1 Korinti 9 - Kutsingken Ira Rimam ti Saen Kyag

Wande na Atom

¹ Ame si-m te riyae ti m nde iken ti ame ku sha pangma ti ariki ku nde ama be a. Ame si-m atom be a. Ame sae-m Itsekuru-ti te ayib-m be a. Ani si-ni kujwo wande-m yi fengo Itsekuru be a.

² Ame tang baa, ko ti ande ti tsitsi a kyangte-ba ame baa, ame na si atom Rimam be, kubenti ani na u kyangte m. Ame nung ahan ikyaen ti, ani ande ti ru uwae kinjo uwog Itsekuru, si ande ti tatso baa, ame na si atom.

³ Kiye ti ande a sha m te riraen, ame ku txen unju-m baa,

⁴ ati site-ti riyae ti ti tu iken ti ci ti iken ti ngwa uwog-ni be a.

⁵ Ati u ndetu-ti ti ti u pu awa-ti ti nung ira Rimam, putsa ijwe-ti be a? Atom ti tsitsi ku nde ahan, fa ti ameinja Itsekuru, ti Bitrus.

⁶ Ayi si nyang ame ti Barnaba amam ti ku sha kang itici ti itingwa ti ajwo-ti a.

⁷ Akyirten ku pae aser ushaen-wu ti ajwo-wu a. Unde ti ritom titini ti ku ci-wu awaen ituku ti risaen-wu be? Unde ti ku shi iwen site-wu riyae ti wu ngwa akang abyaen na mbawen ti awu ku shi be a?

⁸ Ira yi ti ame ri ne si-yi ira ti kab na unde amam be. A bae ahan ama uwae Kutsingken Icwe na Musa.

⁹ A bae atang baa, “Ni yirkyi-ni unju indag kiye ti awu a ku rug na ni awum be.” Ti Rimam ri ira yine, awu ku ri yi risu indag ara a.

¹⁰ Iyee, awu ku ri ira yine risu-ti. Kubenti a bae ira yine ikyaen-ti. Unde ti ku ta awum ti unde ti ku bubunn ku nde wande-ba te uwaetsi baa, aba na u tu kutunn-ba uwae risaen-yi.

¹¹ Ati tā pu ti itso na Kusung Rimam utob-ni. Asiti ati a ba bunn iken pang uwog-ni ikyaen ijwe-ti, ayi u si iken ti skeb risu a.

¹² Atom ti tsitsi ku tu itindeya-ba uwog-ni, ati ama u tu-ti be a? Ati u tu skeb-ti aba be a? Ko ti ayi si ahan, ati jwam-ti ani baa, ani na ndeya ti be. Ati kaen atxom sur utob ikyaen ti ati ku sha-ti ti ti u si kupang ti cekyi fengo na ira tinyang ti ati ku ri te ni risu Yesu Kristi be.

¹³ Ani nung-ni ti ande ti ku nde wande kusog Rimam ku tu wuci-ba uwae rinyangwae ti ande ku pu ka kusog Rimam atang be a. Ande ti ku nde wande uwog ti a ku yerwen iken na Rimam atang, aba ku tu kutunn-ba uwae ibye ti ande ku sa ba na ba.

¹⁴ Ayi si ahan ama Itsekuru-ti sa tsi baa, ande ti ku ri ira Rimam te ande, ā tu kujwojang-ba uwae wande yi ti aba ku nde.

¹⁵ Ko ti ame site riyae ti ame u mbe iken yine uwog ande, ame sa utob-m tsi-m risu-yi be. Ame ku bae-m kutsingken wune ikyaen ti ame na u jwam ni iken iki be. Ayi nyangskeb ti m cwu, ti ti ande u nde itso iken yine. Ame ku sha-m ti unde iki ā sa ru iken yi ti ame ku ndub ijwe atang be!

¹⁶ Ti ame ku ri te ande ira Rimam ne, ayine si-yi iken ti ame u ndub ijwe atang be. Ayi si iken ti Rimam kangfa m ti ame u ri te ande ira Rimam. Asiti ame a ri-m ira Rimam te ande be, ayi si ayae uwog-m.

¹⁷ Á baa, ame na màm ti uwae-m na ku nde wande yine, ame u ri baa, a na pae m pae. Amaa, ayi si-yi ame ti myae baa, ame na u nde yi be. Ayi si wande ti a sa fae si m baa, ame na nde.

¹⁸ Imi ti si kujwojang-m uwae wande yi ti ame ku nde ne? Kujwojang-m si fengo ti ame tu, u sa ira Rimam ti tinyang kyang ku ri te ande ti rinyangwae. Ame ku sha-m ti unde iki na sha na kang m kujwojang-m keng keng uwae na wande yi ti ame ku nde ne be.

¹⁹ Ikyaen ti, ko ti m si-m upyi unde iki be, ame sa ijwe-m tsi upyi ande meme ikyaen ti m shir ande ru ba ko fufa.

²⁰ Kiye ti ame te Mbayawuda ta tetso, ame som usom-m te ba pangma urae Yawuda ikyaen ti m shir ba ba uwog Yesu. Ko ti icwe ta-yi risu-m be, ame sa risu-m tsi pangma ame na ku putsa Icwe yi ikyaen ti m shir ande ti ku putsa icwe ba uwog Yesu Kristi.

²¹ Ayi si ahan ama kiye ti ame ta uwog ande ti si-ba Mbayawuda be, aba ti ta-ba uwae icwe Rimam be, ame som usom-m pangma ana-ba ikyaen ti m na u shir ba ru ba uwog Yesu. Ayi si-yi ti ame na ku sae ru icwe Rimam be. Ame ta imbyi icwe Kristi.

²² Kiye ti ame ta uwog ande ti site-ba ti ribom be, ame nde pangma aba, ikyaen ti m shir ba ru ba uwog Kristi. Ko usom ti som unde a si rimang patag, ame cwe baa, ame na u som ahan ama, ikyaen ti m na u shir pu kang ande iki uwae-ba ru ba fengo itinwangru.

²³ Ira ti tinyang ti nda m nde iken yine meme, ikyaen ti m tu kutunn-m uwae itinyang ti ta uwae atang.

²⁴ Kiye ti ande a ku pam ishaen na inyae ti ter, ande yang akwen ku ter nyae, amaa, unde kinjo amam ti ku tu rinyangwae, ko si ahan be? Ayi si ahan ama, ni ter ti ni sa uwe ikyaen ti ni ba tu rinyangwae yi.

²⁵ Unde ti ku ter inyae te ariki, awu ku tsi ting ting uwae iken ti a kwen na wu. Rinyangwae ti aba sa utob tsi atang tsikunn-yi kunn be. Amaa, rinyangwae ti ati sa utob tsi atang ti ti u mbe si iken ti tsi kukunn.

²⁶ Ikyaen na yine, uwae inyae ti ter ti ana-m, ame pu ayib cwutsa iken ti a sa tsi uwe-m akwen u ter ku ru yinn yi atang. Ame si unde ti ben ayib ti nungye fengo ti wu ye urwan-wu si riben.

²⁷ Ame nda ijwe-m wune rikaen ti wu ā nde iken ti pang atang. Ame a nde-m ahan be, ikibe, isim ti ame a ri tag Ira Rimam te ande iki, ame ti risu-m u jwunnsi, u tu-m kujwojang yi be.