1 Korinti 3 - Kutsingken Ira Rimam ti Saen Kyag

Itikata Uwae Ande na Rimam

¹ Ameinja-m, kucang ti ame ta uwog-ni, ira ti ame ri te ni si-yi ira ti ame ku ri te ande ti site Kusung Rimam be. Ame ri ira te ni pangma ani na si ande ti si ana utense wune, ikyaen ti, ani si pangma anyisu ibyaen ti kwen ben-ni uwae ira Yesu Kristi be.

² Ayi si pangma ame na ku nda ni abyaen. Ame nda-m ani wuci ti wam be, ikyaen ti, ani kwèn-ni ti ni u ci tu iken ti wam be. Kubenti, ani ko-ni khika be, ba kwar ti yaka ne.

³ Ikyaen ti, usom ti som-ni si ana ande ti utense wune. Ani site kitsinn te atso ti atang. Ani ku fwan kibyag te atso ti atang. Ayine tatso baa, ani na ku som usom na ande ti utense. Ani te ba pang atso ani nung-ni be a?

⁴ Ti unde iki uwae-ni ku ri baa, “Ame si unde na Bulus,” ama uriki ku ri baa, “Ame si unde na Apolo,” ayi tatso-yi baa, ani te ande ti utense pang atso be a.

⁵ Ande-m! Apolo si aye? Ame Bulus ama si aye? Ati si nyang apyi ti Rimam tom ru ti ti na shir ni ba fengo Yesu. Unde titini uwae-ti nde wande ti Itsekuru-ti Yesu nda wu nde.

⁶ Ati si ande ti ritom. Ame si unde ti tā itso, Apolo sur ambyi. Amaa, Rimam ti nda itso yi ru.

⁷ Unde ti ku ta itso ti unde ti sur ambyi si-ba iken iki be. Rimam amam ti site kuko, ikyaen ti awu ti nda itso yi ruye u ku ser.

⁸ Unde ti ku ta itso ti unde ti ku sur ambyi, aba pang atso. Rimam u ba nda unde titini kujwo ufwa na wande-wu ti awu nde.

⁹ Ati ande ifaen si arwan wande tetso, ati ku nde wande Rimam te atso. Ani ama, ani si risaen na Rimam. Cwucwo, ani si kusog na Rimam ti awu ku mbye.

¹⁰ Uwae rinyangwae na Rimam, ame pangma unde ti ku mbye kusog, ame tā pu m umbyi kusog wu, unde iki ku mbye kutsa risu-wu. Unde titini ā nung nyinyang ti itso iken ti awu u mbye kutsa umbyi kusog wune.

¹¹ Ti kucang akwen Rimam sa Yesu Kristi tsi umbyi kusog, awu kinjo amam. Umbyi kusog iki ta-wu cwucwo be.

¹² Unde titini u mbye som tsa umbyi kusog wune. Asiti afu a pu zinariya ko azurfa ko atxom ti site kiser mbye atang, ko afu a pu ituku, ko irum, ko akong-awum mbye atang,

¹³ usir ti ricwunnkyi u ba shaen ta kujwo wande na unde titini tsi ise, ikyaen ti usir ti ricwunnkyi ti Rimam u pwen utense rikwen, urwa u myae wande ti unde titini nde, ko ayi si ti tinyang ko ayi si titibi.

¹⁴ Asiti kusog ti unde mbye a tsi ti ribom-wu uwae urwa wu, unde wu u tu kujwofwa-wu.

¹⁵ Amaa asiti uwae usir wu, kusog unde iki a twen mbub, unde wune u shanum pu wu te kujwofwa-wu. Awu ti risu-wu u nwangru, amaa ayi site rikaen, pangma ti unde ku nwangru uwae kusog ti urwa tso atang.

¹⁶ Ani ti si kusog Rimam, uwog ti Kusung Rimam ku som atang, ani nung-ni be a?

¹⁷ Ikyaen yine, unde ti a mbub kusog Rimam, Rimam u mbub wu ama, ikyaen ti kusog Rimam kusog ti sisaen. Ani ti risu-ni ne, ani ti si kusog-wu.

¹⁸ Unde iki ā kyaefa-wu ijwe-wu be! Asiti unde iki uwae-ni a ku kab baa, awu na ben ayib uwae iken na utense wune, awu ā sa ben-ayib na utense wune jwunn tika ti wu ā sae risu-wu pangma unde ti kuskwab, ikyaen ti wu ā tu ben-ayib ti kubenti.

¹⁹ Ikyaen ti, iken ti ande ti utense ku tang baa, ayi na si ben-ayib, ben-ayib ayine si kuskwab uwe Rimam. A bae uwae Kutsingken Rimam baa, “Rimam ku ye ande ti itsab uwae itsab-ba.”

²⁰ A bae kyi ira iki cwucwo baa, “Itsekuru-ti Rimam nung ti ira ti kab na unde ti utense wune si ukaen.”

²¹ Ikyaen na yine unde iki ā ndub-wu ijwe uwae wande ti ati ande ku nde be. Kubenti, iken meme si ana-ni.

²² Ame Bulus si ana-ni. Apolo si ana-ni. Bitrus si ana-ni. Utense wune si ana-ni. Unyang-ti wune, ti iticwu-ti meme, si ana-ni. Iken na kiye wune ti iken ti ru ku ba uwe meme ta kujwo-ni.

²³ Ama ani ti risu-ni si ana Yesu Kristi. Yesu Kristi ama si ana Rimam.