1 Korinti 1 - Kutsingken Ira Rimam ti Saen Kyag

¹ Kutsingken wune ru kujwo-m Bulus, ame ti Rimam sa m tsi atom na Itsekuru-ti Yesu Kristi. Ame ti inja-ti Sositene ku kunnji ni ira nyinyang.

² Ame ku bae kutsingken wune ku na ni ande na Rimam ti ta uten ti Korinti, ani ande ti Rimam jwosaen ni, u kunn ni ira baa, ani na si ande-wu uwae usom ti som-ni te Yesu Kristi, fa ti ande ti ta aka patag ti ku fen Itsekuru-ti Yesu Kristi, awu si Itsekuru-ba u si Itsekuru-ti ama.

³ Itse-ti Rimam ti Itsekuru-ti Yesu Kristi ā nda ni itinyang ti utob ti nae riben.

Itinyang ti a ku Tu Uwog Yesu Kristi

⁴ Ko kiye titini ame ku nde na Rimam fxaefa ikyaen na rinyangwae ti awu nda ni uwae usom ti som-ni te Itsekuru-ti Yesu Kristi,

⁵ ikyaen ti, uwae usom ti som-ni te wu, awu nda ni kafe ande ti rifunn. Rifunn-ni si ti ani nungye ira ti kubenti u site kuko ti ni u ri ira yi te ande.

⁶ Ira ti ani fxen ti kucang risu Yesu Kristi sang pu yi riyaen utob-ni.

⁷ Ikyaen yine uwae kiye wune ti ani som ku ji usir ti Yesu Kristi u ru ba tso risu-wu uwog-ti, ani shanum-ni iken iki uwae iken meme ti Rimam ku nda ande-wu be.

⁸ Awu ti u ye ni tsi yer fengo-wu ru ka sang ti usir ti ricwunnkyi, ikyaen ti uwae usir wu ti Itsekuru-ti Yesu Kristi a kafe ba, awu u tu-wu ani ti riraen be.

⁹ Awu Rimam ti kunn ni ira ti ni na ba som usom te Umbae-wu Yesu Kristi, Itsekuru-ti, awu u nde kang iken ti awu yer unju risu-yi.

Itikata Uwae Ande na Yesu

¹⁰ Ameinja, ame ku jwam ni yi rinyi na Itsekuru-ti Yesu Kristi, ni cwe ira atso ikyaen ti itikata ā ta-yi kutampwa-ni be. Ni kwab ti ni ren risu-ni uwog kinjo ti ira ti kab-ni ā si iken kinjo, ti utob-ni meme.

¹¹ Ameinja-m, ame ku ri ira yine ikyaen ti ame fxen ira uwog ande ti kununn Kolowe baa, ani na ku fwan ko kibyag te atso.

¹² Imbyi ira-m ayi ta re, ani kata kumbub kumbub. Unde iki ku ri baa, awu na ku putsa-wu Bulus. Unde iki ama ku ri baa, awu na ku putsa ana-wu Apolo. Uriki ama ku ri baa, awu na ku putsa-wu Bitrus. Uriki cwucwo ku ri baa, awu na ku putsa-wu Yesu Kristi.

¹³ A! A! Ani kyang rimang u ye Yesu Kristi kata kata ahan? A sa ame Bulus kwer ijwe kutuku ti cice ikyaen ira-ni a. A nde ni batisma yi rinyi-m a.

¹⁴ Ame fxaefa na Rimam ti ame nde na-m unde iki uwae-ni batisma be, nyang Kirisipu ti Gayus amam.

¹⁵ Ikyaen yine unde iki uwae-ni ā ri-wu baa, a na nde na wu batisma yi rinyi-m be.

¹⁶ Tine ame tangsom ti ame nde na ande ti ushi kununn Stefana ama. Asiti ayi a yafe abane ame munnji pu m.

¹⁷ Yesu Kristi tom-wu ame ikyaen ti m na nde na ande batisma be. Awu tom me ikyaen ti m na ri ira-wu ti tinyang te ande. Ama ame ku ri-m ira-wu ayine te ben-ayib na utense amen be, ikyaen ti, ame ku sha ti ande na nungye baa, ayi si iticwu na Yesu Kristi risu kutuku ti cice amam ti site kuko, si-yi ben-ayib-m be.

Kuko ti Ben-ayib na Rimam

¹⁸ Uwog na ande ti tu-ba itinwangru be, ira iticwu na Yesu Kristi risu kutuku ti cice si ira ti kuskwab. Amaa, uwog-ti ande ti Rimam nwangru, ati nung baa, ira iticwu na Yesu site kuko na Rimam.

¹⁹ Rimam ri uwae Kutsingken-wu baa, awu na u twenji ben-ayib na ande ti utense. Awu na u sa ben-ayib na ande ti nung iken kafe iken ti kuskwab.

²⁰ Ti ayi si ahan, ben-ayib na ande ti uwae utense ne si-yi iken ti ukaen be a. Ira ti myae na ande ti ku myae ira utense ne si-yi ukaen be a. Rimam tatso pu wu ati baa, ben-ayib na ande ti utense ti iken ti nung-ba si kuskwab.

²¹ Rimam, yi uwae ben-ayib-wu, sa tsi baa, fengo ta-wu ti ande u nung wu yi uwae ben-ayib ana utense be. Awu ri baa, awu na u nwangru ande ti ru uwae kinjo uwog ira ti ati ku ri te ande, ko ti ayi si ira ti kuskab uwog ande iki.

²² Mbayawuda ku sha kob ti a u sae iken ti ku fur ayib ti ku tso kuko na Rimam. Mbahelene ku sa utob-ba tsi kob risu iken ti nung-ba amam.

²³ Ana-ti, ati ku ri ira risu Yesu Kristi ti a sa wu kwer ijwe kutuku ti cice. Uwog Mbayawuda, ira ayine ku nda ba rinae. Uwog ande ti tsitsi ama ayi si ira ti kuskwab.

²⁴ Amaa, uwog ande ti Rimam kunn ba kunn, ko aba a si Mbayawuda, ko a si-ba Mbayawuda be, ira yine si ira na Yesu Kristi, awu ti si kuko na Rimam, ti ben-ayib na Rimam.

²⁵ Iken ti Rimam nde ti ande iki ku tang baa, ayi na si ira ti kuskwab, ira yine skeb pu yi ben-ayib na ande ti utense. Cwucwo, iken ti Rimam ku nde ti ande ku tang baa, ayi na si-yi ti kpakang be, ayi site kpakang skeb pu yi wande na ande.

²⁶ Ameinja-m, ani tangsom ti utso ande ti ani si kucang, ani ande ti Rimam kunn ni kunn. Uwae-ni, ande ti site ben-ayib na utense ne ko-ba ko be. Ande ti site rurob uwe ande ti utense ama ko-ba ko be.

²⁷ Iken ti ande ti utense ku tang baa, ayi na si iken ti ukaen, Rimam tsab yi ikyaen ti wu na u nda ande ti site kuko uwae utense rikwae ti wae.

²⁸ Awu tsab sa iken ti ande ti utense ku sae ru rurob-yi, ti iken ti si-yi iken iki be, ikyaen ti wu twenji iken ti ande ti utense ku tang baa, ayi na site rurob.

²⁹ Nee iken ti nde unde iki u ndub-wu ijwe uwe Rimam be.

³⁰ Rimam ti nda ni ren risu te Itsekuru-ti Yesu Kristi. Awu ti nde fengo nee Yesu Kristi kwen na ti ben-ayib ti kubenti. Uwae wande na Yesu Kristi, Rimam nung ti ati si ande ti kubenti. Awu jwosaen utob-ti u saen ti ta uwae ikentitibi.

³¹ Ayine si iken ti nde nee, a bae uwae Kutsingken Rimam baa, “Asiti unde a ku sha ti awu na u ndub ijwe, awu ā ndub ijwe risu wande ti Itsekuru-ti Rimam nde.”