1 Korinti 7 - Kutsingken Ira Rimam ti Saen Kyag

Ira risu Ribaen

¹ Tine ame u ri tan na ni umbyi ira ti ti rang ti ani bae ba na m. Ayi nyangskeb ti urom ā nae te-wu unda be.

² Amaa, ikyaen ti, ikentitibi ti ti nde te rimenn ijwe ko shisha, ayi nyang skeb ti urom titini ā site uwa-wu, ko unda titini ā site ubaen-wu ama.

³ Urom ā nda uwa-wu iken ti awu ku sha, unda ama ā nda ubaen-wu iken ti awu ku sha.

⁴ Unda ti kununn site-wu kuko risu rimenn ijwe-wu be. Ijwe-wu si ana ubaen-wu. Ti mbwe-yi ama, unde ti kununn site-wu kuko risu rimenn ijwe-wu be. Ijwe-wu si ana uwa-wu.

⁵ Afu urom, byang-fu uwa-fu iken ti awu ku sha be. Afu unda ama, byang-fu ubaen-fu iken ti awu ku sha be. Se ani a cwe pu ni meme ifaen-ni titawe baa, ani na u yata uwae kiye pang ikyaen ti ni na u sa utob-ni na Rimam uwae itijwam. Amaa, isim yine, ni kafe uwe tag atso, be, Shetann u nda ni jwunnsi ikyaen ti, ani ye su tu-ni ijwe-ni be.

⁶ Ayine si ira ti kab-m, ayi si-yi icwe be.

⁷ Á baa, meme ande na u som tu ripaen pangma ame, ayi ú nyang. Amaa, Rimam kyae ande txi txi u nda ba rinyangwae txi txi.

⁸ Tine, ani arom ti anda ti som ripaen, ti awakicwu, ayi nyangskeb ti ni som pangma ti ame som kinjo-m.

⁹ Amaa, asiti ani a u ye su tu-ni ijwe-ni be, ni baen ribaen. Ayi nyangskeb ti urom ā mbe unda, unda ā baen unde ikyaen itisha na rimenn ijwe.

¹⁰ Ani arom ti mbe pu ni anda ti anda ti baen pu ni urom, ame site kusen ti m fwa ni, si-yi ira ti ana-m be, amaa, ira na Itsekuru. Unda ti a baen pu wu urom, awu ā ya ubaen-wu ta-wu be.

¹¹ Amaa, asiti awu a ya wu ta, ayi nyangskeb ti wu ā som kinjo rikaen-wu. Ayi a si-yi ahan be, awu ā kafe ru ka tu ubaen-wu. Urom ama ā rwae ruye-wu uwa-wu be.

¹² Ani ande ti tsitsi, ame ku ri te ni ira ti ame ku tang uwae rishwu-m, si-yi Itsekuru ti ri be. Asiti unde ti ta fengo Rimam a mbe pu wu unda ti nung-wu ira Rimam be, asiti unda wu a cwe ti wu na u som te wu, unde wu ā rwae ruye-wu unda wu be.

¹³ Asiti unda ti ta fengo Rimam a baen pu wu unde ti nung-wu ira Rimam be, unde wu a cwe baa, awu na u som te unda wu, unda wu ā ter saen unde wu ta-wu be ama.

¹⁴ Ikyaen ti, awu urom ti ru-wu uwae kinjo be, Rimam u jwosaen wu ikyaen ira uwa-wu, unda ama ti ru-wu uwae kinjo be, Rimam u jwosaen wu ikyaen ira ubaen-wu. Á baa, ayi na si-yi ahan be, anyisu-ba ú si-ba ande Rimam be. Amaa, ati nung pu ti baa, Rimam kyangte pu wu anyisu-ba baa, aba na si ana-wu.

¹⁵ Amaa, asiti urom iki ko unda iki ti ru-wu uwae kinjo be a ku sha ti aba u kata, awu ā kata-wu. Urom wu ko unda wu, ti si inja ko kaya uwae fengo Rimam, iken iki yir-yi aba be. Rimam ku sha ti ati na som ti kujimshwur.

¹⁶ Ani anda, ani nung pu ni pu ti abaen-ni u tu itinwangru ikyaen ni a. Ani arom ama, ani nung pu ni pu ti awa-ni u tu itinwangru ikyaen-ni a.

Usom ti Som ti Rimam Nda Unde Titini

¹⁷ Unde titini ā som itso usom ti som txi txi pangma ti Itsekuru sa tsi na wu kiye ti Rimam kunn wu. Ayine si icwe ti ame ku kwén na ande Rimam meme.

¹⁸ Unde ti tsen pu wu kutxin titawe Rimam kunn wu ira, awu ā shaen-wu ira kutxin ti awu tsen mam pu wu be. Unde ti tsen-wu kutxin be kiye ti awu a ru uwae kinjo uwog Rimam, awu ā kwab-wu ti a na tsen na wu kutxin be. Awu ā som pangma ti Rimam kunn wu né.

¹⁹ Kutxin ti tsen si-yi ira tiyang iki be. Unde ti tsen kutxin ti unde ti tsen-wu kutxin be si iken kinjo. Iken tiyang si ti unde ā putsa icwe Rimam.

²⁰ Unde titini ā som pangma ti awu som kiye ti Rimam kunn wu.

²¹ Afu si upyi kiye ti a kunn fu a. Ayine ā nda-yi afu uwae ti kab be. Amaa, asiti afu a tu riyae ti fu som usom ti risu-fu, ayi nyang ama.

²² Afu a si upyi kiye ti Itsekuru kunn fu, tine, afu tu pu fu itisaenta uwog na Itsekuru. Asiti afu a si-fu upyi be kiye ti Itsekuru kunn fu, afu tine si upyi na Kristi.

²³ Rimam jaeb pu wu ani, ikyaen yine, ni cwe-ni ti ni si apyi unde be.

²⁴ Ikyaen ayine, ameinja-m, unde titini ā som usom-wu yi uwe Rimam yi usom ti som ti awu som kiye ti Rimam kunn wu. Awu ā som usom wune uwe Rimam.

Ande ti Som Ripaen ti Awa Icwu

²⁵ Tine, ira ti rang risu anyisu wandab ti baen-ba khika be, ame ta-m te icwe iki uwog Itsekuru ikyaen-ba be, amaa, Itsekuru, yi ayibrisi-wu, nda m itsab ti a ku ru kubenti te yi, ama ame u kan te ni.

²⁶ Kiye wune si kiye rikaen, ikyaen yine, ame ku tang baa, ayi na nyangskeb ti unde titini na som pangma ti awu som ne ru fife yi uwe.

²⁷ Asiti awu a mbe unda, awu ā kata-wu te unda wu be. Asiti awu a som ripaen, awu ā nde-wu ijwe-wu rikaen risu ira unda ti mbe be.

²⁸ Amaa, ayi si-yi ikentitibi ti unde ti som ripaen u mbe unda be. Asiti unda ti baen-wu unde be a baen urom, ayi ama beb-yi be. Amaa, ni tangsom baa, ande ti mbe anda ti anda ti baen ande u ngwa rikaen ti tsotso yi uwae usom ti som-ba utense ne. Nee iken ti nde, uwog-m, ayi nyangskeb ti unde ú mbe-wu unda be, ikyaen ti awu ú sang-wu uwae rikaen yi be.

²⁹ Ira yi ti ame ku ri si ti, ameinja-ti, kiye ko-yi cwucwo be. Ikyaen na yine, tsikunn ike ru fife yi uwe, ande ti mbe anda ā sa ijwe-ba tsi pangma a na mbe-ba anda be, anda ti baen ande ama ā sa ijwe-ba tsi pangma a na baen-ba ande be.

³⁰ Ande ti ku byir utob ā som pangma utob-ba na ndembeb-yi mbeb be. Ande ti ku tsen utob ā som pangma ande ti ku tsen-ba utob be. Ande ti ku jaeb kujaeb ā sa uwae tsi-ba risu iken ti ta kujwo-ba be.

³¹ Ande ti ku nde wande te iken na utense ā som pangma utob-ba na ta-yi ijwe iken yi be. Ikyaen ti, utense wune u tsi ka-wu uwe cwucwo be.

³² Ame ku sha ti ni na kab-ni rikaen iki be. Ande ti som ripaen site riyae ti aba u sa utob-ba tsi risu wande na Itsekuru, ama ku kwab ti a u nde iken ti u nyang uwae-wu.

³³ Amaa, unde ti mbe unda ku sa utob-wu tsi uwae iken ti utense, ama ku sha ti wu nde nyang uwa-wu.

³⁴ Utob-wu kata uwog ifaen. Ti mbwe-yi ama uwog anda. Unda ti baen-wu urom be, ko mbawandab, ku sa utob-wu tsi uwae iken na Itsekuru, ama ku sha ti wu sa ijwe-wu ti utob-wu meme na Rimam. Amaa, unda ti baen urom ku sa utob tsi risu iken ti utense, ama ku sha ti wu nde nyang ubaen-wu.

³⁵ Ame ku ri ira yine ti m ndeya ni. Ayi si-yi icwe ti ame sa ku nae tsa ni ukwae be. Ame ku sha ti ni na nde iken ti pang atang uwe na Itsekuru, ti ni kata-ni utob-ni be.

³⁶ Amaa, asiti unde iki a ku kab baa, awu na ku nde-wu iken ti tinyang te wandab-wu be, nee ijwe-wu a ku ndab pang-yi, ama awu a nung baa, awu na u somji tu-wu mbawandab wu be, ayi nyangskeb ti a mbe atso. Asiti aba a baen ribaen, ayi si-yi ikentitibi be.

³⁷ Amaa, asiti unde wu a myae tsi pu wu baa, awu na u mbe-wu wandab-wu be, ama unde iki tur-wu awu tur be, cwucwo, awu a kab nyang pu wu ira yi, awu u ndeye ti wu ya mbawandab wu ta.

³⁸ Unde ti a mbe unda ti awu ter, awu nde pang atang. Ama, unde ti a mbe-wu unda be, nde nyang siskeb.

³⁹ Unda ku som kang te ubaen-wu se ubaen-wu a cwu pu wu. Ubaen-wu a cwu pu wu titawe awu u ndeye ti wu baen unde iki ti nyang uwae-wu. Amaa, awu ā baen unde ti site ure te Itsekuru.

⁴⁰ Ko ti ayi si ahan, ame ku tang baa, unda wune u tsen utob siskeb asiti awu a baen-wu urom be. Ame ku tang baa, ira ti m ri ne na ruye uwog Kusung Rimam ba.