1 Korinti 15 - Kutsingken Ira Rimam ti Saen Kyag

Itinwunn na Yesu Kristi Uwae Iticwu

¹ Ameinja, tine ame ku sha ti m tangsom na ni ira ti tinyang ti ame sa ba na ni kucang. Ayi si ira yi ti ani paembe u tsi ti kpakang uwae-yi ba ku sang yaka ne.

² Ayi si fengo ira yine nee Rimam ku nwangru ni uwae ikentitibi-ni, asiti ani a tsi kukunn ti ribom uwae ira ti ame ri te ni. Ayi a si-yi ahan be, ani kyangte-ni ira-ti ti uwae kinjo be.

³ Ira ti ame nda ni kujwo baa, ayi na skeb tag iken meme ti kuko, si ayi ti ame ti risu-m mbe uwog Itsekuru-ti ti kucang baa, awu na cwu ricwu ikyaen ikentitibi-ti, pangma ti a bae ira risu-yi uwae Kutsingken Rimam.

⁴ A nji wu, ama uwae usir ti fa ti ita, a kunn nwunn wu uwae iticwu pangma ti a bae uwae Kutsingken Rimam baa, ayi na u nde.

⁵ Isim ti awu nwunn uwae kuskab, awu ru ba tso risu-wu uwog Bitrus. Isim yine awu tso kyi risu-wu uwog ande ti atom rijwe asu ifaen.

⁶ Isim ayine, awu tso kyi risu-wu uwog ande skeb ukob itsong ti ku putsa wu kucang. Uwae ande bane, ariki yang-ba akwen som ti unyang-ba ba kwer tine, ariki cwu pu ba.

⁷ Kiye iki ama, awu tso kyi risu-wu uwe Yakubu; isim yine, awu tso kyi risu-wu uwog ande ti atom-wu ti tsitsi meme.

⁸ Ti ricwunnkyi awu tso risu-wu uwog-m ama, ame ti si pangma umbae ti a mbae wu kiye ti pang-yi atang be.

⁹ Ikyaen ti uwae ande ti atom na Yesu meme, ame fa-m ukwab be. Ame ko-m ti a u kunn m baa unde ti atom be, ikyaen ti, kucang ame nde ande na Rimam rikaen timambe.

¹⁰ Amaa, Rimam, uwae rinyangwae-wu, awu nda m ame si iken ti ame si ne. Ayibrisi ti awu sae m ne si-yi ukaen amen be. Ayi nda m ame kwab skeb tag ande ti atom ti tsitsi meme. Ayi si-yi uwae kuko-m ti risu-m nee ame nde wande ne be, ayi si rinyangwae Rimam ti te m ta tetso.

¹¹ Amaa, ayine si-yi ira iki be. Ko ira tinyang yine ru uwog-m ba, ko ayi ru uwog ande ti atom iki, ayi si iken kinjo. Ayi si ira kinjo ti ati ku ri meme. Ayi si si ira tinyang risu Yesu Kristi nee ani ru kubenti atang.

Fengo ti Ati u Nwunn Uwae Iticwu

¹² Ati ku ri te ande baa, Rimam na kunn nwunn pu wu Kristi uwae iticwu. Ariki uwae-ni kyang rimang ku ri baa, Rimam na u kunn nwunn-wu ande uwae iticwu be?

¹³ Á baa, ande na u nwunn-ba uwae iticwu be, Yesu Kristi ma ú nwunn-wu uwae iticwu be.

¹⁴ Á baa, Yesu Kristi ama na nwunn-wu uwae iticwu be, ayi tatso baa, ira Rimam ti ati ku ri te ande ne, si ukaen, uwae kinjo-ni ti ani ru uwog Yesu Kristi ama si ukaen.

¹⁵ Á baa, Rimam na kunn nwunn-wu Yesu Kristi uwae iticwu be, ayi tatso baa, ati na ku yer rifen nae tsa Rimam, ikyaen ti, ati ri mam pu ti baa, awu Rimam na kunn nwunn Yesu Kristi uwae iticwu.

¹⁶ Á baa, itikunnwunn uwae iticwu na ta-yi be, awu ú kunn nwunn-wu Yesu Kristi be ama.

¹⁷ Ama, asiti ani a ri baa, Yesu Kristi na nwunn-wu uwae iticwu be, uwae kinjo ti ani ru uwog-wu, ayi tso baa, a na ya ta na-ba ani ikentitibi-ni be.

¹⁸ Cwucwo ayi ku tso baa, ande ti ta fengo Yesu Kristi kiye ti aba cwu, na twenji pu ba.

¹⁹ Á baa, ayi na si ira na usom ti som-ti uwae utense wune amam ti ati na sa uwae tsi risu Yesu Kristi, ayi ú si iken ti ku nde risi uwog-ti skeb tag pu yi uwog ande meme.

²⁰ Amaa, ayi si kubenti ti a kunn nwunn pu ba Kristi uwae iticwu. Awu ti si ti kucang tsi na ande meme ti nwunn uwae iticwu, pangma awaen ti kucang na risaen unde.

²¹ Pangma ti kute unde kinjo shir iticwu ba uwae utense, ayi si ahan ama unde kinjo nde fengo ti ande u nwunn uwae iticwu.

²² Pangma ti ande meme ku cwu ikyaen ti rishi-ba ru uwog Adamu, ayi si ahan ama ti Rimam u kunn nwunn meme ande ti cwucwu ti ren risu te Yesu, u nda ba unyang ti atang.

²³ Amaa, unde titini u nwunn kiye ti Rimam nda wu. Unde ti kucang ti nwunn si Kristi. Ande ti putsa si ande-wu meme. Aba u nwunn kiye ti awu a kafe ku ba.

²⁴ Isim ayine tiri, usir ti ricwunnkyi ku ba. Uwae usir wu, Yesu u twenji akwe ti ande tiyang ti iken ti site kuko uwae utense wune. Tiri awu u sa Kujwokwe-wu na Itse-wu Rimam.

²⁵ Ikyaen ti, Yesu u nae kang ukwe se kiye ti awu a pu meme ande ti rika-wu ba ta askab afxen-wu.

²⁶ Ko iticwu ama ti si unde ti rika ti ricwunnkyi, Rimam u twenji wu,

²⁷ ikyaen ti, a bae uwae Kutsingken Rimam baa, Rimam na u nda iken meme nae riben uwe-wu. Imbyi ira yine si ti a nda Yesu kuko risu iken meme, se Rimam amam ti awu site-wu kuko risu-wu be, ikyaen ti, Rimam ti nda wu kuko yi.

²⁸ Ama kiye ti a nda iken meme nae pu yi risu riben na Kristi, awu Kristi ti risu-wu, awu ti si Umbae Rimam, awu u nae risu riben uwog Itse-wu Rimam. Ama awu Rimam ti sa iken meme na Kristi kujwo ti kucang u ru ba nae ukwe risu iken meme. Rimam u ta risu iken meme patag.

²⁹ Á baa, ande ti cwucwu na u nwunn-ba uwae iticwu be, ayi nde rimang ti ariki ku ri baa, a na u nde batisma ikyaen ande ti cwucwu?

³⁰ Ana-ti ama, ati nde rimang ku kyang unju iticwu ko kiye titini?

³¹ Ameinja, ame ta unju iticwu ko usir titini. Ame ri ira yine ti uben ti ben uwe Itsekuru-ti Yesu Kristi ti nda m ku pam ipam ikyaen-ni.

³² Pangma ti ariki ku ri, ko ti ame kum kutxu te ibye anyi uwae uka ti Afisa ike, ayi a si kubenti ti Rimam na u kunn nwunn-wu ande uwae iticwu be, ayi ndeya-yi ame be. Asiti itinwunn uwae iticwu a ta-yi be, unyang-ti utense ike si nyang itici ti itingwa, ikyaen ti, ati u tsi-ti tsi be u cwu.

³³ Ni cwe-ni ti unde iki ā kyaefa ni uwae ira yine be. A ku ri baa, “Arwan titibi u ndembeb unde ti tinyang.”

³⁴ Ni ya ira ti askwab yine ta ti ni fxae ikentitibi-ni. Ame nung baa, ariki uwae-ni nung-ba Rimam be. Ayine si iken ti ku wae rukwae timambe.

Itinwunn na Ijwe Uwae Iticwu

³⁵ Unde iki u ndeye ti wu rang baa, “A u kyang rimang u kunn nwunn kyi ande ti cwucwu? Itso ijwe ti rimang ti aba u site?”

³⁶ Kuskwab! Afu a sa itso iken ta riben, awu u mbug tsoye-wu be, se itso yi a cwu pu yi titawe!

³⁷ Cwucwo iken yi ti afu sa tso riben si nyang itso iken amam, si-yi iken wu be. Iki be ayi si itso awum, iki be ayi si itso wuci iki.

³⁸ Rimam ti ku nda itso yi ruye u kafe iken ti site ijwe ti ana-wu. Awu ku nda itso titini shab tso pang ti rimenn ti nyang uwae-wu.

³⁹ Ayi si ahan ama, awu kyae rimenn ijwe iken txi txi. Rimenn ande txi, rimenn ibye kutur txi, ana inung txi, ana iwag ama txi.

⁴⁰ Ijwe iken ti Rimam kyae tsi apupwen ta atang, ijwe iken ti awu kyae tsi utense wune ta atang ama. Ijwe iken ti apupwen site riyinn-yi, ijwe iken ti riben ike site riyinn-yi ama.

⁴¹ Usir site riyinn-wu. Ushaen site riyinn-wu. Ana atitaen ta atang cwucwo. Ko kutampwa atitaen ti risu-ba, riyinn-ba txi txi.

⁴² Ti mbwe-yi ama, kiye ti ande a ku nwunn uwae iticwu. Ijwe ti a ku sa nji riben si iken ti ku rwa mbumbub. Isim ti Rimam a kunn nwunn unde uwae iticwu, ijwe-wu u ba kafe ijwe ti tinyang ti u rwa mbub-wu mbub cwucwo be.

⁴³ Kiye ti a sa rukom unde nji riben, awu site-wu rinyang ko kpakang be. Amaa, usir ti Rimam á kunn nwunn unde wune, ijwe-wu u nyang si-yi ti ti ri be, awu u site kpakang ama.

⁴⁴ Kiye ti a nji wu, awu si iken na riben ike, kiye ti a kunn nwunn wu, awu kafe iken na kuru Rimam apupwen. Asiti rimenn ijwe a ta atang ti si ana riben ike, ayi ku tatso baa, ijwe Kuru Rimam apupwen na ta kang atang ama.

⁴⁵ A bae uwae Kutsingken Rimam baa, Rimam na kyae Adamu unde ti kucang u nda wu unyang, amaa, Adamu ti ru ba ti ricwunnkyi si Kusung ti ku nda ande unyang tishe.

⁴⁶ Unde u tu-wu ijwe ti ana apupwen be, se awu a tu pu wu ijwe ti ana riben ike titawe.

⁴⁷ A kyae ijwe Adamu ti kucang te isa riben, amaa, Adamu ti ifaen sī apupwen ba.

⁴⁸ Ati ande ti som utense ne si pangma awu Adamu ti a kyae wu te isa riben, ande ti si ana apupwen si pangma awu Yesu Kristi ti si apupwen ba.

⁴⁹ Uwae kiye wune ti ati ta utense, ati pangma awu Adamu ti a kyae wu te isa riben. Uwe ike ati u ba kafe pangma awu Yesu Kristi ti sī apupwen ba.

⁵⁰ Ameinja, ame ku ri te ni kubenti baa, iken ti a kyae te anying ti akub rimenn u tu-yi iken iki uwae kujwokwe Rimam be.

⁵¹ Ni naa atong ira ti titam ti ame ku ri te ni ne. I si-yi meme-ti ti u cwu be, amaa, meme-ti u tu ijwe tishe.

⁵² Ayi u nde ti ritsen ahan, pangma itiskambae ayib, kiye ti a kunn kutumu ti ricwunnkyi. A u kunn kutumu wu u kunn nwunn ande ti cwucwu, aba u nwunn ti ijwe-ba ti tishe ti u rwa mbub-yi mbub cwucwo be. Ati ama u kafe ijwe meme-ti u putsa ba.

⁵³ Ijwe-ti yine ti ku cwu u ku rwa mbumbub u ba kafe iken ti ku cwu-wu cwu be, u rwa mbub-wu be.

⁵⁴ Isim ti Rimam a kafe tag pu wu ijwe-ti ayine ti ku cwucwu ru ba yi ijwe ti tinyang ti tsi kukunn ti si ana apupwen, ira ti a bae uwae kutsingken u kumunn, ikyaen ti a bae baa, “A ci pu ba rika risu iticwu. A twenji pu wu awu.”

⁵⁵ “Afu iticwu, rika ti ci-fu ta aka. Afu iticwu, rikàen-fu ta aka.”

⁵⁶ Iticwu ku tu kpakang-wu uwae ikentitibi. Ikentitibi ama ku tu kpakang-wu uwog icwe.

⁵⁷ Amaa, ati fxaefa te Rimam! Awu ti nda ti ci rika risu ikentitibi uwae kujwo wande na Itsekuru-ti Yesu Kristi.

⁵⁸ Ikyaen yine, ameinja-m ti riyaen utob-m, ni tsi ti kubenti, ni yer-ni anying utob be, ni kwab ti ribom-ni meme uwae wande Rimam ko kiye titini, ikyaen ti ani nungye pu ni baa, wande ti ani na ku nde na si-yi ukaen uwog Rimam be.