2 Korinti 12 - Kutsingken Ira Rimam ti Saen Kyag

Kurwa ti Bulus Sunn ti Kicaeb ti Nde wu Ira

¹ Ame u ndub kang ijwe ko ti ayi u ndeya-yi ame be. Ame u ri ira risu kiye ti Itsekuru tatso m iken uwae kurwa u ri ira te m yi fengo iki ama.

² Ame nung unde iki ti ta fengo Kristi, a ye ra wu tso fe yi apupwen ti fa ti ita uwae asang rijwe asu inje ti wur ru ru. Ko yi rimenn ijwe, ko yi kusung, ame nung nyang-m be. Rimam amam ti nung.

³ Iken ti ame nung, a ye ra unde wune tso fe yi uwog tinyang. Ko awu a tso ti rimenn ijwe-wu ko awu a tso uwae kusung amam, ame nung-m be, se Rimam ti nung.

⁴ Ama apupwen atang awu fxen ira ti si-yi ira ti unde u ri tso unju-wu be. I si ira ti cwucwe.

⁵ I si itso unde wune ti ame u ndub ijwe risu-wu. Ame u ndub-m ijwe risu iken ti ame nde ti ajwo-m be, se risu iken ti ku tso baa, ame na si-m iken iki be.

⁶ Á baa, ame na ku sha ti m ndub ijwe, ame ú si-m kuskwab be, ikyaen ti ira ti ame ku ri ú si kubenti. Amaa, ame cwé-m ti m ndub ijwe be, ikyaen ti ande na nung m uwae kujwo wande ti ame ku nde, ti uwae ira ti aba ku fxen unju-m amam, si-yi uwae ira ti ame ku ri u ku kyae nyang risu-m be.

⁷ Rimam ku sha-wu ti m na ndub pang-m ijwe risu iken ti ku fur ayib ti awu tatso m be. Ikyaen yine, a tom ra ikajwo ba ter sang m ijwe. Ayi si atom na Shetann ti wu tom ba ti wu na nde m rikaen, ti ayi ā byangkyi m ijwe ti ndub.

⁸ Ame jwam Itsekuru ka atsepu ita ti awu na sub ra ikajwo wu tso ijwe-m.

⁹ Ama awu ri te m baa, “Rinyangwae-m pang pu yi afu, ikyaen ti, ame ku tso kuko-m siskeb kiye ti afu site-fu ti ribom be.” Ikyaen yine ame u ru yi uwe u ndub ijwe risu iken ti ku tso baa, ame na bom-m be. Ame u nde yi te utob ti tsen ikyaen ti kuko na Kristi ā si ba risu-m.

¹⁰ Utob-m nae riben, ko ame a bom-m bom be, ko ti a txun m asu, ko ame a ngwa rikaen, ko ande a nde me ira. Ame tsen utob te yi ikyaen ti, ame ku ngwa rikaen yine meme ikyaen rinyi Kristi. Ikyaen ti, kiye ti ame a bom-m be, si kiye ti ame site ribom.

Ure Bulus Uwog Ande ti Korinti

¹¹ Ani nda m ame ri ira pangma unde ti kuskwab. I nyang skeb ti ani ti ú teb kujwo wande-m ti ame ku nde, si-yi ame ti u ri be. Ko asiti ame a ru-m risu be, ame skeb pu m ande tiyang tiyang bane ti sa risu-ba tsi baa, aba na si ande ti atom.

¹² Kiye ti ame ta uwog-ni ame nde iken ti tso baa, ame na si unde ti atom Rimam ti kubenti. Ame nde iken yi meme ti utob ti ye u tatso ni iken ti ku fur ayib ti iken ti ku tso kuko ti tsotso kutampwa-ni.

¹³ Ame nde te ni pangma ti ame nde te ande Rimam ti tsitsi. Iken kinjo rikaen ti ame nde-m uwog-ni be si ti, ame nda-m ani rikaen uwae ira wuci ti uwog ti nae be. Asiti ame a raen-m iraen, Ame ku jwam baa, ni na yata na m.

Bulus Ru ku Ba yi Uwog-ba

¹⁴ Ayine fa ti atsepu ita ti ame sa tsi ti m ru ba uwog-ni. Ama ame a ru ba, ame u nde-m ani rikaen iki be. Iken ti ame ku sha uwog-ni si-yi aser-ni be, ayi si ani ti risu-ni ti ame ku sha. I si-yi anyisu tinying ti ku sha wuci na abitse-ba be; abitse-ba ti ku sha wuci na anyisu-ba.

¹⁵ Ame u cwé u pu meme rifunn, ren fa ti risu-m meme, wen tag ikyaen ti m ndeya ni. Ani ama re? Asiti ure ti ame ye te ni a ko fufa, ani u kosi ana-ni a.

¹⁶ Iki be ani u cwe baa, ame na nde-m ani rikaen iki be. Amaa, ariki uwae-ni u ri baa, ame na munn te itsab rishwu-m na ku kyaefa ni fa.

¹⁷ M m! Ame kyaefa ni rimang? Yi fengo na ande ba ti ame tom ru ba uwog-ni a.

¹⁸ Ame jwam Titus ti wu na ru ka uwog-ni, ama ame tom kyi inja-ti iki ti wu na putsa Titus ru. Titus ci iken-ni iki tikong a. Mbaa ira ti kab-m te ana Titus si iken kinjo re! Fengo wande-ti ti ati ku nde si iken kinjo.

¹⁹ Ko iki be ani ku tang baa, ati na ku kwab ti ti na u kyae nyang risu-ti uwe-ni. Iyee! Ati ku ri ira-ti uwe Rimam. Ati ku ri ira ama ti kuko na Kristi. Arwan-m ti ayib ricwu-m! Iken ti ati ku nde meme si ikyaen ti ti u ndeya ni.

²⁰ Ame kyen ikyenricwu baa, ko iki be, asiti ame a ru ba ye, ame na u ba tu ni te usom ti som ti txi te ira ti ame ku sha ti m nung uwog-ni, ko ani ama u tu m te kujwo wande ti txi te ayi ti ani ku sha ti ni nung uwog-m. Ko iki be ame u ru ba tu ni ani ku fwan kibyag, u ku tsinn kitsinn, u ku tso rinae, u ku sha nyang iken na risu-ni amam, u ku txun atso asu, u ku tsag ande, u ku ndub ijwe, u ku ye iken kyikab kyikab.

²¹ Ame ku kyen ikyenricwu baa, iki be Rimam u nda m rikwae ti wae uwe-ni, iki be ariki uwae-ni nde ikentitibi ti kucang u kafe isim ta-ba yi be. Aba ku nae ajwo ajib ti atang u ku sha uwa ande ti atang u ku nde iken ti tsotso ti ku txi iyib uwe Rimam ti atang. Ayi a si ahan, ame u ru ba jwub ira risu ande bane.