2 Bitrus 1 - Kutsingken Ira Rimam ti Saen Kyag

¹ Kutsingken wune ru kujwo-m Siman Bitrus, ti si umbaefxen na Yesu Kristi, u si unde ti atom-wu ama. Ame bae ku na ni ande ti ru uwae kinjo uwog Yesu pangma ti ati ru uwae kinjo ama. Uwae kinjo-ti wune si iken ti nyang nyae tsitsa, ikyaen ti, ati tu yi ruye uwae wande ti kubenti na Yesu Kristi, awu ti si Rimam, u si Unde ti Nwangru ti.

² Rimam ā nda ni itinyang ti utob ti nae riben ko fufa ru yi uwe, yi fengo na iken ti ani ku kwen risu-wu ti risu Yesu Itsekuru-ti.

Itso Usom ti Som ti Rimam ku Sha

³ Rimam, yi uwae kuko-wu, nda pu wu ati meme iken ti u nda ti siser yi fengo Rimam, ti si fengo na unyang tishe. Ati tu iken yine ikyaen ti ati ba nungye Yesu Kristi, ti uwog itinyang-wu ti nyang timambe.

⁴ Yi fengo yine, awu nda pu wu ati unju ti yer-wu ti nyang si-yi ti ti ri be, ikyaen ti ti na nwangru uwae ira titibi ti munn utense, ama ikyaen ti ti u tu kutunn-ti uwae itisaen kyag-wu, u si pangma ti awu Rimam tsi.

⁵ Ikyaen yine, uwae itikwab-ni, ni kwab kang ti ni kumunn uwae kinjo-ni te usom ti som ti tinyang, u kumunn usom ti tinyang te itinungye,

⁶ u kumunn itinungye-ni te risu ti ye, u kumunn risu ti ye ama te ititsi ti kpakang, ititsi ti kpakang ama te ikyenricwu ira Rimam,

⁷ ikyenricwu ira Rimam ama te ure ameinja atso, ure ameinja atso ama te ure ti si ana Rimam.

⁸ Asiti ani a site itso utob yine, ama ayi a ko fufa ku ru yi uwe, ayi u nda ni si ande ti u ndetu wande, u waen awaen ti tinyang uwae itinungye-ni na Itsekuru-ti Yesu Kristi.

⁹ Unde ti a shanum te itso utob ti tinyang yine, awu si unde ti ayib risu-wu byitang amen. Awu munnji pu wu ti a jwosaen pu ba wu uwae ikentitibi-wu.

¹⁰ Ikyaen yine, ameinja, ni kwab skeb kyi ti ni tatso paenine uwae usom ti som-ni baa, itikunn-ni ti ititsab-ni na si kubenti. Ani a nde ayine, ani u jwunnsi-ni be.

¹¹ Ani a nde ayine, ufu kusog u mbubta waang ikyaen-ni, sang yi Kujwokwe ti tsi kukunn ti si ana Itsekuru-ti Yesu Kristi Unde ti Nwangru-ti.

¹² Ikyaen yine, ame u tsikunn ku tangsom na ni ti ni nung ira risu iken yine skeb ti kucang, ko ti ani nung pu ni ayi ti kucang, u ku nde wande te yi ti kpakang uwae ira ti kubenti ti a kwen na ni.

¹³ Ame ku kab baa, ti ti ame tsi user ti atang, ayi nyang ti m tangsom ni ira risu iken yine ko kiye titini,

¹⁴ ikyaen ti, ame nung pu m baa, usir-m ka pu wu ku mae, pangma ti Itsekuru-ti Yesu Kristi tatso m.

¹⁵ Uwae itikwab-m, ame u kwab kang, ikyaen ti, isim ti ame a ya utense ta pu m, ani u ndetu ti ni u tangsom te yi.

Ira Yesu Kristi Si Ira ti Bitrus Nung te Ayib-wu

¹⁶ Ayi si-yi ici kusung ti ati mam ku tsag te ni kiye ti ati ri te ni ira risu kpakang ti itiba na Itsekuru-ti Yesu Kristi be, amaa, ati sae riyinn-wu te ayib-ti.

¹⁷ Kiye ti awu paembe kuko ti riyinn uwog Itse-wu Rimam, ati fxen afxenjwin Rimam ti risu-wu ri baa, “Awune si Umbae-m ti riyaen utob-m. Ame ku tsen utob te wu timambe.”

¹⁸ Ati ti risu-ti fxen afxenjwin wune si apupwen ba kiye ti ati te wu ta tetso risu rikwen ti cwucwe.

¹⁹ Cwucwo, ati site ira ti skeb ayine, ti si ira unju ande ti ku ya iskin ira Rimam ti kute, ti nyang ti ni sa utob tsi atang. Ayi si pangma urwa ti a yen tsi uwog ti kubyitang, se ti ucwe a fam pu wu, ama kititaen na utencwe a ba ku tsen riyaen utob-ni.

²⁰ Iken ti skeb meme ti ni u nung si ti, ira ti a ri uwae kutsingken Rimam ruye-yi ben-ayib unde, ko itsab unde be.

²¹ Ikyaen ti, ira ti ande ti ya iskin Ira Rimam ri kute ru-yi uwog unde ba be, ayi si Kusung Rimam ti nda ba ti a na ri ira ti ru uwog Rimam ba.