1 Tesalonika 2 - Kutsingken Ira Rimam ti Saen Kyag

Wande ti Bulus Nde Uwae Uten ti Tesalonika

¹ Ameinja, ani ti risu-ni nung pu ni baa, itiba-ti uwog-ni na si-yi ti ukaen be.

² Ande iki nde ti rikaen u txun ti asu uwae uten ti Filipi, pangma ti ani fxen, amaa ati kyen-ti ikyenricwu be. Rimam ti risu-wu nda ti kpakang utob ti ti na ri te ni ira-wu, ko ti ande yang akwen cwe-ba ira-ti be.

³ Kiye ti ati ku jwam ni ti ni na putsa ira Rimam, ati yer-ti rifen be, u ri-ti ira ti unju ifaen be. Ati ku kyaefa-ti unde iki ama be.

⁴ Ana-ti, Rimam sae ti baa, ati na pang pu ti ti wu na u sa Ira Tinyang ti ana-wu na ti kujwo. I si ikyaen yine nee ati ku tsag te ande Ira Tinyang-wu ne. Ira ti ati ku ri, ati ku ri-ti ikyaen ti ti na u nyang uwae ande be, amaa ti ati na u nyang uwae Rimam, awu ti ku myae riyaen utob-ti ande.

⁵ Ati kwab-ti ti sha risu tinyang uwog-ni ti ira ti tinyang be. Ani nung pu ni ayine. Ayi si-yi ti ati na tu iken iki uwog-ni be ama. Rimam nung pu wu baa, ira yine si kubenti.

⁶ Ati ku sha-ti ti ani, ko ande iki, na teb rinyi-ti be. A baa, ati na sha ti a teb rinyi-ti, ati u ndetu ti ti sha yi uwog-ni ikyaen ti, ati si atom Yesu Kristi, amaa, ati nde-ti be.

⁷ Ana-ti, ati nde nam tur te ni, pangma unda ti ku nungkyi anyisu-wu u ku nda ba abyaen.

⁸ Ati site ure te ni timambe. Ayine si iken ti nde né ayi si-yi Ira Rimam amam ti ati nda ni be, amaa, fa ti ijwe-ti, ikyaen ti, ani nyang uwae-ti timambe.

⁹ Ameinja, ani tangsom pu ni ti itso wande tiyang ti ati nde uwog-ni kiye ti ati ku tsag Ira Rimam te ni. Ati kwab usirtaen ti utitang ikyaen ti, ati ku sha-ti ti ti na nda ni rikaen be.

¹⁰ Ani nung pu ni ti ayib-ni, Rimam ama nung baa, usom ti som-ti te ni ande ti ru uwae kinjo uwog Yesu Kristi si itso usom ti som ti sisaen. Ati a nde iken-ti ti kubenti, unde iki u tu-wu ati ti riraen be.

¹¹ Ani nung pu ni baa, ati kwen na unde titini uwae-ni pangma ti unde ku nde te anyisu-wu.

¹² Ati ri bom ni utob u ri jim-ni utob u fwa ni kusen baa, ani na som itso usom ti som ti pang atang uwe Rimam. Awu ti kunn ni ira ti ni ba sang Kujwokwe-wu u te wu som tetso uwog ti kuko.

¹³ Ati tsikunn ku nde na Rimam fxaefa ama ikyaen ti, kiye ti ani fxen Ira Rimam ti ati ri te ni, ani kyangte yi baa, ayi na si ira ti ru uwog Rimam ba, i si-yi ira unde iki be. Kubenti, ira yi si Ira na Rimam ara kuben. Ayi ku nde wande uwae utob-ni, ani ande ti ru uwae kinjo atang.

¹⁴ Ameinja, iken ti tu ni si sí iken ti tu ambub ande na Rimam ti ta uten ti Yawudiya, yi uwog ande ti ta atang ti si ana Yesu Kristi, ikyaen ti, ande ti uten-ni pyir ira-ni pangma ti ande ti uten-ba pyir ira-ba ama.

¹⁵ I si aba Mbayawuda ti wen Itsekuru-ti Yesu, u wen atom Rimam ama. Aba ti nde ti rikaen ama. Aba nyang-ba uwae Rimam be, u ku ta rika te ande meme!

¹⁶ Kiye ti ati ku ri Ira Rimam te ande ti si-ba Mbayawuda be ikyaen ti aba na tu itinwangru, aba Mbayawuda bane kwab ti a na u byangkyi ti fengo. Ayine ku kumunn kitu na ikentitibi-ba ti aba ku nde. Amaa tine rinae na Rimam ru ba pu wu risu-ba.

Bulus Sha ti Wu Kafe Ba Kyi Uwog-ba

¹⁷ Ameinja, ti ti a kata ti te ni uwae usir kpang ahan, ayi tsi ti ti utob uwae ti ti na ba kang uwog-ni u nung ni ayib ti ayib. Kubenti, ayi si uwae ijwe amam ti ati te ni kata atso, uwae utob-ti ati te ni ta tetso.

¹⁸ Ati ku sha ti ti na u ba kang uwog-ni, ame Bulus ti risu-m kwab atsepu yang akwen ti m na u ru ba, ama Shetann byang kyi yi.

¹⁹ Ikyaen ti, uwae ande meme ti fxen Ira Rimam uwog-ti, aye ti u nda ti uwaetsi pangma ani kiye ti Yesu Kristi a kafe ba? Aye ti ati u ndub ijwe atang u pam ipam risu-ba siskeb? Si-yi ani be a.

²⁰ Kubenti, ayi si ikyaen-ni ti ati ku pam ipam u ku kam ashwu.