2 Korinti 4 - Kutsingken Ira Rimam ti Saen Kyag

Bulus Ri baa Awu na Raen-wu Ira Be

¹ Ati u yer-ti anying utob be, ikyaen ti, Rimam ti risu-wu nda ti wande yine uwae ayibrisi-wu.

² Uwae wande-ti yine, ati ku nde-ti itsab ti kitam be. Ati pyir pu ti itso iken ti ku wae rukwae yine. Ati ku kyaefa-ti unde iki be. Cwucwo ati ku yer-ti itikong uwae ira Rimam ti ati ku ri be. Ati ku som usom ti kubenti uwe ande meme u ku ri ira te ba paenine uwe Rimam, ikyaen ti unde titini ā nung kubenti na ira yi ti ajwo-wu.

³ Asiti ira Rimam ti ati ku ri na si pangma a na burkyi yi kyi, kubenti, a burkyi yi nyáng uwog ande ti ta fengo iticwu.

⁴ Aba si ande ti ru-ba uwae kinjo be, ikyaen ti, Shetann ukwe utense wune byi kyi pu wu utob-ba, ikyaen ti aba ā nung-ba uwog ti paenine ti ku ba uwog-ba be. Uwog ti saen kyag ne si Ira Tinyang risu Yesu Kristi, awu ti site kuko, ku tso ti itso unde ti Rimam tsi.

⁵ Ira yi ti ati kyang ku ri te ande si-yi ira-ti be. Ayi si ira risu Yesu Kristi wu ti ati ku ri baa, awu na si Itsekuru-ti. Ati ama si anyisu afxen-ni ikyaen na Yesu.

⁶ Ti kute, Rimam ri baa, “Uwog ti paenine ā ruye uwae kufub.” Si sí awu ti nda pu wu ati uwog ti sisaen uwae riyaen utob-ti, ikyaen ti ati ama na u tso ande ti tsitsi kuko ti riyinn ti awu site, ayi kuko ti riyinn ti a ku nung yi kutxuwe Yesu Kristi.

Atom Rimam ku Ngwa Rikaen ku Tsen Utob ama

⁷ Ati ande ti tu rifunn yine, ati pangma atutong ti tsi-yi tsi be ku mbumbub. Ayine si ikyaen ti ti na nung baa, kuko ti skeb titag ti ta uwae-ti ne na si ana Rimam, si-yi ana-ti be.

⁸ Ati ku ngwa rikaen ko kiye titini, ati sa-ti uwae tika be. Kiye iki ati ku kab uwae, ati ku yer-ti anying utob be.

⁹ Ande ku nda ti rikaen ti tsotso, amaa Rimam ya ti ta-wu be. Ko ti a byinn ti si riben, a wen-ba ati be.

¹⁰ Ti ati a kyang ku ru, ayi pangma iticwu na Yesu ta uwae ijwe-ti ko kiye titini. Ayine si ikyaen ti ande ā nung baa, itiser Yesu na ta ijwe-ti ama.

¹¹ Ti ti ati tsi ti user uwae utense ike, ati ta unju iticwu ko kiye titini ikyaen ira Yesu. Ayine si ikyaen ti ande ā nung itiser ti ana-wu uwae ijwe-ti yine ti u wur ru ru.

¹² Nee iken ti nde, uwog-ti, ati ta unju iticwu ikyaen ti ani na tu unyang.

¹³ A bae uwae Kutsingken Rimam baa, “Ame ru uwae kinjo, nee iken ti nde ame ri ira.” Ati ama sa ijwe-ti konje uwog Rimam pangma ti awu nde. Ati ama ku ri ira ikyaen ti ati ru kubenti.

¹⁴ Ati nung pu ti baa, pangma ti Rimam kunn nwunn Itsekuru-ti Yesu uwae iticwu, awu u kunn nwunn ti ama te wu tetso. Awu u pu ti fa te ani meme ba byir ti uwog kinjo uwe-wu.

¹⁵ Iken yine meme si ikyaen-ni. Ti itinyang na Rimam kyang ku ba uwog ande ko ku fufa ru ku fife yi uwe, ande ti u nde na Rimam fxaefa ko ku fufa ru ku fife yi uwe ama. Rimam ku tu kuko atang ama.

Ati Sa Utob-ti Tsi Ijwe Iken ti ku Ba Uwe

¹⁶ Ikyaen yine, ati yer-ti anying utob be. Ko ti ati ku fxen ti kicaeb ijwe-ti, ati ku shishab ko usir titini uwae riyaen utob-ti.

¹⁷ Rikaen ti pang ti ati ku ngwa utense ike u wur ru ti ritsen, amaa ikyaen-yi, ati u tu kuko ti riyinn ti itimyae-yi ta-yi be uwog Rimam apupwen, uwog ti ati u som kukunn atang. Riyinn yine, si-yi ti a u myae yi ti rikaen ti ati ku ngwa utense ike be.

¹⁸ Ati sa uwae tsi-ti ijwe iken ti ande ku nung te ayib be. Uwae-ti tsi risu iken ti ande u sae tu-ba yi te ayib be. Iken ti ande ku sae te ayib ku yafife, iken ti ande ku sae tu-ba yi te ayib be ku yafe-yi fe ama be.