1 Bitrus 4 - Kutsingken Ira Rimam ti Saen Kyag

Fengo ti Tinyang ti Unde u Putsa

¹ Ikyaen yine, ameinja, ti Kristi ngwa rikaen, ani ama ā kab itso ira ti awu kab ikyaen ti ni kyir utob-ni te-yi. Unde ti a ngwa rikaen uwae rimenn ijwe, awu kafe isim ta pu wu ikentitibi.

² Ani u som-ni uwae ijaen rimenn ijwe cwucwo be, amaa, ayi u si usom ti Rimam ku sha.

³ Ani ndembeb pu ni kiye yang-yi kute ku nde iken ti ande ti nung-ba Rimam be ku nde. Ani ku taen ayib iyag ti amae ti ti nae, u ku nde iken ti ku wae rukwae, u ku ngwa ku shaen, ani ku tsutso ku si si u ku putsa fengo apxin ti fen.

⁴ Tine ti aba nung ti ani ku putsa-ni aba uwae ikentitibi ti ti nde cwucwo be, ayib fe pu yi aba. Aba ku txun-ba ani asu tiri.

⁵ Amaa, aba u tsi uwe Rimam, awu Rimam ti tsi ku ji ti u pwen rikwen risu ande ti tsi user ti ande ti cwucwu.

⁶ Nee iken ti nde a sa Ira Tinyang na Rimam tsag te itikicwu, ikyaen ti, ko ti a pwen ba rikwen pangma ti a ku pwen ande uwae utense, a u som uwae kusung pangma ti Rimam tsi.

Fengo ti Ati u Ndeya Atso ti Rinda Rimam

⁷ Ricwunnkyi iken meme ko ku yaen pu yi. Ikyaen yine, ni ye su risu-ni, ti ni som ti ujwin, ikyaen ti ni u ndetu ti ni u jwam Rimam ko kiye titini.

⁸ Ti siskeb meme, ni tsikunn ti ku ye ure ti kubenti tetso, ikyaen ti, ure ku burkyi ikentitibi yang-yi.

⁹ Ni kyangte rikyen uwae kununn-ni nyinyang, si-yi te unju ti pwen be.

¹⁰ Ti unde titini uwae-ni tu pu wu rinyangwae uwog Rimam, ni sa rinyangwae-ni yi ndeya atso ikyaen ti, ani si ande ti nungtu itiyesu rinyangwae ti Rimam, uwae ayibrisi-wu, ka yi na ni.

¹¹ Asiti Rimam a nda unde iki rinyangwae kutsa ti tswa ira na wu, awu ā tswa yi ben ben. Unde ti rinyangwae-wu a si itindeya ti awu ku nde na ande, awu ā nde yi ben ben ti kpakang ti Rimam nda wu, ikyaen ti, uwae iken meme, riyinn ā si ana Rimam rutsa uwog Yesu Kristi. Riyinn ti kujwokwe ā si ana-wu ru fife yi uwe. Ayi ā si ahan.

Kristi Ngwa Rikaen Ati u Ngwa Rikaen ama

¹² Ameinja, ayi ā fur-yi ani ayib asiti rikaen titibi a tu ni ti yi myae uwae kinjo-ni myae be. Ayi ā si-yi ira tishe uwog-ni be.

¹³ Ni kam ashwu ikyaen ti ani ku ngwa rikaen pangma ti Kristi ngwa. Ama kiye ti awu a kafe ba uwae riyinn-wu, ani u tsen utob u pam ipam.

¹⁴ Asiti a txun ni asu ikyaen na rinyi Kristi, ti tinyang si ana-ni, ikyaen ti, Kusung Rimam, ti si Kusung na riyinn, ta risu-ni.

¹⁵ Amaa, unde iki uwae-ni ā ngwa-wu rikaen ikyaen ti awu si unde ti ku wen unde be, ko unde ti riyib, ko unde ti ku ndembeb iken unde, ko unde ti kufxaen be.

¹⁶ Amaa, asiti unde iki a ku ngwa rikaen ikyaen ti awu ku putsa Kristi, awu ā wae-wu rukwae be, amaa, awu ā teb Rimam ikyaen ti ande ku kunn wu baa, unde Kristi.

¹⁷ Ikyaen ti, kiye nde pu wu ti a u pwen ande rikwen, bag ti risu ande Rimam. Ama asiti rikwen yi a u bag ti risu-ti, ayi u beb rimang risu ande ti pyir Ira tinyang na Rimam?

¹⁸ Pangma ti a bae uwae Kutsingken Rimam baa, “Asiti unde ti som sisaen a u nde rikaen titawe m nwangru, ande ti nung-ba Rimam be, ti ande ti ku nde ikentitibi, ana-ba u beb rimang?”

¹⁹ Ikyaen yine, ande ti ku ngwa rikaen ikyaen ti ayi si utob Rimam, aba ā ru yi uwe ti wande ti tinyang u sa unyang-ba na Rimam ti kyae ba, awu ti si Rimam ti kubenti.