1 Korinti 10 - Kutsingken Ira Rimam ti Saen Kyag

Iken ti Kwen Risu Apxin ti Fen Isirela

¹ Ameinja-m ti ambakaya-m, ame ku sha ti ani na tangsom te ira ti tu abitse-ti asang ti wur ru ru. Kiye ti aba ku kyang uwae kutur, meme-ba, kubyi ta uwe ku tatso ba fengo, u tae ba tae ku ru, u sa ba yen uyinn tibyaen te afxen.

² Ti aba ta uwae kubyi wune, ti uwae uyinn wune, ayi si batisma na-ba. Ayi tatso baa, aba na kafe ande ti putsa Musa.

³ Kiye iki cwucwo, meme-ba ci wuci na kusung tetso.

⁴ Meme-ba ama ngwa ambyi na kusung, ayi ambyi ti ruye ijwe kutxom na kusung ti te ba ku kyang ikyin tetso, ama Kutxom wu si Kristi.

⁵ Ko ti ayi si ahan, Rimam ndembeb utob te ariki yang-yi akwen uwae-ba, ama aba cwu, akom-ba shag uwae kutur atang.

⁶ Ira ti tu abitse-ti si iken ti kwén uwog-ti. Ira yine meme ku fa ti kusen baa, ati na sa uwae tsi-ti risu ikentitibi pangma ti aba nde be,

⁷ u fen-ti apxin pangma ti ariki uwae-ba nde be. Pangma ti a bae uwae Kutsingken Rimam baa, “Ande ba som u ci ukwab, u ngwa iken, u nwunn ritsen ku se ise apxin.”

⁸ Ti nde-ti isor be pangma ti ariki uwae-ba nde, ama ande kumbub rikom asu ita cwu bur ti usir kinjo.

⁹ Ti myae-ti Itsekuru myae pangma ti ariki uwae-ba myae, ama ikentibi pyewen ba be.

¹⁰ Ni pwen-ni unju pangma ti ariki uwae-ba nde, ama u twenji yi kujwo atom na iticwu be.

¹¹ Iken yine nde te ba ikyaen ti ati na kwén ira risu-yi. A bae ira yine meme ikyaen ti ayi na fa ti kusen, ati ande ti som uwae kiye ti ricwunnkyi wune.

¹² Ikyaen yine, unde ti a ku kab baa, awu na tsi ting ting, awu ā nung nyinyang, be, awu u jwunnsi.

¹³ Meme itimyae ti a tu fu, tang-fu baa, ayi na ku ba nyáng uwog-fu amam be. Rimam si kubenti, awu u cwe-wu ti kumyae-fu na yafe uwog ti ribom-fu tsi atang be. Kiye ti afu a sang kumyae, awu u tatso fu fengo itiruye ikyaen ti fu tu ribom utob.

¹⁴ Nee iken ti nde ame ku jwam ni, arwan-m, ni ter ruye uwae apxin ti fen.

¹⁵ Ani si ande ti ben pu ni ayib, ni kab ira yi ti ame ku ri risu-ni ne baa, ayi si kubenti bara.

¹⁶ Kiye ti ati ku ci wuci na Itsekuru, kiticwae ambyi anam ti ati ku nde fxaefa risu-yi, ayi tatso-yi risu ti ren-ti yi anying Kristi be a. Buredi ama ti ati ku kata na atso ama tatso-yi baa, ati na ren risu te rimenn ijwe Kristi be a.

¹⁷ Ko ti ati ande ti ku ci buredi yi ko pu ti, kubyi buredi si kinjo rikaen. Ayine tatso baa, ati si kinjo.

¹⁸ Ni tangsom te ande ti Isirela. Kiye ti a yerwen ibye na Rimam risu kuta, aba ku ren risu tetso uwae itikub ibye yi.

¹⁹ Imi ti ame ku ri? Ko ame ku ri baa, iken ti a sa yerwen na apxin na si iken iki a, ko ufwa apxin si iken iki a.

²⁰ Iyee, imbyi ira-m ta re. Kiye ti ande ti apxin a ku yerwen iken-ba ayi, i si kusung titibi ti aba ku fen, si-yi Rimam be, ama ame cwe-m ti ani na te apxin na ren tetso be.

²¹ Ayi u ndetu-yi ti ani u ngwa iken uwae kiticwae na Itsekuru u kafe ru ka ngwa uwae ana kusung titibi be. Ayi u nde tu-yi ti unde u ci wuci na Itsekuru-ti u kafe ba ci wuci apxin be.

²² Ayi nyang-yi ti ati ā nde iken ti u shir rinae Itsekuru ba risu-ti be. Ati skeb Rimam ti ribom a.

²³ Ani ku ri baa, “A byangkyi-ba ati iken iki be.” Amaa, si-yi meme iken ti nyang ikyaen-ni be. Ani site riyae ti ni u nde iken meme. Een, amaa, si-yi meme iken ti u nda ni kpakang be.

²⁴ Kab-fu ira ikyaen iken ti tinyang na risu-fu amam be, amaa, ikyaen ti tinyang na ande ti tsitsi.

²⁵ Ni kab-ni uwae titawe ti ni kub ibye ti a ku jaebci uwae ritug be. Ayi si-yi ikentitibi be.

²⁶ Ikyaen ti, “Utense ti iken ti ta uwae-wu meme si ana Itsekuru.”

²⁷ Asiti unde ti si-wu unde na Yesu be a yae unde iki uwae-ni baa, awu na ru ka ci wuci te wu, ama awu a cwe u ru ka atang, awu ā kab-wu uwae titawe ti wu ā ci wuci ti a pu tsi uwe-wu be.

²⁸ Amaa, asiti unde iki a ri te fu baa, “A fen apxin te wuci yine,” ci-fu wuci yi cwucwo be ikyaen unde wu ti ri ira yine te fu, ayi si-yi ikyaen risu-fu be, amaa, ayi si ikyaen unde wune, ti ikyaen ira ti kab.

²⁹ Ayi si-yi ikyaen ira ti kab na-fu be, ayi si ikyaen ira ti kab unde wune. A u kyang rimang ye m upyi ikyaen na ira ti kab unde iki?

³⁰ Asiti ame a sa wuci yi u nde fxaefa atang na Rimam, imi ti nde nee unde iki u ru ba nung m te riraen?

³¹ Iken meme ti afu a ku nde, ko ayi a si iken ti afu ku ci, ko iken ti afu ku ngwa, nde iken ayi yi fengo ti u sa kuko na Rimam.

³² Nde-fu iken iki ti u ndembeb utob na unde iki be, ko awu a si urae Yawuda ko urae Helene ko kumbug ande Rimam.

³³ Ana-m, ame ku kwab ti ame u nde iken ti ku nyang uwae ande uwae iken ti ame ku nde meme, si-yi ti ame na u ndeya risu-m amam be. Ame sa uwae tsi risu iken ti u ndeya ande yang akwen, ikyaen ti a na nwangru uwae ikentitibi-ba.