1 Yohana 1 - Kutsingken Ira Rimam ti Saen Kyag

¹ Ira wu ti ati ku ri te ni ne, ta pu wu atang ti kucang akwen. Ati fxen pu ti awu, u sae pu ti awu te ayib, u tekunn pu ti awu te ajwo. Awu si Ira na Unyang.

² Unyang wune tso risu-wu, ati nung pu ti awu, u ku ri ira risu-wu. Ati ku tsag te ni ira unyang ti tsi kukunn wune ti te Rimam ta tetso kucang, ama tine awu tso risu-wu uwog-ti.

³ Iken ti ati sae u fxen, si ayi ti ati tsag ku te ni, ti ni na ren risu te ti. Kubenti, risu ti ren-ti ayi si risu ti ren te Itse-ti Rimam ti Umbae-wu Yesu Kristi.

⁴ Ati bae ira yine ku na ni ikyaen ti utob ti tsen-ti ā tsen ka fururu.

⁵ Ira ti ati fxen uwog-wu, u ku tsag ku te ni si ti, Rimam si uwog ti saen, uwog-wu, kufub ta-yi atang be.

⁶ Asiti ati a ri baa, ati na ren ure te Rimam, ama ku kyang ti uwae kufub bwe, ati ku yer rifen, ku nde-ti kubenti be.

⁷ Amaa, asiti ati a ku kyang ikyin uwae itisaen pangma ti awu ta uwae itisaen, kubenti, ati ren ure tetso. Ama anying na Yesu, Umbae-wu, u jwo saen ti uwae ikentitibi-ti meme.

⁸ Asiti ati a ri baa, ati na site-ti ikentitibi be, ati ku kyaefa risu-ti. Kubenti ta-wu uwae-ti be.

⁹ Amaa, asiti ati a fxirtso ikentitibi-ti, awu Rimam, ti si Rimam ti kubenti, u ku pwen rikwen ti kubenti, awu u ya ta na ti ikentitibi-ti, u jwosaen ti uwae meme iken ti nyang-yi be.

¹⁰ Asiti ati a ri baa, ati na nde ji-ti ikentitibi be, ati ku tso baa, Rimam na si Rimam ti rifen, ira-wu ta-yi uwae-ti be.