.

¹⁵ Tine, awu site ure te ni ti ko ku fufa ru fife yi uwe, ikyaen ti awu ku tangsom te fengo ti ani nae risu riben na wu, u nda wu rurob u fxen wu ti ikyenricwu.

¹⁶ Ame ku tsen utob ikyaen ti, ame u nde tu ti m sa ijwe-m konje ni ko kiye titini.