1 Timoti 1 - Kutsingken Ira Rimam ti Saen Kyag

¹ Kutsingken wune ru uwog-m Bulus, unde ti atom Yesu Kristi. Itsekuru-ti Rimam, awu ti nwangru ti, ti Yesu Kristi, unde ti ati sa uwae tsi risu-wu, aba ti nda m wande na unde ti atom ne.

² Ame bae ku na fu Timoti, umbae-m ti kubenti yi fengo Yesu. Rimam Itse-ti, ti Yesu Kristi Itsekuru-ti ā nde fu tinyang, u sae fu te ayibrisi, u nda fu kujimshwur.

Kusen ti Fwa Risu Iken ti Kwen ti Rifen

³ Pangma ti ame jwam fu kiye ti ame nwunn ku ru yi uten ti Makedoniya, som ti uka ti Afisa, ikyaen ti, ande iki ta atang, a ku kwen na ande iken ti rifen. Kwab kang ti byang kyi ba.

⁴ Ira ti tikyi ti aba sa utob tsi atang, ti itipwen rinyi abitse-ba ti a tsikunn ku pwen, ri te ba ti aba na ya yi ta. Ayi ku shir ishaen ti shaen sang ba kutampwa-ni. Ayi u ndeya-yi ande ti a u nungye iken ti Rimam myae tsi be, si nyang uwae kinjo amam ti u ndeya ande.

⁵ Ame ku sha ti fu na ri te ba ira yine ikyaen ti a na ye ure te atso. Ure yine ku ruye uwae ande ti site utob ti sisaen u ku tang ira ti tinyang u ku ru kubenti uwog Rimam ti utob kinjo.

⁶ Ariki teya iken yine ta pu ba u sang ishaen ti shaen ti ukaen.

⁷ Aba ku sha ti a na u si ande ti ku kwen na ande icwe Rimam, amaa, a ku ri ira ti ribom ama u nung-ba imbyi ira yi ti a ku ri te ande be.

⁸ Ati nung pu ti baa, icwe na si iken ti tinyang, amaa, se ti ati a nde wande te yi yi fengo ti pang atang.

⁹ Ande ā nungye baa, a bae-ba icwe yine ikyaen ande ti kubenti be, a bae yi ikyaen na ande ti ku nyatsa icwe u ku bom risu te Rimam. A bae yi ikyaen ande ti nung-ba Rimam be u ku nde ikentitibi, ti ande ti ku sae ru Rimam, u ku fen-ba wu be, u ku nde abitse-ba ti abiya-ba titibi u ku wen ande.

¹⁰ A bae icwe yine ikyaen na ande ti ku nae amae. A bae yi ikyaen arom ti ku nae atso, ti ande ti ku yib ande ru, ti ande ti ku wer rifen, ku ri ira ti tikong. Abane, ti ande meme ti ku putsa-ba iken ti kwen ti kubenti be, si ti a bae icwe yine ikyaen-ba.

¹¹ Iken ti kwen ti kubenti ne si ayi ti a ku tu yi uwae Ira Tinyang na Rimam ti site kuko ti riyinn. Ayi si sí ayi ti a nda m ti m na ya iski-yi.

Bulus Nde Fxaefa

¹² Ame ku nde fxaefa na Yesu Kristi Itsekuru-ti, awu ti nda m ribom ijwe ti m nde tu wande-m, ikyaen ti, awu myae u sae m baa, ame na pang pu m ti m na u nde wande yine,

¹³ ko ti kute, ame ri ira titibi risu-wu u txun wu asu u nda wu rikaen. Awu sae m te ayibrisi ikyaen ti ame nde ikentitibi yine uwae kufub u ru-m kubenti uwog-wu Yesu Kristi be.

¹⁴ Itsekuru-ti Rimam yaen tinyang-wu si me kuko ahan u nda m ru uwae kinjo uwog-wu, u tatso m ure ti si ana-ti yi fengo Yesu Kristi.

¹⁵ Ame ku ri te fu ira ti kubenti ti pang ti ande ā kyangte yi u ru kubenti uwae-yi. Yesu Kristi ru ba utense ikyaen ti wu nwangru ande ti ku nde ikentitibi. Uwae-ba ame ti si ukwe.

¹⁶ Amaa, Rimam tso ti tinyang-wu ru ba uwog-m ikyaen ti ande ti tsitsi ā nung baa, Yesu Kristi na ye utob te m, ko ti ame si unde ti nde ikentitibi skeb titag. Rimam nde ahan ikyaen ti aba ā ru kubenti u tu unyang ti tsi kukunn.

¹⁷ Kuko ti riyinn ā si ana-wu Rimam, awu ti si ukwe ti tsi yiyer, awu ti ku cwu-wu cwu be, awu ti a ku nung-ba wu ti ayib be, awu Rimam kinjo-wu amam. Ayi ā si ahan.

¹⁸ Uyin-m Timoti, ira ti ati fxen uwog Rimam risu-fu kute nda m, m ku fwa fu kusen baa, ira yi ti ande ti ku ya iskin ira Rimam ri risu-fu ne, ayi ā si usu rika-fu. Ta rika te yi ti ribom-fu.

¹⁹ Ru kubenti ti utob-fu kinjo rikaen. Nde-fu iken iki ti u nda fu kab ira be. Ariki ta atang ti ku kab-ba ira risu ikentitibi ti aba ku nde be. Ikyaen na yine aba jwunnsi pu ba u ya ira Rimam ta pu ba.

²⁰ Humenayu ti Alezanda si utso ande bane. Ame sa ba sang pu m kujwo Shetann. Ayine u kwen na ba ti a fxae ira titibi ti a ku ri risu Rimam.