1 Yohana 5 - Kutsingken Ira Rimam ti Saen Kyag

¹ Unde ti a ru uwae kinjo baa, Yesu na si Unde wu ti Rimam Tsab Tsi, awu si umbae Rimam. Unde ti a site ure te itse umbae, awu u ye ure te anyisu-wu ama.

² Fengo ti ati u nung baa, ati na site ure te anyisu Rimam si ti, ati a site ure te Rimam, u ku putsa icwe-wu.

³ Itiye ure te Rimam si ti ti na ye su Icwe-wu. Icwe-wu ayi ama caeb-yi caeb ti putsa be.

⁴ Ikyaen ti, unde ti a si umbae Rimam, awu ku ci rika risu utense. Iken ti ku nda ti ci rika risu utense si uwae kinjo.

Uwae Kinjo Uwog Umbae Rimam

⁵ Aye wu ti u ci tu rika risu utense? Si nyáng unde ti ku ru kubenti baa, Yesu na si Umbae Rimam.

⁶ Ayi si Yesu Kristi wune ti ba utense te ambyi batisma-wu, ti anying-wu ti awu sa yaen mbub. Awu ba-wu te ambyi amam be, amaa, awu ba te ambyi fa ti anying. Kusung Rimam ama cwé unju ira yine, ikyaen ti, awu si Kusung ti kubenti.

⁷ Iken ti ku tatso kubenti na ira yine si ita:

⁸ Ayi si Kusung Rimam, ti ambyi-sa, ti anying. Meme iken ita yine ku ri ira ti unju kinjo.

⁹ Asiti ati a kyangte ira unju unde ti ri risu unde iki, Ira unju Rimam rob skeb pu yi ana ande. Ikyaen ti, ayi si ira ti Rimam ri risu Umbae-wu.

¹⁰ Unde ti a ru uwae kinjo uwog Umbae Rimam, awu site ira yine uwae utob-wu. Unde ti a ru-wu uwae kinjo uwog Rimam be, awu sa Rimam kafe Rimam ti rifen, ikyaen ti, awu ru-wu uwae kinjo risu ira ti Rimam ri risu Umbae-wu be.

¹¹ Ira yi ti Rimam ri risu Umbae-wu si ti, awu na u nda ti unyang ti tsi kukunn. Unyang wune ta uwog Umbae-wu.

¹² Unde ti a site Umbae Rimam, awu site unyang. Unde ti a site-wu Umbae Rimam be, awu site-wu ti unyang be.

Unyang ti Tsikukunn

¹³ Ame bae ira yine ku na ni ande ti ru kubenti uwae rinyi na Umbae Rimam ikyaen ti ni na nung baa, ani na site unyang ti tsi kukunn.

¹⁴ Ribom utob ti ati site uwog Rimam si ti, asiti ati a jwam iken iki uwog-wu, ti si utob-wu, awu u fxen ti.

¹⁵ Ama, asiti ati a nung baa, awu na ku fxen ti, ati ama u nung baa, ati na paembe pu ti iken ti ati jwam uwog-wu.

¹⁶ Asiti unde iki a nung inja-wu ku nde ikentitibi ti si-yi ikentitibi ti u shir wu sang iticwu be, awu ā jwam Rimam risu-wu, ama Rimam u nda wu unyang. Ira yine si ikyaen itaen ti ku nde ikentitibi ti u shir ba sang-yi iticwu be. Ikentitibi iki ta atang ti ku shir iticwu ba risu unde ti nde yi. Ame ri-m baa, ani na jwam Rimam ikyaen itiyata na itso ikentitibi yine be.

¹⁷ Meme riraen patag si ikentitibi, amaa, ikentitibi iki ta atang ti ku shir iticwu ba-yi be.

¹⁸ Ati nung pu ti baa, unde ti a si umbae Rimam, awu u tsikunn-wu ikentitibi ti ti nde be, ikyaen ti, Yesu, Umbae Rimam, ku nungkyi wu. Awu Shetann u nde-wu unde wu iken iki be.

¹⁹ Ati nung pu ti baa, ati na ru uwog Rimam ba, utense meme ama na ta kujwo Shetann.

²⁰ Ati ama nung pu ti baa, Umbae Rimam na ba nda pu wu ati itinungye, ti ti na nung Rimam, awu ti si kubenti. Ati ama ta uwog awu ti si kubenti, ikyaen ti, ati bae fa Umbae-wu Yesu Kristi. Awu ti si Rimam ti kubenti, u si unyang ti tsi kukunn.

²¹ Anyisu ne, ni tsi rurwen te apxin ti fen.