1 Korinti 16 - Kutsingken Ira Rimam ti Saen Kyag

A Byir Aser Ikyaen na Ande na Rimam

¹ Tine ni fxen ira risu aser ti ani ku byir ikyaen itindeya na ande na Yesu ti ta Urushelima. Ni nde yi pangma ti ame ri te ande ti Galatiya baa, a na nde.

² Usir ikyinn titini, unde titini uwae-ni ā sa ru aser iki tsika pang ti iken ti awu ku tu. Awu ā sa yi tsika, ikyaen ti ame a kafe ba uwog-ni, ame u mbe aser yi uwog-ni amam, si-yi ti a u byir aser yi kiye wu cwucwo be.

³ Isim ti ame a ru ba pu m, ame u bae kutsingken u nda ande ba ti ani tsab tsi. Ame u tom ba ti kutsingken yi ikyaen ti a u su aser yi ti ani byir tsi ru yae yi Urushelima.

⁴ Asiti ame a nung baa, ayi na nyang ti m na ru ama, ame te ba u putsa atso.

Bulus Myae Ira Risu Ikyi ti Kyang-wu

⁵ Ame u ru ba uwog-ni isim ti ame a ru ka pu m Makedoniya, ikyaen ti ame ku sha ti m kyang rutsa uten ti Makedoniya titawe m ba.

⁶ Kiye ti ame a ru ba pu m, iki be ame u som te ni kiye pang. Ko iki be ishaen usen a mam titawe ame u nwunn. A ru ba sang kiye ti ame u nwunn uwog-ni ani u tatso m fengo ti ku ru uwog titini ti ame ku sha.

⁷ Ame ku sha-m ti m ba uwog-ni u ba tsi ti ritsen amam be. Ame sa uwae tsi baa, ame na u ba som ra te ni kiye pang nee Itsekuru a cwe ira.

⁸ Amaa, ame u som ti uten Afisa ike ru ka sang ti usir Ukwab Pentekos.

⁹ Ikyaen ti ame tu fengo ti m nde wande ti site kuko yang-yi, ko ti ande ti rika ta ike kuko.

¹⁰ Asiti Timoti a ru ba pu wu uwog-ni, ni nde na wu iken ti u sa utob-wu nae riben, ikyaen ti awu ku nde wande na Itsekuru-ti Yesu Kristi pangma ti ame ku nde ama.

¹¹ Ni cwe-ni ti unde iki ā sae ru Timoti be. Ni ndeya wu ti awu ā nwunn uwog-ni ti kujimshwur ti wu ā kafe ba tu m ike. Ame som ku sae ayib-wu ti ameinja-ti ti tsitsi.

¹² Ame ri te inja-ti Apolo baa, awu na putsa ameinja-ti ti tsitsi na ru ba nung ni, amaa, awu ku sha-wu ti awu na u ba tine khika be. Kiye ti wu a tu riyae titawe awu u ba.

Ira ti Ricwunnkyi

¹³ Ni som ti ujwin, ni tsi kunn ku ru kubenti uwae ira na Itsekuru-ti. Ni kyen-ni ikyenricwu be, ni tsi ti ribom.

¹⁴ Uwae iken meme ti ani ku nde, ni ye ure tetso.

¹⁵ Ani nung pu ni ira risu Stefana, ti ande kununn-wu. Aba si ande ti tawe kyangte ira Rimam uten Akaya. Aba sa utob-ba tsi baa, aba na u ndeya ande na Yesu.

¹⁶ Ame ku jwam ni ti ni nda utso ande bane rurob, fa ti unde titini ti te ba ku nde wande tetso.

¹⁷ Ame ku tsen utob te itiba na Stefana ti Fortunatu ti Akaiku ikyaen ti ayi si pangma aba na ru ba kutunn unju-ni.

¹⁸ Aba ku ri bom m utob pangma ti aba nde te ni. Ni nda utso ande bane rurob.

¹⁹ Ande na Yesu ti ta uten ti Asiya ku kunnji ni ira nyinyang. Akila ti Birskila ti ande na Itsekuru ti ku byir uwae kununn-ba, a ku kunnji ni ira atang nyinyang uwae rinyi na Itsekuru-ti.

²⁰ Ameinja meme ti ta ike ku kunnji ni ira. Ani ama, ni kunnji atso ira ti ni ye atso bur utob uwae ure Rimam.

²¹ Tine ame Bulus bae ku na ni kikunnji ti ana-m ti kujwo-m.

²² Unde ti a ye ure te-wu Itsekuru be, awu ā sa ti ukwae-wu! Itsekuru-ti Yesu, ba-fu tiri!

²³ Itinyang na Itsekuru-ti Yesu ā te ni som tetso.

²⁴ Ure-m ā te ni meme som tetso yi rinyi Yesu Kristi.