1 Timoti 2 - Kutsingken Ira Rimam ti Saen Kyag

Ande Kristi ku Jwam Rimam Risu Utense Meme

¹ Ira-m ti tawe si ti, ame ku sha ti ni na sa ira ti jwub-ni, ti itijwam-ni, ti itijwam risu ande meme, ti kufxaefa, ka uwog Rimam.

² Ni jwam Rimam ikyaen na abikwe ti meme ande ti ta risu ande, ikyaen ti ti som usom kujimshwur, ku fen Rimam, ku nde iken meme yi fengo ti pang atang tetso.

³ Itso itijwam yine nyang. Rimam ti nwangru-ti ku tsen utob te iken yine.

⁴ Ikyaen ti, awu ku sha ti meme ande na nwangru uwae ikentitibi, ti a na ru ba nungye ira ti kubenti.

⁵ Rimam si kinjo amam. Unde ti ku kyae nyang ande ti Rimam si kinjo ama. Awu si Yesu Kristi,

⁶ unde ti cwu ikyaen ti wu jaeb mbe unyang ande meme. Ayine ti si ira ti Rimam tatso ande ti utense uwae kiye ti pang atang.

⁷ Ayi si ikyaen ira na Yesu ne, nee a tsab ra m baa, ame na si unde ti atom, ti ame na kwen na ande ti si-ba Mbayawuda be baa, aba na ru uwae kinjo uwae ira ti kubenti na Rimam. Ira ti ame ku ri ne si-yi rifen be, ayi si kubenti.

⁸ Ikyaen na yine ame ku sha ti ko aka ti ani a ku fen Rimam atang, arom ti si ande ti kubenti ā jwam Rimam. Aba ā pu ajwo tso, rinae, ko ishaen ti shaen ā ta-yi kutampwa-ba be.

⁹ Ti mbwe-yi ama uwog anda. Aba ā kyae ijwe-ba yi fengo ti pang atang, pangma anda ti ku tang ira. Aba ā cwun atupwa-ba ama paen risu-ba yi fengo ti pang atang, si-yi ti kindab ko risu ti ndub be. Aba ā kyae-ba ijwe-ba ti asuwa kuko ti iken atong ti site aser ti atupwa ti rifunn be.

¹⁰ Ayi nyang skeb ti kindab-ba ā si wande ti tinyang ti aba ku nde na ande. Ayine pang atang uwog ande ti ku kunn ijwe-ba baa, ande na Rimam.

¹¹ Kiye ti a ku kwen na ba iken ama, aba ā som skirr, ti aba ā kwen iken yi ti risu ti nae riben.

¹² Ame cwe-m ti anda na kwen na arom iken be. Aba ā ta-ba risu arom be ama. Aba ā som usom-ba skirr.

¹³ Ikyaen ti, Rimam tawe kyae Adamu u ru ba kyae Awa isim.

¹⁴ Cwucwo, ayi si-yi Adamu ti Shetann tawe kyaefa wu be, ayi si Awa ti jwunnsi u nyatsa icwe Rimam.

¹⁵ Ko ti ayi si ahan, anda u nwangru yi uwae na umbae ti ti mbae, asiti aba a som usom-ba ti uwae kinjo ti ure u ku bom-ba risu be, u ku nde-ba ikentitibi be.