1 Yohana 4 - Kutsingken Ira Rimam ti Saen Kyag

Asung ti Tibi ti Asung ti Tinyang

¹ Ande-m ti ayib ricwu-m, ni ru-ni kubenti baa, meme asung na ru uwog Rimam ba be, amaa, ni myae nung asung yi, ti ni nung baa, ayi si ana Rimam bara. Ikyaen ti, atom ti ku ya iskin ira tikong yang-ba akwen sang ba pu ba utense.

² Fengo ti ati u nungye Kusung ti si ana Rimam ta re, kusung ti a ri tso baa, Yesu Kristi na ba utense uwae rimenn ijwe, kusung wu ru uwog Rimam ba.

³ Amaa, kusung ti a ri tso-wu ira risu Yesu be, kusung wu si-wu ana Rimam be. Ayi si kusung unde ti kuka Kristi, ti ani fxen baa, awu na ku ba. Tine, awu ta mam pu wu uwae utense.

⁴ Anyisu ne, ani si ana Rimam. Ani ci pu ni rika risu-ba, ikyaen ti, awu ti ta uwae-ni skeb pu wu awu ti ta utense.

⁵ Aba si ana utense, ku ri ira utense, ama utense ku fxen ba.

⁶ Ati si ana Rimam. Unde ti a nung Rimam, awu u fxen ti. Unde ti a nung-wu Rimam be, awu u fxen-wu ati be. Fengo wune, ati u nungye Kusung ti kubenti ti kusung ti tikong.

Ni Ye Ure Tetso Pangma ti Rimam Ye te Ni

⁷ Ande-m ti ayib ricwu-m, ti ye ure tetso, ikyaen ti, ure ru uwog Rimam ba. Unde ti a site ure, awu si umbae Rimam, u nung Rimam.

⁸ Unde ti a ku ye-wu ure be, awu nung-wu Rimam be, ikyaen ti Rimam si ure.

⁹ Fengo ti Rimam tso ti ure-wu si ti awu tom Umbae-wu ti si kinjo rikaen, ba utense ikyaen ti ti na tu unyang uwog-wu.

¹⁰ Ure ti kubenti ta re. Ayi si-yi ti ati ti bag u ye ure te Rimam be, amaa, awu ti ye ure te ti, u tom Umbae-wu ba ti wu na si fengo ti ti na u tu itiyata na ikentitibi-ti.

¹¹ Ande ure-m, ti ure Rimam risu-ti ko timambe ne ahan, ati ama, ti ye ure tetso.

¹² Unde iki sae ji-wu Rimam te ayib usir iki be, amaa, asiti ati a ku ye ure tetso, Rimam u ta te ti. Ure ti ana-wu ama kumunn pu yi risu-ti.

¹³ Fengo ti ati nung baa, ati na baefa te Rimam, awu ama na te ti ta tetso, si ti awu nda ti Kusung-wu.

¹⁴ Ati ama nung, u ri tso pu ti baa, Itse na tom Umbae-wu ba ti wu na ba nwangru utense.

¹⁵ Unde ti a ri tso ti unju-wu baa, Yesu na si Umbae Rimam, Rimam u te wu ta tetso, awu ama te Rimam ta tetso.

¹⁶ Ure ti Rimam site ikyaen-ti, ati nung yi, u sa ijwe-ti konje atang. Rimam si ure. Unde ti a som usom uwae ure, awu te Rimam ta tetso. Rimam ama te wu ta tetso.

¹⁷ Ure Rimam kumunn pu yi risu-ti, ikyaen ti ti na site kpakang utob usir rikwen. Ikyaen ti, itso ti awu tsi, ati tsi ahan ama uwae utense.

¹⁸ Ure site-wu ikyenricwu be, amaa, ure ti kubenti ku rwae ru ikyenricwu, ikyaen ti, ikyenricwu ku shir kimbab ti byinn ba. Unde ti a ku kyen ikyenricwu, ure ti ta utob-wu munn ka furu-wu be.

¹⁹ Ati ku ye ure te ande ikyaen ti, Rimam tawe ye ure te ti.

²⁰ Asiti unde a ri baa, “Ame site ure te Rimam,” ama ku sa inja-wu kuka, awu si unde ti rifen. Unde ti a site-wu ure te inja-wu ti awu ku sae te ayib be, awu u nde rimang itawe u ye ure te Rimam ti awu nung-wu awu be?

²¹ Kusen ti fa ti ati tu uwog Kristi si ti, unde ti a ye ure te Rimam, awu ā site kang ure te inja-wu ama.