1 Korinti 5 - Kutsingken Ira Rimam ti Saen Kyag

Amae Ti nae

¹ Ame ku fxen ira risu-ni baa, unde iki uwae-ni na ku nae amae na ka ti risu uwa ite-wu. Ayine beb! Ko ande ti nung-ba Rimam be ku nde-ba itso iken yine be.

² Imi ti nde nee ani ku ndub ijwe? Ayi nyang skeb ti ni ndembeb utob u jwub ira! Unde ti nde iken ayine, ayi nyang skeb ti ni sa wu ruye kutampwa-ni.

³ Ana-m, ko ti ame ta rurwen te ni, utob-m te ni ta te atso. Ama unde wu ti nde iken ti isor yine, ame pwen mam pu m awu rikwen yi rinyi na Itsekuru-ti Yesu Kristi.

⁴ Kiye ti ani a funn uwae rinyi na Itsekuru-ti Yesu, ame te ni ta tetso uwae kusung. Kpakang na Itsekuru-ti Yesu ta atang ama.

⁵ Ni ya unde wune ta kujwo Shetann ikyaen ti Shetann ā twenji rimenn-wu ikyaen ti unyang-wu ā nwangru usir na Itsekuru.

⁶ Ayi nyang-yi ti ni ndub ijwe be. Ani fxenji-ni ti a ku ri baa, “Yisiti kpang ti a ku pu si yi buredi ku nda buredi yi ndub ndub ndub u kafe tiyang” be a.

⁷ Ni ya ikentitibi ti ni ku nde kucang ta ti ni kafe ande tishe, be, ayi u ndembeb tag ni meme, ti ni si kubyi buredi tishe ti yisiti ta-yi atang be. Kubenti, ati ande na Kristi si ande ti saen kyag, ikyaen ti Yesu Kristi cwu ricwu ikyaen-ti. Awu ti si umbae mbawentam-ti, ana Ukwab Itiyafe, ti a yerwen na Rimam.

⁸ Ikyaen na yine, ande-m, ni sa ru ira ti kab titibi, ti ikentitibi ti ti nde kutampwa-ni, pangma ti a ku nde ti buredi ti ti ci kiye ukwab. Buredi-ni tine ā si usom ti som ti kubenti ti utob ti tinyang.

⁹ Uwae kutsingken ti ame bae na ni ame bae baa, ani na ren-ni risu te ande ti ku nae amae be.

¹⁰ Ame ku ri-m ira risu ande ti kufub ti ku nae amae, ko ande ti ye ure te risu-ba u ku sae ayib sae iken ande, ko ande ti riyib, ko ande ti ku fen apxin be. Asiti ani a baa, ani na u ya utso ande bane ta, ani u nde tu-ni be, se ani a ya utense wune ta pu ni.

¹¹ Ira ti ame bae na ni ta risu ande ti ku ri baa, a na si ameinja-ti uwae fengo Yesu, amaa, aba ku nae iyag, ariki ku sae ayib sae iken ande, ariki ku fen apxin, ariki ku ri ndembeb rinyi ande, ariki si ande ti ku ngwa iken u ku shishaen, ariki ku yib riyib. Ko wuci ti ti ci, ni ci-ni te ande bane be.

¹² Rikwen ti a u pwen utso ande bane si-yi wande-m be. Rimam ti u pwen ba rikwen. I si ande ti ta fengo na Yesu ti ati u fwan ba kibyag kiye ti aba a nde ikentitibi.

¹³ Rimam ri uwae Kutsingken-wu baa, “Ni jae ruye unde ti ku nde ikentitibi kutampwa-ni.”