2 Korinti 2 - Kutsingken Ira Rimam ti Saen Kyag

¹ Ikyaen yine, ame sa tsi baa, ame na u nda-m ani rikaen ti itiba-m uwog-ni cwucwo be.

² Asiti ame a ndembeb ni utob, aye ti u ri jim m utob cwucwo? Ayi si sí ani ande ti ame ndembeb ni utob a.

³ Ayine si iken ti nde nee ame bae na ni kutsingken wu. Kiye wu, ame ku sha-m ti ame na u ru ba tu ni uwe ti uwe u ndembeb utob risu-ni be, ani ande ti ayi si sí ani ti pang ti ni ri jim me utob. Ame sa utob-m tsi baa, utob ti tsen-m u nda ni utob ti tsen ama.

⁴ Kutsingken ti ame bae na ni kucang, ame bae wu ti ijwe ti fwer ti utob ti ndembeb ka ti aten ayib ti ten. Ame bae yi ikyaen ti ni na nung baa, ame na site ure te ni uwae utob-m jang timambe, si-yi ti ame na u ndembeb ni utob be.

Yata na Unde wu ti Raen Ira

⁵ Unde wu ti raen ira, ame u nde tu ti m ri baa, ayi caeb-yi ame amam be, awu nde ku caeb ni meme.

⁶ Tine ama upae ti ariki yang-ba akwen uwae-ni yer na wu pang pu yi.

⁷ Ikyaen na yine, i nyang skeb ti ni yata na wu ikentitibi-wu, u ri bom wu utob barabe utob ti byir u shir wu ru ti isim.

⁸ Ame ku jwam ni ti ni tso wu baa, ani na site ure te wu pangma ti kucang.

⁹ Ayine si iken ti nde ne ame bae na ni kutsingken-m ti kucang. Ame myae ni baa, ko ani ku nae risu riben ti iken ti ame ri te ni bara.

¹⁰ Kiye ti ani a yata na unde iki ikentitibi-wu, ame yata na wu ama. Ama asiti ame a ya ta na unde iki, ko ayi a si ira imi, ame nde yi ikyaen-ni, yi uwe Yesu Kristi,

¹¹ ikyaen ti Shetann ā ci-wu rika risu-ti be. Ati nung pu ti itsab ti ana-wu.

Bulus Ndembeb Utob Ikyaen ti Awu Nung-wu Ayib Titus be

¹² Kiye ti ame ba uten Turowas ti ame u ba ya iskin ira Kristi, ame nung baa, Itsekuru na mbubta na pu wu ame fengo ti ame u nde wande na-wu atang.

¹³ Amaa utob-m nae-wu riben be, ikyaen ti ame tu-m inja-ti Titus be. Ikyaen yine ame nwunn u ya ba ta u ru yi Makedoniya.

Ati u Ci Rika Uwae Rinyi Yesu

¹⁴ Ati fxaefa te Rimam! Yi uwae wande na Kristi, awu ci pu wu rika, awu Rimam ti ku tae ti putsa ukwe rika-ti, Yesu Kristi, u nda ti ati te wu ku kam ashwu te atso. Cwucwo, yi kujwo wande ti ana-ti, Rimam ku nda ande ti ko aka patag nung ira Yesu pangma kuyang iken ti ku shag kyi fe uwog meme.

¹⁵ Kubenti, ati pangma iken ti ku nung kuyang ti Kristi ku ten na Rimam. Kuyang-yi ku ru ka tu ande ti tu itinwangru fa ti ande ti ta unju iticwu.

¹⁶ Uwog ande ti ku cwucwu, ira Yesu si kurwa na iken ti cwucwu u ku shir iticwu ba. Amaa, uwog ande ti ku nwangruru, ayi si iken ti ku nung kuyang ti tinyang u ku nda ande unyang tishe. Aye ti u nde tu wande na atom Yesu yine?

¹⁷ Ati si-ti pangma ariki ti kyang ku jaebci ti ira Rimam be. Ana-ti, ati si ana Kristi. Ati ku ri ira-ti uwae kubenti uwe Rimam ikyaen ti awu ti tom ti baa, ati na nde wande yine.