2 Korinti 1 - Kutsingken Ira Rimam ti Saen Kyag

Itikunnji Bulus

¹ Kutsingken wune ru uwog-m Bulus, atom na Yesu Kristi, ame ti Rimam tsab tsi uwae itimyae na-wu. Ame te inja-ti Timoti bae ira yine ru ba uwog-ni ande Rimam ti ta Korinti ti ande Rimam ti uten ti Akaya meme.

² Itse-ti Rimam ti Itsekuru-ti Yesu Kristi ā nda ni rinyangwae ti kujimshwur.

Bulus ku Nde na Rimam Fxaefa

³ Ati ku teb rinyi na Rimam ti si Itse na Itsekuru-ti Yesu Kristi. Rimam ti si Itse-ti ti ku nung ti te ayibrisi, awu ti si Rimam ti ku nda utob-ti nae riben skirr.

⁴ Awu ti ku ri jim ti utob kiye ti ati a ta uwae rikaen, ikyaen ti ati ama u nde tu ti ti u ri jim ande ti ta uwae rikaen utob. Utob ti jim ti ati ku nda ba ne, si sí utob ti jim ti Rimam ku nda ti.

⁵ Pangma ti rikaen ti Kristi ngwa munn ba sang uwog-ti u nda ti ku ngwa rikaen, ti mbwe-yi ama, utob ti jim na awu Kristi munn ba sang uwog-ti ama u ku nda ti munn te kujimshwur ti ana-wu.

⁶ Ati ku ngwa rikaen ikyaen ti ni na nwangru u tu kpakang utob. Kiye ti Rimam ku ri jim ti utob, ayi si itindeya uwog-ni ama, ikyaen ti ayi u nda ni ye utob uwae rikaen ti ani ku ngwa, pangma ti ati ku nde uwae rikaen-ti.

⁷ Ati sa uwae tsi u kab-ti uwae be, baa, ani na u tsi ting ting, ikyaen ti ati nung pu ti baa, pangma ti ani na ku ngwa rikaen pangma ti ati ku ngwa, ayi si ahan ama, ani na u tu utob ti jim uwog Rimam pangma ti ati ku tu ama.

⁸ Ameinja, ati ku sha ti ani na nung nyinyang baa, rikaen ti ati ngwa uten Asiya si-yi ti ti ri be. Ira ti tu ti atang ko skeb ribom-ti. Ati tang baa, ati na u nwangru-ti uwae rikaen yi be.

⁹ Kubenti, ati sae iticwu te ayib. Amaa, iken yine nde ikyaen ti ti na sa ijwe-ti konje-ti risu-ti be, amaa, ati na sa ijwe-ti konje Rimam, awu ti site kuko ti wu kunn shwur ande ti cwucwu.

¹⁰ Awu nwangru ti unju iticwu, ama awu u nwangru kyi ti cwucwo. Ati sa uwae tsi uwog-wu baa, awu na u nwangru ti ru fife uwe.

¹¹ Ame tang baa, ani ama ku mbyae ajwo na wu ikyaen-ti. Ikyaen yine ati nung baa, pangma ti ande ko timambe ku jwam Rimam risu-ti tine, ande ko timambe ama u nde na Rimam fxaefa uwe ike ikyaen ti awu cwe ira itijwam-ba u nwangru ti.

Bulus Kafe Ira ti Awu Myae Kucang

¹² Ati ku pam ipam ikyaen itisom-ti ti ati som kutampwa ande uwae utense. Ufxenjwin riyaen utob-ti ama cwe ira-ti baa, ira yine na si kubenti ikyaen ti Rimam nda ti som usom na kubenti te ande, si-yi ti apwa unju amam be. Ayi si ahan siskeb uwog-ni ande na Rimam. Wande-ti ti ati ku nde te ande si-yi wande na ben-ayib ti utense be, ati ku nde yi ti rinyangwae na Rimam.

¹³ Iken ti ati ku bae na ni uwae atsingken-ti si-yi ira ti sunn be, si nyang ira ti ani u nungye yi. Ati sa uwae tsi baa, ani na u ba kab ye tag ira yine uwe ike,

¹⁴ ko ti ani nungye tag-ni tine be. Ikyaen ti usir ti Itsekuru-ti Yesu Kristi a kafe ba pu wu, ani u pam ipam risu-ti pangma ti ati u pam ipam risu-ni.

¹⁵ Ame ru kubenti uwae ira yine, nee iken ti nde ame sa tsi ti kucang baa, ame na u ru tsa uwog-ni kiye ti ame a kafe ku ru yi Makedoniya.

¹⁶ Ame myae baa, isim ti ame a ru ka pu m Makedoniya, ame na u ba ru tsa kyi ti uwog-ni ikyaen ti ani ā ba ndeya m ti itiru yi uten Yawudiya. Yi fengo yine ame ku kab baa, ame na u nde ni itinyang atsepu ifaen.

¹⁷ Ira yi ti ame myae ne, ko ani tang baa, ame na ku kafe kafe ti ukaen ahoo? Ko ame pangma unde ti utense ti ku ri baa, “Een” ti “Iyee” ti uwae kiye kinjo ahoo?

¹⁸ Iyee. Ame ku ben uben yi kubenti na ira unju Rimam baa, ira-ti ti ati ri te ni si-yi ira ti ku kafe kafe ahan be.

¹⁹ Ikyaen ti, ira na Umbae Rimam, Yesu Kristi, ti ame ti Silivanu ti Timoti tsag te ni, si-yi ira ti u kafe kafe u nda unde kab uwae risu-yi be. Iyee. Uwog na Yesu, awu a ri ira, ayi tsikunn een.

²⁰ Ko unju ti yer Rimam a ko rimang, meme-yi u kumunn tag uwog Yesu Kristi. Ayine si iken ti nde nee, ati ku cwe baa, “Ayi ā si ahan” yi rinyi na Yesu, ama Rimam ku tu rurob atang.

²¹ Ayi si Rimam ti nda ti, fa te ani meme, ati ti Kristi ren atso. Cwucwo ayi si sí awu Rimam ti tsab ti tsi,

²² u taen ti iwaen ti ku tso baa, ati na si ana-wu. Awu nda ti Kusung-wu uwae riyaen utob-ti ikyaen ti ayi ā tso baa, itinyang-wu u ru ba kang risu-ti.

²³ Ame kunn Rimam, awu ti u ri unju-m. Kiye ti ame ru ba myae ira baa, ame na u ba-m Korinti cwucwo be, i si ikyaen ti ame u ko si na ni rikaen.

²⁴ Ira ti ame ri ne tatso-yi baa, ati na ku tso ni kuko uwae fengo Rimam be. Ati nung pu ti baa, ani tsi pu ni ting ting uwae fengo Rimam. Ana-ti, ati ku sha ti ti te ni na u nde wande tetso ikyaen ti ni na tu utob ti tsen.