1 Korinti 4 - Kutsingken Ira Rimam ti Saen Kyag

Wande na Atom Kristi

¹ Ande ā nung baa, ati atom na si anyisu afxen Yesu Kristi. A sa ira ti kitam na Rimam na ti kujwo.

² Asiti unde a som kyi isu unde iki, iken ti ko siskeb si ti awu ā sae ayib ijwe isu yi nyinyang.

³ Ana-m tine, ira ti ande ku kab risu-m si-yi iken iki be, ko ani, ko ande iki. Ame ti risu-m ku pwen-m ijwe-m rikwen be.

⁴ Asiti ame a raen ira uwae ira yine, ame nung-m be, amaa, ayine ku tatso-yi baa, ame na si unde ti sisaen be, ayi si Itsekuru ti u pwen m rikwen.

⁵ Ikyaen ira yine ni pwen-ni unde rikwen be, se usir a pang pu wu. Usir wu a ba pu wu ti Itsekuru-ti Yesu a kafe ba, awu u ba pwen rikwen yi ti ajwo-wu. Awu u ri tatso ti iken ti ta uwae kufub, ti ira ti unde titini ku kab riyaen utob-wu. Tiri, Rimam u teb unde titini ikyaen kujwo wande-wu ti awu nde.

⁶ Ameinja, ira ti ame ri risu-m ti risu Apolo ne, si ikyaen ti yi ndeya ni. Ame ri yi ikyaen ti ni na putsa kufxen-ti u nungye ira yi ti a bae baa, “Nyaetsa-fu iken ti a bae tsi be.” Ayi nyang-yi ti ani ā ndub ijwe risu unde iki u sae ru unde iki kutampwa-ni be.

⁷ Afu unde ti ku tang baa, afu na skeb ande ti tsitsi, afu si aye? Uwae iken meme ti afu site, iken iki ta atang ti afu mbe-fu ayi uwog Rimam be a. Mbaa, a pu yi pu na fu re, afu nde rimang ku ndub ijwe atang pangma afu ti na kyae yi te ajwo-fu?

⁸ Mbaa, ani tu pu ni iken ti ani ku sha re, mbaa, ani kafe pu ni ande ti rifunn re. Tine ani ya ti ta ti isim u kafe pu ni akwe ko? Ā baa, ani na si akwe, ayi ú nyang, ikyaen ti, ati ama ú tu kutunn-ti uwae kujwokwe-ni.

⁹ Ana-m, iken ti ame nung, ati atom na Yesu, Rimam sa ti tsi iti ricwunnkyi uwae ande-wu. Ati pangma ande ti a pwen ba rikwen iticwu ayib ande meme. Atom na Rimam ti apupwen ti ande ti utense ne meme som ku sae ti.

¹⁰ Ikyaen na Kristi, ati pangma ande ti kuskwab ayib ande, amaa, ana-ni ani sa ijwe-ni tsi baa, ani na nung tag pu ni ira na Kristi meme. Ana-ti, ati site-ti ribom fengo na Rimam be. Amaa, ana-ni, ani site ribom. Ande ku teb ni, amaa, ana-ti, a ku sae ru ti.

¹¹ Ba kwer tine ati ku fxen te unwaen ambyi ti rimenn wuci. Ati ku sī arae atupwa. Ande ku nda ti rikaen. Ati ku kyang ka ike, kyang ka akwen, ati site-ti te kununn be.

¹² Ati ku kwab ku nde wande ti ajwo-ti. Kiye ti ande a rimbeb ti, ati ku wae ira na ba. Kiye ti ande a nde ti rikaen, ati ku ye utob te ba.

¹³ Kiye ti ande a txun ti asu, ati ku cwe ba te ira ti jimshwur. Ba kwar tine, ati pangma iken ti ajib ti ku txi ande iyib. Uwog ande ti utense, ati kafe pu ti iken ti a pu ru ka jwunnsi kukwae abying.

¹⁴ Ame bae-m ira yine ikyaen ti m nda ni rikwae ti wae be. Ame ku fa ni kusen ikyaen ti, ani si anyisu-m ti utob uwae-m.

¹⁵ Iki be ande ti ku kwen na ni iken uwae fengo na Yesu Kristi ka kumbub rijwe, amaa, itse-ni ti mbae ni si nyang kinjo rikaen amam, ikyaen ti ame kafe pu m itse-ni uwae fengo na Yesu Kristi kiye ti ame tsag te ni Ira Tinyang na Yesu Kristi.

¹⁶ Ikyaen yine ame ku jwam-ni, ni putsa kufxen-m.

¹⁷ Nee iken ti nde ame tom Timoti, umbae-m ti utob-m, ti tsi ti kubenti uwae fengo Itsekuru, ru ba uwog-ni. Ame tom wu ti wu na ba tangsom na ni itso iken ti kwen ti ame ku kwen ko aka uwae asog Rimam.

¹⁸ Uwae-ni ande iki ku ndub ijwe ikyaen ti aba tang baa, ame na u kafe ba-m uwog-ni cwucwo be.

¹⁹ Asiti Itsekuru a cwe ira ame u tsi-m tsi be u ba uwog-ni, ikyaen ti ame u ba nung wande na ande ti ku ndub ijwe bane, ame u nung baa, ko a ku nde wande yi benben ree, re a ku ri nyang ira ti apwa unju amam bara.

²⁰ Ikyaen ti, Kujwokwe Rimam si-yi nyáng ira unju ti ri be, amaa i si ira kuko.

²¹ Ni ri te m! Ani ku sha ti ame na ba uwog-ni ti kimbab ree, re ti kujimshwur uwae ure?